2 KIULONG THSÜRÜ 15 - AMÜSÜH HÜM CL Bible (BSI)

Juda Kiulongthsüpuh Uzzia

¹ Israel kiulongthsüpuh Jeroboam kam mukukheak thünepü ching Judarü Amazia tsührü kiulongthsüpuh Uzzianü kiulongthsüpü tankih.

² Api kiulongthsü tankihchoki anihbuh kam 16 azorü lakheah, tüsho apinü Jirusalem ching kam thünimkheak mahne kiulongthsü. Abe mung ju Jirusalemrü Jekolia lakheah.

³ Abuh Amazianü arhimokhi nangde apinü Atungpuh miki alungki rhimo.

⁴ Judüalalashe, achang dangpungbo lubah mutsode alakheah; mihtsürübonü judü lang achang dangpungbo kheak laksah-a kingaün tüsho rhümthüneabe tak.

⁵ Atungpuhnü kiulongthsüpuh kheak shik, junangde api ashe khiungde apham kih, tüsho thüyam büthsükhi ching lakheah. Kiulongthsüpuh tsührü Jothamnü kiulongthsüpuh yam kheahde lomi mihtsürü ki yakzan shuhde alakheah.

⁶ Kheakü aningkhi Uzzia rhimobo tüsho apinü arhimokhi alala Juda kiulongthsürübo yukhean hüm ching thrüta müla de?

⁷ Azaria nihbuh jipürü lung yap; arünü api nihbuh jipürü lung David kiuto ching kiuyukabah; api tsührü Jothamnü api müthri.

Israel Kiulongthsüpuh Zekaria

⁸ Juda kiulongthsüpuh Uzzia kam samrükheak tizheahpü ching Jeroboam tsührü Zekarianü Israel kurungkheak Samaria ching khinu thuruk kiulongthsü.

⁹ Api jipürünü arhimokhi nangde apinü Atungpuh miki amütsü rhimo. Apinü Israel neak yihbeakshihkhi Nebat tsührü Jeroboam neakbo chingnü müchamachih.

¹⁰ Jabesh tsührü Shallumnü api azhihde rük thsü, tüsho mihtsürü bolungnü kinga lungshihbah api laksah, tüsho api müthri kiulongthsü.

¹¹ Kheakü aningkhi Zekaria rhimobo Israel kiulongthsürübo yukhean hüm ching thrüta lah.

¹² Ha Atungpuhnü Jehu kilim alokhikhi lakheah, “Lün phüyipü khiungde nü tsührübonü Israel kiulongthsübinkiu kheak binbah.” Tüsho jude dünji.

Israel Kiulongthsüpuh Shallum

¹³ Juda kiulongthsüpuh Uzzia kam samrükheak tukupü ching Jabesh tsührü Shallumnü kiulongthsüpü tankih; apinü Samaria ching khinu khülang kiulongthsü.

¹⁴ Judüki Gadi tsührü Menahem ju Tirza chingnü Samaria lim atu; apinü Jabesh tsührü Shallum Samaria ching kinga sheshih; apinü anihbuh müthri kiulongthsü.

¹⁵ Kheakü aningkhi Shallum rhimobo, apinü rük thsükhi bede Israel kiulongthsürübo yukhean hüm ching thrüta lah.

¹⁶ Ju kim ching Menahemnü Tiphsa ching lakhi tüsho lomi, Tirza kheaknü rünbah thsümünim; tümütüsho apinü api bukkhüp mazah, apinü ju thsümünim. Apinü mihlakhi azoberü alala chakashung.

Israel Kiulongthsüpuh Menahem

¹⁷ Juda kiulongthsüpuh Uzzia kam samrükheak tukupü ching, Gadi tsührü Menahemnü Israel kurungkheak kiulongthsüpü tankih; apinü Samaria ching kam thürü kiulongthsü.

¹⁸ Apinü Atungpuh miki amütsü rhimo; apinü api nimungbo alala ching Israel neak yihbeakshihkhi Nebat tsührü Jeroboam neakbo tümü chingnü she müchamkhi.

¹⁹ Asiria kiulongthsüpuh Pulnü lomi azhihde arü; Menahemnü Pul kilim shotoyinchi khahngak 34,000 jih, junangde apinü anihbuh kiulongthsü wu-sühmüh düküngshihde arungpü thsü.

