1 TESALONIKA 3 - AMÜSÜH HÜM CL Bible (BSI)

¹ Jumonü küyimki isanü marümkhukde akamkhea, isa zangrü Athen ching lapü mulongkhit,

² tüsho isanü isa keoniorü tüsho Khrista thiyusheak-atsü ching Thrünpuh yamlarü Timothi nüsa akin düküngshihpü tüsho atuthsukpü thiyi,

³ junangde sheshe harü thsünübo hode matrütshih. Ha isa shihcham labeah de nüsa küdah thsüde mükheahlah.

⁴ Küyimki nüsa lung isa lakhea, isa thsümüchibah de atannü thajung; nüsanü mükheahde ha dünjido.

⁵ Ha dünkheaknü, küyimki inü marümkhukde akamkhea, rükakirünü nüsa rükakide tüsho isa khisahkhi akeangkeang kambah de lümbah inü nüsa akin mükheahpü thiyikheah.

⁶ Tüshe kheakü nüsa kilimnü nüsa akin tüsho amuzho yusheak atsü lubah Timothi isa kilim arü tüsho kamruhroro nüsanü isa muzhode lümkhitchoh tüsho isanü nüsa shorupü mulong dukkhi nangde isa shorupü künlah de thiyusheak jihdo.

⁷ Jumonü keoniorübo, isa lümthsünü tüsho thsümüchi alala ching, nüsa akin hode nüsa dünkheak isa mulong shukheamdo;

⁸ tümüde kheakü isa lah, tümütüsho nüsanü Atungpuh kheak düküngde zhiplah.

⁹ Nüsa dünkheak isanü Thrünpuh miki asühde alümkhi alala thsungkheak isanü Thrünpuh miki makshe jihkhi tümü rhimokhukba?

¹⁰ Isanü nüsa shorubah nüsa akin ching musuhdahkhi jihpü azhing ayin isanü khide mushude tamkhüntamnüchoh.

¹¹ Kheakü isa Abuh Thrünpuh, tüsho isa Atungpuh Jisu küdah thsüde, nüsa kilim isa limro huhshang;

¹² tüsho isanü nüsa ki rhimokhi nangde, khülangnü khülang tüsho mihtsürü alala ki muzhoachihpü ching Atungpuhnü nüsa alü rünkihde kamshang,

¹³ junangde isa Atungpuh Jisu lung api yo amüsührü alala arüchoki, isa Abuh Thrünpuh miki, amüsüh ching areak mülapü thsüde apinü nüsa mulong düküngshihbah.