2 KIULONG THSÜRÜ 17 - AMÜSÜH HÜM CL Bible (BSI)

Israel Kiulongthsüpuh Hoshea

¹ Juda kiulongthsüpuh Ahaz kam thürükheak mahnepü ching, Ela tsührü Hosheanü Israel kurungkheak Samaria ching kiulongthsüpü tankih; apinü kam tuku kiulongthsü.

² Apinü Atungpuh miki amütsü rhimo, tütüshe api müngüh larü Israel kiulongthsürübo nangde yung.

³ Asiria kiulongthsüpuh Shalmanesernü api azhihde atu; Hoshea api bukkhüp laabah, tüsho api kilim ruk jih.

⁴ Tüshe Asiria kiulongthsüpuhnü Hoshea kheak thiyuro mülakhi ngü; tümüde apinü Ijip kiulongthsüpuh kilim yunithsürü yüshih, tüsho apinü kam aban Asiria kiulongthsüpuh kilim jihde alakhi müjihdebah; jumonü Asiria kiulongthsüpuhnü api rambah rihyam ching zo.

Samaria Lungkhi

⁵ Judüki Asiria kiulongthsüpuhnü lomi alala yande arü tüsho Samaria ching arü; kam mahsam apinü ju yan.

⁶ Hoshea kam tukupü ching Asiria kiulongthsüpuhnü Samaria yankhit; apinü Israelrü bebah Asiria ching yü. Apinü arübo Hala, Gozan ching lakhi Habor ayung, tüsho Midia kiutobo ching binshih.

⁷ Ha dünji tümütüsho Israel mihtsürünü arü Ijip kiulongthsüpuh khah ching Ijip lomi chingnü bekhitbuh arü Thrünpuh Atungpuh azhihde neak yihbeak. Arünü püpürü thrünpuhbo kingaün

⁸ tüsho Atungpuhnü Israel müngüh yankhitkhi trükshihbo tüsho Israel kiulongthsürübonü ahuhkhi jipü-yaklibo ching tsah.

⁹ Israel mihtsürübonü aramlimnü Atungpuh arü Thrünpuh azhihde rhimo. Arünü arü kiuto alala ching nihbuh thsungkheak achang dangpungbo aheangsadam kinü chipi ayünkhi kiuto khiungde thsü;

¹⁰ arünü arü thsungkheak awung abande tüsho sangdung aban khüp dungjingbo tüsho Ashera sangthsübo khima zo;

¹¹ arü müngüh Atungpuhnü bede atsokhi trükshihnü arhimokhi nangde ju ching arünü achang dangpungbo kheak kingaün jih. Arünü amütsü rhimode Atungpuh bukakhiukshih;

¹² arünü sangthsübo tankih, küpü Atungpuhnü arü ki tha, “Nüsanü ha dürhimo.”

¹³ Tütüshe Atungpuhnü Israel tüsho Juda ki wukihrü aban tüsho angürü aban hode tha, “Inü nüsa jipürü kilim thiyukhüm jihkhi yakzan tüsho I yamlarü wukihrübo inü nüsa kilim thiyikhi yande nüsa amütsü limrobo chingnü rholoang tüsho I yukhümbo le I yakzanbo zoang.”

¹⁴ Arü jipürünü Atungpuh arü Thrünpuh kheak mükinkhi nangde, arünü mani tüshe nihnihde la.

¹⁵ Arünü api yakzanbo, apinü arü jipürü kheak tangzüngkhi, tüsho arü kilim dühdükhiyu jihkhi bahyuk. Arünü sangthsübo dunglim yü tüsho amülim kamabah; arünü arhimokhi yande dürhimo de Atungpuhnü athakhi arü mühi trükshihbo dunglim yan.

¹⁶ Arünü arü Thrünpuh Atungpuh yukhümbo alala bahyuk tüsho arü thsungkheak moshi nunu sangthsü mahne thsüa zhipshih; arünü Ashera sangthsü thsübah, chiningbo kingaün, tüsho Baal tankih.

¹⁷ Arünü arü tsührü athrürü tüsho aliberübo monü taka kingaün; arünü akhasherü tüsho kuhikheahrü keode la; tüsho arünü Atungpuh miki amütsü rhimode nihbuh zangrü yinde api bukakhiukshih.

¹⁸ Jumonü Atungpuhnü Israel kheak khide bukakhiuk tüsho api mikinü arü yihkhita bah; Juda trük kheak hode sheshe maning.

¹⁹ Judanü she Atungpuh arü Thrünpuh yukhüm mani tüshe Israelnü ahuhkhi jipü-yakli ching tsah.

²⁰ Atungpuhnü Israel tsühsoniusobo alala bahyuk; apinü arü thsümüchi tüsho api mikinü yankhita mübahyi khiungde arü riri bukmükerü khah ching jih.

