2 KIULONG THSÜRÜ 10 - AMÜSÜH HÜM CL Bible (BSI)

Ahab Tsühsoniusobo Laksahkhi

¹ Kheakü Samaria ching Ahab tsührü athrürü 70 lakheah. Jumonü Jehunü kihümbo thrüt tüsho Samaria lim, Jezreel yakzanshuhrübo, azothsürübo, tüsho Ahab tsührü kümrübo kilim yüshihde tha,

² “Tümütüsho nü putungrü tsührübo nü lung lah tüsho nü bukkhüp khoralolungbebo tüsho khorabo, chipi ayünkhi kiuto, tüsho thsühnukbo lah,

³ nü putungrü tsührü shepü tsüdakde mükheahlanü mokhitbah anihbuh abuh kiulongthsü-binkiu kheak binshang, tüsho nü putungrü yamkhün thsungkheak keochihshang.”

⁴ Tüshe arünü khide tre tüsho tha, “ Kheahang, kiulongthsürü mahnenü mukuk; dale küde thsah isanü azhipkhukpü?”

⁵ Jumonü kiulongthsürü yam ching akhualobuh, tüsho kiuto ching kovünor, azothsürü tüsho akümrübonü Jehu kilim thiyu yüshih: “Isa nü yamlarübo ah; nünü tümü thabanü isanü arhimobah. Isanü she kiulongthsürü mükamshih; nünü tümüpürü dükdü ah de lümchonü rhimoang.”

⁶ Judüki apinü arü kilim mahnepü kihüm thrütde tha, “Nüsa I kilim a sho tüsho nüsanü I ki mihyuanipü thsakhamlasho, nüsa putungrü tsührübo ku luang tüsho shido ha kim ching I kilim Jezreel ching arang.” Kheakü kiulongthsüpuh tsührübo, mihtsürü 70 ju kiuto limberübo bukkhüp lade arünü mütrümusu.

⁷ Küyimki kihüm arü khiungkhea, arünü kiulongthsüpuh tsührübo 70 laksah; arünü arü kubo muluk ching yuk tüsho api kilim Jezreel ching mühah.

⁸ Küyimki yunithsürü arübah api ki thakhea, “Arünü kiulongthsüpuh tsührübo ku hande arüdo,” apinü tha, “Ripit limro kheak yapsu khiungde mahne thsüde rhunga yapshang.”

⁹ Jushu yapsu küyimki api wukhiukkhea, apinü zhip tüsho mihtsürü alala ki tha, “Nüsa amülim mükih. Inü I putungpuh azhihde rük thsüdo tüsho api laksah; tüshe shenü ha alala lipkhikhea?

¹⁰ Dale mükheahang, Atungpuhnü Ahab yamkhün dünkheak asukkhi yu tümü she alo ching mayokhi; tümüde apinü tümü ayamlarü Elija hode athakheanü Atungpuhnü rhimodo.”

¹¹ Jumonü Jehunü Jezreel ching Ahab yamkhün aningkhi alala, limberü alala, mükheahachihrübo tüsho amükeamrübo, rhangdung lapü maningshihde laksahkham.

Kiulongthsüpuh Ahazia Buhtsührübo Laksahkhi

¹² Judüki apinü tsahmusu tüsho Samaria lim yü. Limro ching, küyimki api mihnu neakrü binpung Beth-eked ching lakhea,

¹³ Jehunü Juda kiulongthsüpuh buhtsührü shoru tüsho tha, “Nüsa sherü a?” Arünü alo, “Isa Ahazia buhtsührü ah; isa kiulongthsüpuh tsührübo tüsho kiulongthsübe Jezebel tsührübo rhua kheahpü akikheah.”

¹⁴ Apinü tha, “Arübo arhangnü luang.” Arünü arübo arhangnü lu, tüsho arü 42 Beth-eked ching shingkung kinü laksah; apinü arü sheshe maningshih.

Ahab Buhtsührü Aningkhi Alala Laksahkhi

¹⁵ Küyimki api ju chingnü atsokhea, apinü Rekab tsührü Jehonadab anihbuh shorupü arükhi shoru; apinü anihbuh ki salüm jih tüsho api ki tha, “Inü nü kheak thiyuro lakhi nangde nü mulong I kheak thiyuro la shi?” Jehonadabnü alo, “Ju ruk ah.” Jehunü tha, “Ju ruk a sho, nü khah I kilim jihang.” Jumonü apinü anihbuh kilim akhah jih. Jehunü api anihbuh lung khoralolungbe ching bekih.

¹⁶ Apinü tha, “I lung arang, tüsho Atungpuh thsungkheak I mulong jihkhi kheahang.” Junangde ane rukhühnü khoralolungbe ching bin.

