1 SAMUEL 8 - AMÜSÜH HÜM CL Bible (BSI)

Israelnü Kiulongthsürü Kheangkhi

¹ Küyimki Samuel ashinbuhrü kamkhea, apinü atsührübo Israel kurungkheak mahkhaprübo kamshih.

² Atsührü adüjibuh mung ju Joel, mahnepü mung Abija; ane ju Beersheba ching mahkhaprü lakheah.

³ Tütüshe atsührübonü api ru müyan, tüshe alü thsüpü lim anguhabah; arünü buknim lu tüsho thiyuro thsungphülap.

⁴ Judüki Israel azothsürü alala mukhung tüsho Rama ching Samuel kilim arü,

⁵ tüsho api ki tha, “Nü ashinbuhrü ah tüsho nü tsührübonü nü ru müyan; jumonü mührü trük nangde isa kurungkheak yakzan shuhshihpü kiulongthsürü khülang mokhitjang.”

⁶ Tüshe arünü, “Isa kurungkheak yakzan shuhshihpü isa kilim kiulongthsürü khülang jihang” de athachoki Samuel masühde kam. Jumonü Samuelnü Atungpuh ki tamkhüntamnü,

⁷ tüsho Atungpuhnü Samuel ki tha, “ Mihtsürübonü nü ki thakhi arü düsheak alala ching anijang; tümüde arünü nü mübahyuk, tüshe arü kurungkheak kiulongthsürü zokhi hode I bahyukdo.

⁸ Inü arü Ijip chingnü bekhitkhi nimungnü khihni khiungde I bahyukde tüsho püpürü thrünpuhbo tankihkhi nangde, arünü nü kheak rhimochoh.

⁹ Jumonü kheakü, arü düsheak anijang; nünü lang arü ki düshihde dühdang, tüsho arü kurungkheak yakzan shuhpü lakhi kiulongthsüpuh limrobo arü ki huhang.”

¹⁰ Jumonü Samuelnü Atungpuh yu alala api ki kiulongthsürü khülang kheangrü mihtsürübo ki tha.

¹¹ Apinü tha, “ Harü ha nüsa kurungkheak yakzan shuhpü lakhi kiulongthsüpuhnü arhimobe limrobo ah: apinü nüsa tsührübo lubah api khora-lolungbe tüsho khora beshihbah, tüsho api khora-lolungbe müngüh alihshihbah;

¹² tüsho apinü chithürü tüsho thünim kurungkheak wühkenorü mokhitbah, tüsho khürü api lu phünpü tüsho yimlushihpü, tüsho keochihbe tsungthsüh tüsho khora-lolungbe kukrukbo thsüshihpü mokhitbah.

¹³ Apinü nüsa tsührü aliberübo rhümthüneabe mujurü, dükihthürarü tüsho yikhap nungrü thsüpü lubah.

¹⁴ Apinü nüsa lubo, kurungasolu tüsho oliv sangaso yi atsüdakbo lua api bukkhüp rhimorübo kilim jihbah.

¹⁵ Apinü nüsa hi tüsho kurungasobo chingnü thürü shihcham lubah api yo atorübo tüsho ayamlarübo kilim jihbah.

¹⁶ Apinü nüsa yamlabuhrü tüsho yamlaberü lubah, tüsho nüsa akam-shiwüh le donki atsüdakbebo lubah tüsho api rhimo thsüshibah.

¹⁷ Apinü nüsa mihnubo chingnü thürü shihcham lubah, tüsho nüsa api bukkhüp azhorü thsübah.

¹⁸ Tüsho ju nimung ching nüsanü nüsa kiulongthsürü mokhitkhi dünkheak nüsanü azhibah; tüshe Atungpuhnü ju nimung nüsa ki malojih.”

¹⁹ Tüshe mihtsürübonü Samuel yu anipü reanglo; arünü tha, “Yung! tüshe isa kurungkheak kiulongthsürü khülang zopü isanü mulongkhitdo,

²⁰ junangde isa she mührü trük nangde alabah, tüsho isa kiulongthsüpuhnü isa yakzan shuhbah tüsho isa müngüh yübah keochihbah.”

²¹ Küyimki Samuelnü mihtsürübonü athakhi yu alala sokhea, apinü Atungpuh ki thalo.

²² Atungpuhnü Samuel ki tha, “ Arü yu aniang tüsho arü kurungkheak kiulongthsürü khülang zojang.” Samuelnü Israel mihtsürü ki tha, “Nüsa alala thüyam lim alode yüang.”