2 KIULONG THSÜRÜ 1 - AMÜSÜH HÜM CL Bible (BSI)

Ahazia Kiulongthsüpuh tüsho Elija

¹ Ahab she dunglim, Moabnü Israel azhih.

² Ahazia ju Samaria ching api yam achangbe khiungshak yamkhuh kheaknü ayokhi, tüsho yuria yap; jumonü apinü yunithsürü ki thaa yüshih, “Yüang, I yurikhi chingnü anguba shi yungnü Ekron thrünpuh, Baal-zebub ki keoang.”

³ Tüshe Atungpuh yunirünü Tishbirü Elija ki tha, “Asürang, Samaria kiulongthsüpuh yunithsürübo shorupü yüang, tüsho arü ki thaang, ‘Israel ching Thrünpuh mülamonü nüsa Ekron thrünpuh, Baal-zebub ki keopü yücho de?’

⁴ Kheakü jumonü Atungpuhnü ha thachoh, ‘Nü yükihkhi yapkiu kheaknü nü maki, tüshe tsükjide nü ashebah.’ ” Jumonü Elijanü tsoabah.

⁵ Yunithsürübo kiulongthsüpuh kilim alode arübah apinü arü ki tha, “Tümüde nüsa alode arükhea?”

⁶ Arünü api ki alo, “Mihtsürü khülang isa shorupü arübah isa ki tha, ‘Nüsa thiyikhi kiulongthsüpuh kilim alode yüang, tüsho api ki thaang: Atungpuhnü ha thachoh: Israel ching Thrünpuh mülamonü nüsa Ekron thrünpuh, Baal-zebub ki keopü yüshihcho de? Jumonü nü yükihkhi yapkiu kheaknü nü maki, tüshe tsükjide ashebah.’”

⁷ Apinü arü ki tha, “Nüsa shorupü arübah hadürü nüsa ki thabuh ju küdürü mihtsürü a?”

⁸ Arünü api ki alo, “Api ju shihnam khim yihkhi mihtsürü tüsho achim yande shihküp rümkihlah.” Apinü tha, “Ju Tishbirü Elija ah.”

⁹ Judüki kiulongthsüpuhnü api kilim thünim yo wühkenorü lung api mihtsürü 50 yüshih. Apinü awung mujuk kheak binde alakhi Elija kilim wutu tüsho api ki tha, “O Thrünpuh mihtsürü, kiulongthsüpuhnü thachoh, ‘ Akiang.’”

¹⁰ Tüshe Elijanü thünim yo wühkenobuh ki alo, “I Thrünpuh mihtsürü a sho, yinmi chingnü akibah nü tüsho nü mihtsürü 50 aniuabahang.” Judüki yinmi chingnü mo aki, tüsho api le api mihtsürü 50 aniuabah.

¹¹ Kheaküshe kiulongthsüpuhnü api kilim püpü thünim yo wühkenorü lung api mihtsürü 50 yüshih. Apinü wutu tüsho api ki tha, “O Thrünpuh mihtsürü, ha kiulongthsüpuh yukhüm ah: Nahde akiang!”

¹² Tüshe Elijanü arü ki alo, “I Thrünpuh mihtsürü a sho, yinmi chingnü mo akibah nü tüsho nü mihtsürü 50 aniuabahang.” Judüki Thrünpuh mo aki, tüsho api le api mihtsürü 50 aniuabah.

¹³ Kheaküshe kiulongthsüpuhnü asampü thünim yo wühkenorü lung api mihtsürü 50 yüshih. Junangde asampü thünim yo wühkenobuhnü wutu, tüsho arübah Elija miki khukning, tüsho api ki mushu, “O Thrünpuh mihtsürü, muzhobah I rhangdung tüsho harü nü yamlarübo 50 rhangdung ha nü miki shoto kamshang.

¹⁴ Kheahang, yinmi chingnü mo aki tüsho akhuhlim thünim yo wühkenorü mahne lung ane mihtsürü thünimbo aniuabah; tüshe kheakü I rhangdung nü miki shoto kamshang.”

¹⁵ Judüki A TUN GPU H yunirünü Elija ki tha, “Api lung yükiang; api ki dütre.” Jumonü apinü tsahmusu tüsho api lung kiulongthsüpuh kilim yüki,

¹⁶ tüsho api ki tha, “Atungpuhnü ha thachoh: Tümütüsho nünü Ekron thrünpuh Baal-zebub ki keokhishihpü yunithsürübo yüshih, ju api ki keokhipü Israel ching Thrünpuh mülamonü a de? Jumonü nü yükihkhi yapkiu kheaknü nü maki, tüshe tsükjide nü ashebah.”

¹⁷ Jumonü Elija hode asukkhi Atungpuh yu yande api sheabah. Judarü Jehoshaphat tsührü kiulongthsüpuh Jehoram kiulongthsü kam mahnepü ching, aniurü Jehoramnü api müthri, tümütüsho Ahazia tsührü athrürü mülade alakheah.

¹⁸ Kheakü Ahazianü rhimoa lakhibo Israel kiulongthsürü yukhean hüm ching thrüta müla de?