²¹ Küyimki apinü David yamkhün chingnü Israel thokhikhea, arünü Nebat tsührü Jeroboam kiulongthsürü thsüshih. Jeroboamnü Israel Atungpuh yankhi chingnü beakhin tüsho arü neak tode yihbeakshih.

²² Israel mihtsürübonü Jeroboamnü ayihbeakkhi neakbo ching mutuklode la; arünü jurü kheaknü müchamkhi.

²³ Apinü ayamlarü wukihrübo hode athajungkhi nangde Atungpuhnü Israel amikinü müyihkhityi khiungde alakheah. Jumonü Israelnü nihbuh lomi chingnü Asiria ching tsode yünü khihni khiungde la.

Israel ching Asiriarü Lakhi

²⁴ Asiria kiulongthsüpuhnü mihtsürübo Babilon, Kutha, Avva, Hamath, tüsho Sepharvaim chingnü bede arü, tüsho Israel müthri Samaria ching arübo lashih; arünü Samaria yamalo lu, tüsho kiutobo ching la.

²⁵ Küyimki arü atan ju ching lakhea, arünü Atungpuh mükingaün; jumonü Atungpuhnü arü bolung kekhüzü yüshihbah arü nguhsah.

²⁶ Jumonü Asiria kiulongthsüpuh ki thakhi ju, “Nünü bede yübah Samaria kiuto ching lashihrünü lomi thrünpuh yakzan mümükheah; jumonü apinü arü bolung kekhüzü yüshih; jurünü arübo nguhsahchoh, tümütüsho arünü lomi thrünpuh yakzan mümükheah.”

²⁷ Judüki Asiria kiulongthsüpuhnü thiyukhüm jih, “Nünü Samaria chingnü bede arükhi amükeamrü bolung khülang ju ching yübah lashang tüsho arü ki lomi thrünpuh yakzan thsangyushang.”

²⁸ Jumonü arünü Samaria chingnü bede ayükhi amükeamrü khülang arü tüsho Bethel ching la; apinü arü ki küruk Atungpuh kingaünbanü huh.

²⁹ Tüshe trükshih abannü nihbuh thrünpuhbo thsü tüsho arü lapung kiutobo ching, Samaria mihtsürübonü athsükhi achang dangpung arüngyambo ching yuka zo;

³⁰ Babilon mihtsürübonü Sukkothbenoth thsü, Kuth mihtsürübonü Nergal thsü, Hamath mihtsürübonü Ashima thsü;

³¹ Avvirünü Nibhaz tüsho Tartak thsü; Sepharvirünü arü tsührübo Sepharvaim thrünpuhbo, Adrammelek tüsho Anammelek kilim taka kingaün.

³² Arünü Atungpuh she kingaün tüsho mihtsürü aphuaphu chingnü achang dangpungbo amükeamrübo mokhitde, arünü arü thsung thsüde achang dangpungbo arüngyam ching kingaün jih.

³³ Junangde arünü Atungpuh kingaün tüshe arünü bahbah arüpung trükshih yakli yande arü thrünpuhbo she tankih.

³⁴ Khihni khiungde arünü adüso jipü-yaklibo rhimochoh. Arünü Atungpuh mükingaün tüsho Atungpuhnü Israel de ajikhi Jakob tsührübo kilim thiyukhüm jihkhi yukhüm yungsho yuzüng yungsho yakzan yungsho thiyukhümbo müyan.

³⁵ Atungpuhnü arü ki tangzüng thsü tüsho thiyukhüm jih, “Nüsanü püpürü thrünpuhbo mükingaün yungsho nüsanü arü ki mukhukning yungsho arü mütankih yungsho arü ki laksah-a mükingaün,

³⁶ tüshe nüsanü nüsa Ijip lomi chingnü wu-sühmüh ato tüsho khah chungkhitde abekhitbuh Atungpuh kingaünbah; nüsanü api ki khukningbah, tüsho laksah-a kingaünbah.

³⁷ Thiyukhümbo, thiyuzüngbo tüsho yakzanbo apinü nüsa thsungkheak thrütkhi, nüsanü kamruhroro kümkangde leangkhiang. Nüsanü püpürü thrünpuhbo mükingaün;

³⁸ inü nüsa kheak tangzüngkhi dümih, tüsho püpü thrünpuhbo dükingaün.

³⁹ Tüshe nüsanü Atungpuh nüsa Thrünpuh kingaünbah; apinü nüsa riri alala khah chingnü nüsa bekhitbah.”

⁴⁰ Judüalalashe arünü mani, tüshe arünü adüso jipü-yaklibo mutuklode rhimo.

⁴¹ Jumonü harü trükshihbonü Atungpuh kingaün, tüshe arünü athsükhi sangthsübo she tankih; khihni khiungde arü tsührübonü tüsho arü tsührü tsührübonü arü jipürünü arhimokhi nangde mutuklode rhimochoh.