2 KIULONG THSÜRÜ 2 - AMÜSÜH HÜM CL Bible (BSI)

Elija Yinmi lim Bede Yükihkhi

¹ Kheakü küyimki Atungpuhnü Elija ju chitmühean chingnü yinmi lim bede yükihpü lakhea, Elija tüsho Elisha büne Gilgal limnü ane limro ching lakheah.

² Elijanü Elisha ki tha, “Ha kheak binang; tümüde Atungpuhnü I Bethel khiungde yüshihdo.” Tüshe Elishanü tha, “Atungpuh tüsho nü lale, inü nü mübahjih.” Jumonü ane Bethel lim yüki.

³ Bethel ching lakhi wukihrü bokhüh Elisha kilim akhiuk tüsho api ki tha, “ Khihni Atungpuhnü nü putungpuh nü kheaknü bede atsobah de nünü mükheahnah?” Tüsho apinü alo, “Am, inü mükheahlah; dalan.”

⁴ Elijanü api ki tha, “Elisha, ha kheak binang; tümüde Atungpuhnü I Jirikho ching yüshihdo.” Tüshe apinü tha, “Atungpuh tüsho nü lale, inü nü mübahjih.” Jumonü ane Jirikho ching arü.

⁵ Jirikho ching lakhi wukihrü bokhüh Elisha phünide arü, tüsho api ki tha, “ Khihni Atungpuhnü nü putungpuh nü kheaknü bede atsobah de nünü mükheahnah?” Tüsho apinü alo, “Am, inü mükheahlah, dalan.”

⁶ Judüki Elijanü api ki tha, “Ha kheak binang; tümüde Atungpuhnü I Jordan ching yüshihdo.” Tüshe apinü tha, “Atungpuh tüsho nü lale, inü nü mübahjih.” Jumonü anenü yü.

⁷ Ane Jordan ching zhipde alachoki, wukihrü 50 she yü tüsho ane kheaknü khü limshude zhip.

⁸ Judüki Elijanü api khimniuniu lu tüsho ju hingthulungbah ke rhap; ane muhochoki khiungde ke ju azüabah.

⁹ Küyimki ane hokhea, Elijanü Elisha ki tha, “I nü kheaknü bede mutsoyichokinü, nü thsungkheak inü tümü rhimobeanü I ki thaang.” Elishanü alo, “Muzhobah inü alü thsüde nü me yamrüplurüp luanü.”

¹⁰ Apinü tha, “Nünü achakbe kheangdo; tütüshe I nü kheaknü bede atsokhi nünü ngüsho, ju nü kilim mülübah; jude yungsho, ju müngü.”

¹¹ Anenü mutuklode tsahde tüsho asukachihde alachoki, mo-lolungbe tüsho mo-khorabonü ane azüshih, tüsho Elija a chitmühean chingnü yinmi lim yükihabah.

¹² Elishanü kheahde la tüsho zhi, “Abuh, Abuh! Israel khora-lolungbebo tüsho khoraberübo!” Tüshe küyimki apinü anihbuh müngükhukde akamkhea, apinü nihbuh khimmihbo thrüa lu tüsho mahne thsüde thorüp.

¹³ Apinü Elija kheaknü ayokhikhi khimniuniu thrüa lu, tüsho yülobah Jordan ke yean zhip.

¹⁴ Apinü Elija kheaknü ayokhikhi khimniuniu lubah ke rhapde tha, “Elija Thrünpuh, Atungpuh kükheak la?” Küyimki apinü ke rhapkhea, ke ju azüabah, tüsho Elishanü hode yü.

¹⁵ Küyimki Jirikho ching larü wukihrü bokhühnü api limshu chingnü angükhea, arünü tha, “Elija me Elisha kheak yükih-a lah.” Arünü api shorupü arü tüsho api miki alo kheak mükhüm.

¹⁶ Arünü api ki tha, “ Kheakü kheahang, nü yamlarü bolung isa sühmüh lakhi mihtsürü 50 lah; muzhobah arübo yüshang tüsho nü putungpuh yimshang; khükia Atungpuh menü bekih-a lubah awung khürü kheak yungsho jindükhün khürü ching jipkhia bah-a labah.” Apinü alo, “Yung, arübo düyüshih.”

¹⁷ Tüshe küyimki api machihyi khiungde arünü api kheak reangkihkhea, apinü tha, “Arübo yüshang.” Jumonü arünü mihtsürü 50 yüshihbah nimung mahsam yim tüshe api müngü.

¹⁸ Küyimki arü api kilim alode arükhea (api Jirikho ching lakheah), apinü arü ki tha, “Inü nüsa ki düyü de mütha de?”

Elishanü Khinthiyinbe Rhimokhibo

¹⁹ Kheakü kiuto mihtsürübonü Elisha ki tha, “I tungpuhnü akheahkhi nangde ha kiuto lopung ju tsülah; tüshe ke mütsü, tüsho alo müzahzam.”

²⁰ Apinü tha, “Phurusük aso khülang I kilim lubah arang, tüsho ju ching thimi yukang.” Jumonü arünü api kilim lubah arü.

²¹ Judüki apinü kenü ching yü tüsho ju ching thimi bah, tüsho tha, “Atungpuhnü ha thachoh, Inü ha ke thsüngudo; kheakünü rünbah ha chingnü ashekhi yungsho alo mütsüde müla.”

²² Jumonü Elishanü athakhi yu yande ke ju khihni khiungde thsüngua lah.

²³ Ju chingnü api Bethel ching wutu; tüsho api limro ching yüde alachoki, athrürü nunubo khürü kiuto chingnü akhiukbah api ki münejihde tha, “Tsoabahang, kurakrak! Tsoabahang, kurakrak!”

²⁴ Küyimki apinü rholobah arü ngükhea, apinü Atungpuh mung chingnü arübo athru. Judüki kuto dreto 2 murung chingnü akhiuk tüsho azürü 42 ju adütre kamde chakthünak.

²⁵ Ju chingnü api Karmel wung lim yü, tüsho Samaria lim alode arü.