2 JOHAN 1 - AMÜSÜH HÜM CL Bible (BSI)

¹ Azothsürü kilimnü, I tüsho thiyuro mükheahrü alala thiyuro ching muzhokhi amokhitkhi liberü tüsho anihbe tsührübo kilim–

² isa kheak lakhi tüsho lünnü isa kheak lapü lakhi thiyuro dünkheaknü:

³ Abuh Thrünpuh tüsho Abuh tsührü Jisu Khrista kilimnü, thiyuro tüsho amuzho ching, mihmuzho, mihmüthsüm, tüsho mungtsü isa lung labah.

Thiyuro tüsho Amuzho

⁴ Abuhnü isa ki thiyukhüm jihkhi nangde, nü tsührü khürü thiyuro ching yande ngübah I khide asühdo.

⁵ Amuzho alibe, inü nüsa kilim thiyuzüng aso thrütkhinü yung, tüshe atankih chingnü isa khülangnü khülang muzhoachihpü lakhinü kheakü inü nüsa ki mushuchoh.

⁶ Tüsho isanü api yuzüng yankhi ha amuzho ah; nüsanü atankih chingnü sobah amuzho lakhi ha thiyuzüng ah.

⁷ Jisu Khrista mihtsürü kambah arükhi müleangkhipü lakhi mihtsürübo, mülapyukrü ahihdo alomi ching wukhiukdo; hadürü ju mülapyukrü tüsho Khrista azhihrü ah.

⁸ Nüsanü arhimokhi dün müdükheakde nüsa thsambah suhdahde angüpü kurhangang.

⁹ Shepünü akhuhlimnü yücho tüsho Khrista kingaün-yakzan ching mülachonü Thrünpuh müla; shepünü kingaünyakzan ching lachonü Abuh tüsho atsührü chido lah.

¹⁰ Khürü nüsa kilim arübah ha kingaün-yakzan hande marüsho, api thüyam ching dübeyuk yungsho api ki salüm düthsü;

¹¹ tümüde shepünü api asühde beyukchonü api mihbukmuyuk rhimo lung shihcham luchoh.

Akheam Yubo

¹² Inü nüsa kilim hihde athrütpü lalashe, inü hüm tüsho doke mahorinü, tüshe inü arübah nüsa shorupü tüsho nüsa ki mironü miro asukachihpü mulonglam lah.

¹³ Nüsanü amuzhokhi nüsa achi tsührübonü Ha thrütbuh borü kheyukrü ki thachoh. Nüsa kilim salüm jihchoh.