2 KIULONG THSÜRÜ 14 - AMÜSÜH HÜM CL Bible (BSI)

Juda Kiulongthsüpuh Amazia

¹ Israelrü Jehoahaz tsührü kiulongthsüpuh Jehoash kam mahnepü ching Judarü Joash tsührü kiulongthsüpuh Amazianü kiulongthsüpü tankih.

² Api kiulongthsüpü tankihchoki kam 25 azorü lakheah, tüsho apinü Jirusalem ching kam mukukheak tuku kiulongthsü. Abe mung ju Jirusalemrü Jehoaddin lakheah.

³ Apinü Atungpuh miki alungki rhimo, tütüshe api jipürü David nangde yung; alala ching abuh Joashnü arhimokhi nangde rhimo.

⁴ Tüshe achang dangpung luka mübah; mihtsürübonü judü lang laksah-a kingaün tüsho achang dangpungbo kheak rhümthüneabe tak.

⁵ Api khah ching kiulongthsü wu-sühmüh laakede apinü abuh kiulongthsüpuh laksahrü api yamlarübo laksah.

⁶ Tüshe apinü Mosa yakzan hüm thrüta lakhi yande mihkhukrü tsührübo a mülaksah, küpü ching Atungpuhnü thiyukhüm jihde tha, “Tsührü dünkheaknü bebuhrü müsheshih, yungsho bebuhrü dünkheaknü tsührü müsheshih; tüshe mihtsürü khülang ju nihbuh neak dünkheak sheshihbah.”

⁷ Apinü Edomrü thimi jindükhün chingnü 10,000 laksah tüsho thirithsü chingnü Sela yankhia lubah ju Joktheel de ji, ju mung khihni khiungde lah.

⁸ Judüki Amazianü Israelrü Jehu tsührü, Jehoahaz tsührü kiulongthsüpuh Jehoash kilim yunithsürü yüshihde tha, “Arang, isa mironü miro shoruachihanü.”

⁹ Israel kiulongthsüpuh Jehoashnü Juda kiulongthsüpuh Amazia kilim thiyusheak yüshih, “Lebanon ching lakhi ayangrungnü Lebanon ching lakhi cedar kilim thiyusheak yüshih, ‘I tsührü niube thsüpü nü tsührü alibe ju jihang’; tüshe Lebanon ching lakhi mütüm shiwühnü tsahho tüsho ayangrung ju jungnak.

¹⁰ Nünü atsütsü Edom kukdo, tüsho nü kükheangde lah. Nü mungshikhi ching reangkeamang, tüsho thüyam ching laang; nü lung Juda bede akeampü thsüde tümüde nünü küpkhukpü asahcho?”

¹¹ Tüshe Amazianü mani. Jumonü Israel kiulongthsüpuh Jehoashnü wutu; api tüsho kiulongthsüpuh Amazia ane Judarü yo Beth-shemesh ching miro shoruachih.

¹² Juda ju Israelnü kuk; mihbüm abannü thüyam lim alihde tso.

¹³ Israel kiulongthsüpuh Jehoashnü Ahazia tsührü Joash tsührü Juda kiulongthsüpuh Amazia Beth-shemesh ching kuk; api Jirusalem ching arü, tüsho apinü Ephraim ripit chingnü amühit ripit khiungde khahnap 400 bande Jirusalem chipi yihkheam.

¹⁴ Apinü suna tüsho shotoyinchi alala, tüsho Atungpuh yam ching kukrukbo tüsho kiulongthsüpuh rahpung yam ching lakhi tüsho aramrübo she lu; jushu api Samaria lim alode yü.

¹⁵ Kheakü Jehoashnü arhimokhibo aningkhi, api sühmüh, tüsho apinü Juda kiulongthsüpuh Amazia kheak thirithsükhi Israel kiulongthsürübo yukhean hüm ching thrüta müla de?

¹⁶ Jehoash nihbuh jipürü lung yap, tüsho Samaria ching Israel kiulongthsürü bolung kiuyukabah.

Juda Kiulongthsüpuh Amazia Shekhi

¹⁷ Israel kiulongthsüpuh Jehoash sheshu, Joash tsührü Juda kiulongthsüpuh Amazia kam 15 lakheah.

¹⁸ Kheakü aningkhi Amazia rhimobo, Juda kiulongthsürübo yukhean hüm ching thrüta müla de?

¹⁹ Arünü Jirusalem ching api azhihde rük thsü, tüsho api Lakish lim yüabah. Tüshe arünü api dunglim Lakish ching yüshih tüsho ju ching api laksah.

²⁰ Arünü api khorabo kheaknü hande arü; api Jirusalem ching nihbuh jipürü lung David kiuto ching kiuyukabah.

²¹ Juda mihtsürü alalanü kam 16 azorü lakhi Azaria lu, tüsho abuh Amazia müthri kiulongthsürü thsüshih.

²² Kiulongthsüpuh Amazia sheabahshu apinü Elath thsülo tüsho ju Juda kilim jihlo.

Israel Kiulongthsüpuh Jeroboam II

²³ Judarü Joash tsührü kiulongthsüpuh Amazia kam thürükheak phüngüpü ching, Israelrü Jehoash tsührü kiulongthsüpuh Jeroboamnü Samaria ching kiulongthsüpü tankih; apinü kam yirükheak khülang kiulongthsü.

²⁴ Apinü Atungpuh miki amütsü rhimo; apinü Israel neak yihbeakshihkhi Nebat tsührü Jeroboam neakbo alala chingnü müchamachih.

²⁵ Gath-hepherrü amükeambuh Amittai tsührü api yamlarü Jona ki Atungpuh Israel Thrünpuhnü asukkhi nangde, apinü Lebo-hamath chingnü Araba keto khiungde Israel aredungyean lulo.

²⁶ Tümüde Israel khide khühde lümthsünükhi Atungpuhnü ngü; judüki Israel rungpü thsüde rhüka lakhi yungsho zuzu, tüsho sheshe aninga mülakheah.

²⁷ Tüshe yinmi bukkhüpnü Israel mung nana bahbah de Atungpuhnü mütha, jumonü apinü Jehoash tsührü Jeroboam khah hode arü khümkhit.

²⁸ Kheakü aningkhi Jeroboam rhimobo, apinü arhimokhi alala, api wu-sühmüh, apinü thirithsükhi, tüsho Judarü yo Damaska le Hamath Israel thsungkheak lulokhi, Israel kiulongthsürübo yukhean hüm ching thrüta müla de?

²⁹ Jeroboam nihbuh jipürü, Israel kiulongthsürü bolung yap; api tsührü Zekarianü api müthri.