2 KIULONG THSÜRÜ 19 - AMÜSÜH HÜM CL Bible (BSI)

Kiulongthsüpuhnü Isaia Lümrük Keokhi

¹ Küyimki kiulongthsüpuh Hezekianü ju sokhea, apinü akhim thorüpbah shungliukhim phuyu, tüsho Atungpuh yam ching yüzah.

² Tüsho apinü kiulongthsüpuh yam neakbuh Eliakim, athrütbuh Shebna tüsho awünrü amükeamrübo shungliukhim phuyubah Amoz tsührü wukihbuh Isaia kilim yüshih.

³ Arünü api ki tha, “Hezekianü ha tha, Ha nimung ha lümthsünü, athürühkhi, tüsho mihmüthsüm mülakhi nimung khülang ah; khungarübo zübedo, tüsho arü mütrümusupü sühmüh müla.

⁴ Khükia api putungrü Asiria kiulongthsüpuhnü arhang Thrünpuh münejihshihpü thiyikhi limthobuh yubo Atungpuh nü Thrünpuhnü asobah, tüsho Atungpuh nü Thrünpuhnü asokhi yu dünkheak api thürühbah; jumonü aninga lakhi thsungkheak nünü tamkhüntamnüjang.”

⁵ Küyimki kiulongthsüpuh Hezekia yamlarübonü Isaia ki arükhea,

⁶ Isaianü arü ki tha, “Nüsa putungrü ki thaang, ‘Atungpuhnü ha thachoh: Nünü asokhi Asiria kiulongthsüpuhnü I mükhemürangde athakhi yu dünkheaknü dütre.

⁷ Inü me khülang api kheak yukjihbah, junangde apinü neamneamrurukhi sobah tüsho anihbuh lomi lim yülobah; anihbuh lomi ching inü api nukshangnü akeamshihbah.’ ”

Asiriarünü Müzünkhi Püpü

⁸ Limthobuh alode arü tüsho Asiria kiulongthsüpuhnü Libna bede thirithsükhi ngü; tümüde kiulongthsüpuh Lakish chingnü tsodo de apinü so.

⁹ Küyimki kiulongthsüpuhnü Ethiopia kiulongthsüpuh Tirhaka dünkheak sokhea, “ Kheahang, nü bede thirithsüpü api tsahmusudo,” kheaküshe apinü yunithsürübo Hezekia kilim yüshihde tha,

¹⁰ “Nünü Juda kiulongthsüpuh Hezekia ki ha thaang: Jirusalem ju Asiria kiulongthsüpuh khah ching muyukjih de alokhikhi hode nünü düthsün angübuh nü Thrünpuhnü nü düthsungyukshih.

¹¹ Kheahang, Asiria kiulongthsürübonü lomibo alala shahde thsümünimde arhimokhi nünü sodo. Nü atsokhitkhukba de?

¹² I buh pürünü athsümünimkhi trükshihbo, Gozan, Haran, Rezeph tüsho Telassar ching lakhi Eden mihtsürübo arü thrünpuhbonü bekhitkhea de?

¹³ Hamath kiulongthsüpuh Sepharvaim kiuto kiulongthsüpuh, Hena kiulongthsüpuh, yungsho Ivva kiulongthsüpuh küching la?”

¹⁴ Hezekianü yunithsürü khah chingnü kihüm leangkhi tüsho khe; jushu Hezekianü Atungpuh yam ching wutu tüsho Atungpuh miki trüna zo.

¹⁵ Tüsho Hezekianü A TUN GPU H miki tamkhüntamnü, tüsho tha: “O Atungpuh Israel Thrünpuh, shepü cherubim kumung binla, lomi kiulongthsübo alala kurungkheak nü lang Thrünpuh; nünü thüning tüsho alomi thrün.

¹⁶ O Atungpuh , nü nükhün muphoang, tüsho soang; O Atungpuh , nü mükbo khimshuhang, tüsho kheahang; arhang Thrünpuh keangrüpü arüshihkhi Sennakerib yubo soang.

¹⁷ Tsükjide, O Atungpuh , Asiria kiulongthsürübonü trükshihbo tüsho arü lomibo akeangkeang kamshihdo,

¹⁸ tüsho arü thrünpuhbo mihtsürü khahnü athsükhi sang tüsho lung mo ching takabahjih tüsho junangde arübo thsümünim.

