2 KIULONG THSÜRÜ 12 - AMÜSÜH HÜM CL Bible (BSI)

Juda Kiulongthsüpuh Joash

¹ Jehu kam thünepü ching, Joashnü kiulongthsüpü tankih; apinü Jirusalem ching kam yirü kiulongthsü. Abe mung ju Beershebarü Zibia lakheah.

² Joashnü api nimungbo alala ching Atungpuh miki alungki rhimo, tümütüsho amükeambuh Jehoiadanü api ki thsangdan.

³ Judüalalashe, achang dangpungbo müthsümünimde alakheah; mihtsürübonü mutuklode laksah-a kingaün tüsho achang dangpung kheak kingaün jih.

⁴ Joashnü amükeamrübo ki tha, “Amüsüh kingaün Atungpuh yam ching lude arükhi sho alala thremukhungang–wühkhe sho tüsho arung kingaün sho Atungpuh yam ching lude arükhi,

⁵ amükeamrübonü ajihrü aban kheaknü leangkhishang; tüsho arünü athsülopü yimkhitkhi yihnüpü ching thüyam asuhloshang.”

⁶ Tüshe kiulongthsüpuh Joash kam mukukheak mahsam thsüde amükeamrübonü thüyam masuhlo.

⁷ Jumonü kiulongthsüpuh Joashnü amükeambuh Jehoiada lung amükeamrü püpürü jibah arü ki tha, “Tümüde nüsanü thüyam masuhlo le? Jumonü kheakü jihchungrü kheaknü sho leangkhia düzo tüshe thüyam asuhlopü ching jihang.”

⁸ Jumonü amükeamrübonü mihtsürübo kilimnü sho müleangkhi yungsho thüyam masuhlopü mulongkhit.

⁹ Judüki amükeambuh Jehoiadanü shotsüm khülang lubah, athrandobe ching akhün yeahshung, tüsho ju kingaün sadam tsülim peang Atungpuh yam ching yüzahpung zo; ayüzah limro aheangbuh amükeambuhnü Atungpuh yam ching lude arükhi sho alala ju ching yuk.

¹⁰ Küyimki arünü shotsüm ching sho hihde angüba, kiulongthsüpuh yo athrütbuh tüsho achangbe amükeambuhnü wutubah Atungpuh yam ching lakhi sho ju khe, tüsho qiuqiu ching rhükdoa lu.

¹¹ Küyimki sho ju khemütsanbanü, arünü sho ju arüngyam rhimo kheahpü mokhitrü kilim jih. Arünü ju Atungpuh yam thsürü kilim jih–sangrhimosorü tüsho athsürü,

¹² lungzünrü tüsho lung-phukrü. Arünü Atungpuh yam asuhlopü thsungkheak sangrhütkhi tüsho azün-lung thulo, tüsho thüyam thsülopü wukhiukyüzahbe alala ching bah.

¹³ Tüshe Atungpuh yam thsungkheaknü shotoyinchi müsühmüra-phuru, mokhobe, phurusük, hulipungpungbo, yungsho suna le shotoyinchi kukrukbo, Atungpuh yam ching lude arükhi shonü jihbah müthsü,

¹⁴ tümüde ju Atungpuhnü asuhlorü rhimorü kilim jih.

¹⁵ Kheaküshe arünü rhimorü kilim jihshihpü mihtsürü khah ching jihkhi kilimnü khemütsankhi yihnüpü müla, tümütüsho arünü thiyuronü rhimo.

¹⁶ Amülim kingaünkhi sho tüsho neak kingaünkhi sho chingnü Atungpuh yam ching lude marüde alakheah; ju amükeamrübo yo.

¹⁷ Ju kim ching Siria kiulongthsüpuhnü Gad bede keochihpü tüsho yankhia lupü wutu. Tüshe küyimki Hazaelnü Jirusalem azhihde awutupü amiro anguhkhea,

¹⁸ kiulongthsüpuh Joashnü api jipürü Jehoshaphat, Jehoram, tüsho Ahazia, Juda kiulongthsürübonü amüsühkhitkhi kukrukbo alala tüsho anihbuh yo amüsüh kukrukbo, Atungpuh rahpung yam tüsho kiulongthsüpuh yam ching lakhi suna alala lu, tüsho harü Siria kiulongthsüpuh Hazael kilim mühah. Judüki Hazael Jirusalem chingnü tsolo.

¹⁹ Kheakü Joash rhimo aningkhi, tüsho apinü arhimokhi alala, Juda kiulongthsürübo yukhean hüm ching thrüta müla de?

²⁰ Api yamlarübo asürübah rük yim, tüsho Silla lim yüki limro ching Millo yam chingnü Joash laksah.

²¹ Shimeath tsührü Jozakar tüsho Shomer tsührü Jehozabad, api yamlarübonü api kinga lungshih, junangde api sheabah. Api nihbuh jipürü lung David kiuto ching kiuyukabah; jushu api tsührü Amazianü api müthri.