¹⁷ Küyimki api Samaria ching arükhea, Atungpuhnü Elija ki asukkhi nangde apinü Ahab buhtsührübo Samaria ching lakhi maningshihde laksahkham.

Baal Kingaünrübo Laksahkhi

¹⁸ Judüki Jehunü mihtsürü alala bemukhung tüsho arü ki tha, “Ahabnü Baal anükhüh tankih; tüshe Jehunü alü thsüde api tankihbah.

¹⁹ Kheakü jumonü Baal wukihrübo alala, api kingaünrü alala, tüsho api amükeamrü alala I ki jimukhungang; sheshe daningshih, tümüde inü Baal ki laksah-a kingaünkhi jihpü ato lah; shepü mülabanü api rhangdung mülashih.” Tüshe Jehu nü Baal kingaünrü laksahpü rük thsüde rhimode alakheah.

²⁰ Jehunü thiyukhüm jih, “Baal ki wüntre jihde amukhung khülang lapü jiang.” Jumonü arünü ju zhiyuk.

²¹ Jehunü Israel alala ching thiyusheak yüshih; Baal kingaünrü alala arü, junangde marürü she mülakheah. Baal arüngyam rhü kheaknü rhü khiungde mümiyi khiungde arünü Baal arüngyam ching yüzah.

²² Apinü amüsüh shungliu aheangbuh ki tha, “Baal kingaünrü alala thsungkheak shungliu hande akhiukang.” Jumonü apinü arü thsungkheak shungliu hande akhiuk.

²³ Jushu Jehunü Rekab tsührü Jehonadab lung Baal arüngyam ching yüzah; apinü Baal kingaünrübo ki tha, “Yimang tüsho kheahang, ha ching nüsa bolung Atungpuh kingaünrü müla, tüshe Baal kingaünrü lang ah.”

²⁴ Judüki arünü laksah-a kingaünpü tüsho taka kingaünpü tankih. Kheakü Jehunü wungdo ching mihtsürü 80 zhipshihde tha, “Inü sherü nüsa khah ching jihchonü, jurü khürü tsokhishihsho api rhangdungnü ajihlobah.”

²⁵ Apinü taka kingaünkhi jihkham akede, Jehunü aheangrü tüsho atorübo ki tha, “Azahang tüsho arübo laksahang; sheshe dütsokhishih.” Jumonü arü nukshangnü arübo laksah. Aheangrü tüsho atorübonü arübo jipkhita bah, tüsho Baal arüngyam alungbe ching yüzah.

²⁶ Arünü Baal arüngyam ching lakhi dungjing hande akhiuk tüsho takabah.

²⁷ Jushu arünü Baal dungjing tüsho arüngyam thsümünim, tüsho khihni khiungde müsümülüpung thsülah.

²⁸ Hanangde Jehunü Baal Israel chingnü dükheakshih.

²⁹ Tüshe Jehunü Nebat tsührü Jeroboam neakbo chingnü murholode, apinü Bethel tüsho Dan ching thsükhi suna moshi nunubo kingaünde Israel neak yihbeakshih.

³⁰ Atungpuhnü Jehu ki tha, “Tümütüsho inü alungki lümkhi nünü tsüde rhimodo, tüsho I mulong ching lakhi alala nangde Ahab yamkhün kheak rhimodo, nü tsührübo lün phüyi khiungde Israel kiulongthsü-binkiu kheak binbah.”

³¹ Tüshe Jehunü Atungpuh Israel Thrünpuh yakzan amulong alalanü kümkangde müyan; apinü Jeroboam neakbo chingnü murholode, apinü Israel neak yihbeakshih.

Jehu Shekhi

³² Ju kim ching Atungpuhnü Israel lomi khikkheampü tankih. Hazaelnü Israel lomi alala ching arü kuk:

³³ Jordan aniakhiuklimnü, Gilead lomi alala, Gadrü, Reubenrü, tüsho Manaserü, Aroer kheaknü, Arnon ayung ki lakhi, Gilead tüsho Bashan khiungde.

³⁴ Kheakü Jehu rhimo aningkhibo, apinü arhimokhi alala, tüsho api wu-sühmüh, Israel kiulongthsürübo yukhean hüm ching thrüta müla de?

³⁵ Jumonü Jehu nihbuh jipürü lung yap, tüsho arünü api Samaria ching kiuyukabah. Api tsührü Jehoahaznü api müthri.

³⁶ Jehunü Israel kurungkheak Samaria ching kiulong thsükhi kim ju kam mukukheak tizheah lakheah.