¹⁹ O Atungpuh isa Thrünpuh, jumonü kheakü api khah chingnü isa khümkhitang de inü nü ki tamkhüntamnüchoh, junangde O Atungpuh , alomi kiulongthsübo alalanü nü lang Thrünpuh de amükheahbah.”

Kiulongthsüpuh kilim Isaia Yusheak

²⁰ Judüki Amoz tsührü Isaianü Hezekia kilim yüshihde tha, “A TUN GPU H , Israel Thrünpuhnü ha thachoh: Asiria kiulongthsüpuh dünkheak nünü I ki tamkhüntamnükhi inü sodo.

²¹ Atungpuhnü api dünkheak asukkhi yu ha: Alibenü nü mükhemürangchoh, alibenü nü keangrüchoh– atsangkhitkhi Zion tsührübe; alibenü nü dunglim aku angamchoh, Jirusalem tsührübe.

²² Shepü nünü keangrükhea tüsho mükhemürangkhea? Shepü azhihde nünü azhikhea tüsho nü mük zhipzhipde azüngkihkhea? Israel Amüsühbuh azhih!

²³ Nü yunithsürü hode nünü Atungpuh keangrüdo, tüsho nünü tha, ‘I yo khora-lolungbebo ahihdo lubah awung achangbo kheak inü wutukheah, Lebanon achangbo khiungde. Inü cedar ashangshang kiushak, amokhitkhi saipressbo; inü amukhiungpung murung achak khiungde yü.

²⁴ Inü kekhipbo kiu tüsho khiungkerü lobo ching ke yungkheah, Ijip kenü alala I jing lungnü kungabahshih.’

²⁵ Müngühlimnü inü lümkihdo de nünü muso de? Awün nimungbo chingnü inü lüm, kheakü tümü inü hande arücho, junangde nünü chipi ayünkhi kiutobo müneanmuru mujung kamshihdo.

²⁶ Arü mihtsürübo, sühmüh keamabah, treabah tüsho yingyingabah; arübo thulu sangrung nangde kamdo tüsho rim thünak nangde, thüyam kumung kheak rim nangde mütoyide phusahabah.

²⁷ Tüshe nü lapung, nü wukhiukkhi tüsho azahkhi, tüsho nü bukakhiukde I azhihkhi inü mükheahlah.

²⁸ Tümütüsho nü bukakhiukde I azhih tüsho nü mulong zhipzhipkhi I nükhün ching arüdo, inü I yo khoyang nü nupung ching yukjihbah tüsho I yo yinchikheam nü mün ching yukjihbah; inü nü arükhi limro lim rholoshihbah.

²⁹ “Tüsho nü thsungkheaknü ha amütsan labah: Ha kam azangrü mukhuhkhi nünü atsühbah, tüsho ashikampü ju müjih chingnü; jushu asam kampü mükheanang, yimluang, kurungaso yangang, tüsho asobo tsühang.

³⁰ Aningkhi Juda yamkhünnü kheaküshe aying abolim chinyukbah, tüsho akulimnü aso asobah;

³¹ Tümüde Jirusalem chingnü aningkhi tüsho Zion wung chingnü arhang larü tsokhitbah. Wuto Atungpuh künkhinü ha rhimobah.

³² “Jumonü Asiria kiulongthsüpuh dünkheak Atungpuhnü ha thachoh: Apinü ha kiuto ching marü, hühzo mükip, tsung shuhbah marü, yungsho ju azhihde akünkihpung mürün.

³³ Api arükhi limronü api tsolobah; api ha kiuto ching mazah, Atungpuhnü thachoh.

³⁴ Tümüde ha kiuto khümkhitpü I tüsho inü I yamlarü David mung chingnü inü akhanglobah.”

³⁵ Ju tsüngrenü Atungpuh yunirü tsahmusu tüsho Asiria binpung ching 1,85,000 kinga lungshih; küyimki yapsu kamkhea, arü alala ashemi lakheah.

³⁶ Judüki Asiria kiulongthsüpuh Sennakeribnü thüyam lim yüabah, tüsho Nineve ching la.

³⁷ Api nihbuh thrünpuh Nisrok yam ching kingaünde alachoki, atsührübo Adrammelek tüsho Sharezernü nukshangnü api laksah, tüsho ane Ararat lomi ching tsode yü. Api tsührü Esarhaddonnü api müthri.