1 SAMUEL 5 - AMÜSÜH HÜM CL Bible (BSI)

Filistiarü bolung Tangzüng Sangdan

¹ Küyimki Filistiarünü Thrünpuh sangdan yankhia lukhea, arünü ju Ebenezer chingnü Ashdod ching lubah arü;

² jushu Filistiarünü Thrünpuh sangdan lubah Dagon yam ching arü tüsho Dagon rheang ki zo.

³ Küyimki Ashdod mihtsürü ashidopü mükikde asürükhea, ju ching Dagon ju Atungpuh sangdan miki mühüplimnü alo kheak lunga yapa lakheah. Jumonü arünü Dagon ju lubah api zopung ching zolo.

⁴ Tüshe küyimki arü ashido yapsu mükikde asürükhea Dagon ju kheaküshe Atungpuh sangdan miki mühüplimnü alo kheak lunga yapa lakheah, tüsho Dagon ku le akhah ane chido zhaka ripit limro yap; Dagon pang phulung lang aninga lakheah.

⁵ Hamonü Dagon amükeamrübo tüsho Dagon yam ching yüzahrü alalanü Ashdod ching lakhi Dagon ripit limro kheak khihni khiungde müthrüm.

⁶ Atungpuh khah Ashdod mihtsürü kheak mülangde alakheah, tüsho apinü arü thsümüchi tüsho mü akhiukshih.

⁷ Tüsho küyimki Ashdod ching larübonü adünjikhibo ngükhea, arünü tha, “Israel Thrünpuh sangdan isa lung muzobeah; tümüde api khah isa le isa thrünpuh Dagon kheak mülanglah.”

⁸ Jumonü arünü yunithsürü thiyia yüshih tüsho Filistia kiulongthsürü phüngü bemukhung, tüsho tha, “Israel Thrünpuh sangdan ha isanü küde athsüba?” Gath ching larübonü alo, “ Thrünpuh sangdan ju isa kilim arüshang.” Jumonü arünü Israel Thrünpuh sangdan Gath lim hande yüshih.

⁹ Tüshe arünü ju Gath lim hanbah arüshu Atungpuh khah kiuto kheak azhihde zukleangnü treshih; apinü kiuto ching larü azürü tüsho azorü alala kheak mü akhiukshih.

¹⁰ Jumonü arünü Israel Thrünpuh sangdan Ekron lim yüshih. Tüshe küyimki Thrünpuh sangdan Ekron lim arükhea, Ekron mihtsürübonü zhimusu, “ Tümüde arünü Israel Thrünpuh sangdan isa le isa mihtsürü laksahshihpü isa kilim hande arükhea?”

¹¹ Jumonü arünü thiyiloa yüshihbah Filistia kiulongthsürübo mukhungshih, tüsho tha, “Israel Thrünpuh sangdan dükhea tsoshang, tüsho ju azopung ching zoloshang, junangde isa le isa mihtsürü mülaksah.” Tümüde judüki kiuto ching zukleangnü ashekhi lakheah. Ju ching Thrünpuh khah mülangde alakheah;

¹² müshede alarübo mü akhiukshih tüsho kiuto ching khunganimkhi thüning khiungde yükih.