1 TIMOTHI 4 - AMÜSÜH HÜM CL Bible (BSI)

Arükchih Thsangyurübo

¹ Kheakü ashulim kimbo ching mebo mülapyukkhi tüsho amünean yukhümbo anide akin chingnü khürü chamkhide atsobah de Menü thachoh.

² Hadürü thsangyukhibo ju yinchi takmürümkhinü athsahkhi nangde arü lümkhibo shekhirü akeangyu tharü hode bushihchoh.

³ Arünü mihtsürübo yamkhün thsüpü zhipdochoh tüsho akinrü le thiyuro mükheahrünü makshe jihde aleangkhishihpü Thrünpuhnü athrünjihkhi tsühyungbe khürü mütsühpü thiyukhüm jihchoh.

⁴ Tümüde Thrünpuhnü athrünkhi lüpdükhi atsü lah, tüsho makshe jihde leangkhisho tümü she abahyukbe müla;

⁵ tümütüsho ju Thrünpuh yu tüsho tamkhüntamnü hode tsangkhitdo.

Jisu Khrista Tankihrü Atsü

⁶ Nünü harü thsangdankhibo keoniorübo ki thasho, nü ju thiyuro akin tüsho nünü anide alakhi thsangyukhi atsü ching bezokhi, Jisu Khrista tankihrü atsü thsübah.

⁷ Amükinrü tüsho khakhih yukheanbo chingnü chamkhiang; akin lim nü küdah thsüde mürangang;

⁸ pangnü mürangkhi ju alü khürü lah, tüshe akinnü mürangkhi ju limro alala ching lah, tümütüsho junü kheakü lakhi rhangdung tüsho arüpü lakhi rhangdung alokhikhibo ramlochoh.

⁹ Athakhi atsütsü tüsho abümnü aleangkhibe athülün lah.

¹⁰ Isanü mürangde rhimodo, tümütüsho isanü akinrü mihtsürü alala khümkhitrü, arhang Thrünpuh kheak isa mulonglam zo.

¹¹ Harübo thiyukhüm jihang tüsho thsangyuang.

¹² Nü athunuchoki shenü she mükhemükim düthsüshih, tüshe akinrübo ki thiyu thakhi, rhimokhi, amuzho, akin tüsho atsangkhitkhi ching amütsan laang.

¹³ I marüyi khiungde, boto amüsühyu khekhi tüsho thsangyuthsangrapü le thsangyupü ching nü kim jihang tüsho mürangang.

¹⁴ Azothsürübonü nü kheak arü khah nimde müchityu thachoki nü kilim jihkhi thsambah dübahyuk.

¹⁵ Harü rhimobo shuhmülanga jihde külüpang, junangde nü jakihkhi alalanü angübah.

¹⁶ Nü rhangdung tüsho nü thsangyukhi aheangang. Ju kheak ramloang, junangde ju rhimokhi hode nü tüsho nü ki anirü chido khümkhitbah.