²⁰ Menahemnü Israel kheaknü sho threa lu, ju Asiria kiulongthsüpuh kilim jihpü alarü alala kheaknü mihbüm abande shotoyinchi 50 lu. Jumonü Asiria kiulongthsüpuhnü nihbuh lomi lim alode yü.

²¹ Kheakü aningkhi Menahem rhimobo, tüsho apinü arhimokhi alala, Israel kiulongthsürübo yukhean hüm ching thrüta müla de?

²² Menahem nihbuh jipürü lung yap, tüsho api tsührü Pekahianü api müthri.

Israel Kiulongthsüpuh Pekahia

²³ Juda kiulongthsüpuh Uzzia kam thünimpü ching, Menahem tsührü Pekahianü Israel kurungkheak Samaria ching kiulongthsüpü tankih; apinü kam mahne kiulongthsü.

²⁴ Apinü Atungpuh miki amütsü rhimo; apinü Israel neak yihbeakshihkhi Nebat tsührü Jeroboam neakbo chingnü müchamkhi.

²⁵ Api yo wühkenobuh, Remalia tsührü Pekanü Gileadrü 50 bebah api azhihde rük thsü, tüsho Samaria ching api lung Argob le Arieh bede kiulongthsüpuh yam alungbe chipi chingnü zündo; apinü anihbuh laksah, tüsho api müthri kiulongthsü.

²⁶ Kheakü aningkhi Pekahia rhimobo, tüsho apinü arhimokhi alala, Israel kiulongthsürübo yukhean hüm ching thrüta lah.

Israel Kiulongthsüpuh Peka

²⁷ Juda kiulongthsüpuh Uzzia kam thünimkheak mahnepü ching, Remalia tsührü Pekanü Israel kurungkheak Samaria ching kiulongthsüpü tankih; apinü kam muku kiulongthsü.

²⁸ Apinü Atungpuh miki amütsü rhimo; apinü Israel neak yihbeakshihkhi Nebat tsührü Jeroboam neakbo chingnü müchamkhi.

²⁹ Israel kiulongthsüpuh Peka nimungbo ching, Asiria kiulongthsüpuh Tiglath-pileser atu tüsho Ijon, Abel-beth-naaka, Janoa, Kedesh, Hazor, Gilead, tüsho Galilee, Naphtali lomi alala yan; tüsho apinü mihtsürübo rama lubah Asiria ching yü.

³⁰ Judüki Ela tsührü Hosheanü Remalia tsührü Peka azhihde rük thsü, tüsho api laksah; Uzzia tsührü Jotham kam mukupü ching apinü anihbuh müthri kiulongthsü.

³¹ Kheakü aningkhi Peka rhimobo, tüsho apinü arhimokhi alala, Israel kiulongthsürübo yukhean hüm ching thrüta lah.

Juda Kiulongthsüpuh Jotham

³² Israelrü Remalia tsührü kiulongthsüpuh Peka kam mahnepü ching Judarü Uzzia tsührü kiulongthsüpuh Jothamnü kiulongthsüpü tankih.

³³ Api kiulongthsüpü tankihchoki kam 25 azorü lakheah tüsho Jirusalem ching kam thürükheak thuruk kiulongthsü. Abe mung ju Zadok tsührü Jerusha lakheah.

³⁴ Abuh Uzzianü arhimokhi nangde apinü Atungpuh miki alungki rhimo.

³⁵ Judüalalashe achang dangpungbo mulukde alakheah; mihtsürübonü judü lang achang dangpungbo kheak laksah-a kingaün tüsho rhümthüneabe tak. Apinü Atungpuh yam ripit akube thsü.

³⁶ Kheakü aningkhi Jotham rhimo, tüsho apinü arhimokhi alala, Juda kiulongthsürübo yukhean hüm ching thrüta müla de?

³⁷ Judüki nimungbo ching Atungpuhnü Siria kiulongthsüpuh Rezin tüsho Remalia tsührü Peka Juda azhihde yüshih.

³⁸ Jotham api jipürü lung yap tüsho anihbuh apü David kiuto ching jipürübo lung kiuyukabah; api tsührü Ahaznü api müthri.