1 SAMUEL 4 - AMÜSÜH HÜM CL Bible (BSI)

¹ Tüsho Samuelnü athakhi Israel alala kilim arü. Judüki Filistiarünü Israel bede keochihpü thsakhambah alakheah, tüsho Israelnü arü bede keochihpü tsahmusude yü; arü Ebenezer ching bin, tüsho Filistiarü Aphek ching bin.

Tangzüng Sangdan Yankhikhi

² Filistiarünü shihkhin thsübah Israel azhih, tüsho küyimki shoruachihbah keochihkhea, Filistiarünü Israel kuk, arünü keochihpung ching mihtsürü 4000 bande laksah.

³ Küyimki thirithsürübo binkheampung ching arükhea, Israel azothsürübonü tha, “ Tümüde Atungpuhnü khihni isa Filistiarü müngüh tsomüzütshihkhea? Isanü Shilo chingnü Atungpuh tangzüng sangdan ha ching hande aranü, junangde api isa bolung arübah tüsho isa riri khah chingnü akhümkhitbah.”

⁴ Jumonü arünü mihtsürübo Shilo ching yüshih tüsho cherubim dükeak binkhi Wuto Atungpuh tangzüng sangdan ju chingnü lubah arü. Eli tsührü mahne, Hophni tüsho Phinehas Atungpuh tangzüng sangdan lung arü.

⁵ Küyimki Atungpuh tangzüng sangdan binkheampung ching arükhea, Israel alalanü jingjing alande aho, junangde alomi ajan.

⁶ Küyimki Filistiarünü ahokhi düsheak sokhea, arünü tha, “Ibrirü binkheampung ching tode ahokhi ha amütsan tümü a?” Küyimki Atungpuh tangzüng sangdan binkheampung ching arüdo de arünü amükheahkhea,

⁷ Filistiarünü tre; tümüde arünü tha, “ Thrünpuh binkheampung ching arüdo.” Kheaküshe arünü tha, “Isa are! Tümütüsho tümü lang she ha ruk püpüki müdünji.

⁸ Isa are! Harü wuto thrünpuhbo khah chingnü shenü isa bekhitkhukba? Harü thrünpuhbonü sunglo ching Ijiprü arüm aphuaphunü asheshihkheah.

⁹ Mulong toang, tüsho athrüpungrü thsang, O Filistiarü, junangde arübo nüsa ki lakhi nangde nüsa Ibrirü ki azhorü mükam; athrüpungrü thsang tüsho keochihang.”

¹⁰ Jumonü Filistiarünü keochih; arünü Israelrü kuk, tüsho arübo nihbuh yam lim shande tso. Judüki khide muliuhde laksah, tümüde Israel bonungrü jingnü atsahrü 3000 keamabah.

¹¹ Thrünpuh sangdan yankhia lu; tüsho Eli tsührü mahne, Hophni tüsho Phinehas laksah.

Eli Shekhi

¹² Benjamin mihtsürü khülang ju nimung akhimmihbo thorüpa tüsho aku kheak alo kihbah, keochihpung chingnü alihde Shilo ching arü.

¹³ Küyimki api khiungkhea, Elinü limro ching abinkiu kheak binbah kheahde alakheah, tümüde Thrünpuh sangdan dünkheaknü api mulong ajan. Küyimki mihtsürü junü kiuto ching azahbah thiyusheak thakheanü, kiuto ching larü alalanü zhikhi.

¹⁴ Küyimki Elinü azhikhi düsheak sokhea, apinü tha, “ Ha alankhi ha tümü a?” Judüki mihtsürünü nahde arü tüsho Eli ki tha.

¹⁵ Kheakü Eli kam 98 azorü lakheah tüsho api mükbo tuka lakheah, jumonü apinü müngü.

¹⁶ Mihtsürü junü Eli ki tha, “I kheakü keochihpung chingnü arükheah; I khihni keochihpung chingnü alihde atsokheah.” Apinü tha, “ Tümü thsüa la, I tsah-a?”

¹⁷ Yunithsürünü alo, “Filistiarü müngüh Israel tsodo, tüsho bonungrü bolung she muliuhde laksahdo, nü tsührü mahne, Hophni tüsho Phinehas she shedo, tüsho Thrünpuh sangdan yankhia ludo.”

¹⁸ Küyimki apinü Thrünpuh sangdan thakhea, abinkiu kheak adunglimnü ayokhia chipimurung ki keam; tüsho ahung athsungshakbah api sheabah, tümüde api ashinbuhrü tüsho mülangde alakheah. Apinü Israel kam yirü mahkhap.

Phinehas Niube Shekhi

¹⁹ Kheakü atsühmeakbe Phinehas niube mübünkeangde, tsührü zübepü thsüde alakheah. Küyimki alibenü Thrünpuh sangdan yankhia lukhi thiyusheak sokhea, tüsho aniubuh abuh le aniubuh sheabahkhea, alibenü mükhümbah zübede thsünümurhuabah.

²⁰ Alibe ashepü thsüde alachoki, anihbe shorupü arükhi aliberünü tha, “Dütre, tümüde nünü athrürü khülang zübejihdo.” Tüshe anihbenü malo yungsho mani.

²¹ Anihbenü khungarü mung Ikabod de ji, amütsan, “ Müretahkhi Israel kheaknü chamkhido”, tümütüsho Thrünpuh sangdan yankhia luabah tüsho aniubuh abuh le aniubuh ane sheabah.

²² Alibenü tha, “ Müretahkhi Israel kheaknü chamkhido, tümüde Thrünpuh sangdan yankhia ludo.”