1 TIMOTHI 1 - AMÜSÜH HÜM CL Bible (BSI)

¹ Isa khümkhitbuh Thrünpuh tüsho isa mulonglam Jisu Khrista yukhüm hode Jisu Khrista amüsühthsangyurü Paul kilimnü,

² Akin ching thiyuro I tsührü Timothi kilim: Abuh Thrünpuh tüsho isa khümkhitbuh Jisu Khristanü mihmuzho, mihmüthsüm tüsho mungtsü jihshang.

Arükchih Thsangyukhi dünkheak

³ I Macedonia lim yüde alachoki nü ki tuthsukkhi nangde inü nü Efisia ching lashihnelah. Ju ching mihtsürü khürünü arükchih kingaünyakzan thsangyuchoh tüsho nünü arü tukloshihpü thiyukhüm jihbeah,

⁴ yungsho arünü mümütsankhi yukhean tüsho arün mülakhi lünkheyukheanbo ching mulong müjihbeah. Harünü akin hode alakhi Thrünpuh lümkhi yungde alanaji akhiukshihchoh.

⁵ Ha thiyukhüm jihkhi mükkheahkih ju mulong amüsüh, lümkhi atsü tüsho düküngde akinkhi chingnü arükhi amuzho lah.

⁶ Khürü a harü chingnü rholobah keangthapü ching tsodo.

⁷ Arünü yakzan thsangyurü thsüpü künlah, tüshe arünü tümü dünkheak thacho yungsho tümü mütsande asukchonü mümükheah.

⁸ Kheakü khürünü alungkinü ahorisho yakzan ju atsü ah de isanü mükheahlah,

⁹ junangde ha anikhitpü ju, yakzan ha alungkirü thsungkheak müthsü tüshe yakzan thsümünimrü le mihyumanirü, amükinrü le aneakrü, mümüsühkhi le amüneankhi, berübuhrü laksahrü, mihkhukrü,

¹⁰ müzammüram mihtsürü, yüliyürarü, bekhide-atsorü, akeangyu tharü, arükchih thiyumütsan thsürü tüsho kingaün-yakzan alungki azhihrü thsungkheak ah.

¹¹ Haju I ki thiyikhi müngühmühi Thrünpuh müretahkhi thiyusheakatsü yande lah.

Thrünpuh Mihmüthsüm thsungkheak Mungshi

¹² Ha thsungkheak I kilim sühmüh jihbuh isa Atungpuh Jisu Khrista kilim inü makshe jihchoh, tümütüsho ha tankihpü ching I yüzahshihde apinü I thiyuro lakhi khejih.

¹³ Adüso inü api athruajide, thsümüchide, tüsho mükhemükimde lalashe, inü mümükheahde tüsho mükinyide arhimokhi hode I ki mihmüthsüm huh.

¹⁴ Jisu Khrista ching akin tüsho amuzho kheak khiode Atungpuh amüthsüm I kheak suhdahde dungkihjih.

¹⁵ Aneakrü khümkhitpü Jisu Khrista ha lomi ching arükheah de athakhi atsütsü tüsho dükde aleangkhibe athülün lah, tüsho arü kheaknü I amütsübe ah;

¹⁶ tüshe I aneakrü bolung amütsübe kheaknü, api kheak lün rhangdung thsungkheak kinpü larü ki amütsan thsungkheak Jisu Khrista azhihayihkhi huhpü thsüde inü ha mihmüthsüm leangkhi.

¹⁷ Amüshebuh, amüngübuh, lünbo Kiulongthsürü, Thrünpuh lang lünnü lün wüntre lashang tüsho müretahkhi thsang. Amen.

¹⁸ I tsührü Timothi, akhuhlim nü dünkheak müchitkhi yande, jurü hode nünü tsüde keochihpü thsüde ha thsangdan nü kilim jihchoh,

¹⁹ akin düküngang tüsho lümkhi müsühde zoang. Mihtsürü khürünü lümkhi bahyukkhinü arü akin thsümünimdo.

²⁰ Arü bolung mathruajipü anikhitshihpü thsüde inü amünean kilim jihkhi ju Mymenia tüsho Alexander ah.