1 SAMUEL 3 - AMÜSÜH HÜM CL Bible (BSI)

Atungpuhnü Samuel Jikhi

¹ Kheakü azübuh Samuel Eli bukkhüp Atungpuh tankihde alakheah. Judüki Atungpuh yusheak nükde alakheah; tüsho michihbo mubuyi.

² Judüki Eli ju amük thrimthrimde kambah müngüde, api yam khiungshak ching yapde alakheah;

³ Thrünpuh tsünpung mümütyide alakheah, tüsho Samuel ju Thrünpuh sangdan zopung Atungpuh arüngyam ching yapa lakheah.

⁴ Judüki Atungpuhnü ji, “Samuel! Samuel!” tüsho apinü alo, “I ha ching lah!”

⁵ Jumonü Eli kilim shande yübah tha, “I ha ching lah, tümüde nünü I jikheah.” Tüshe apinü tha, “Inü müji; yaploang.” Jumonü apinü yübah yap.

⁶ Atungpuhnü kheaküshe jilo, “Samuel!” Samuelnü asürübah Eli kilim yü, tüsho tha, “I ha ching lah, tümüde nünü I jikheah.” Tüshe apinü alo, “Inü müji, I tsah-a; yaploang.”

⁷ Kheakü Samuelnü Atungpuh mümükheahyi, tüsho Atungpuh yu api ki muhuhyide alakheah.

⁸ Kheaküshe Atungpuhnü mahsam kipü Samuel ji. Tüsho apinü asürübah Eli kilim yü, tüsho tha, “I ha ching lah, tümüde nünü I jikheah.” Judüki Atungpuhnü azübuh jia lah de Elinü anikhit.

⁹ Jumonü Elinü Samuel ki tha, “Yüang, yapang; tüsho apinü nü jisho, nünü thaang, ‘ Asukang, Atungpuh , tümüde nü yamlarünü anichoh.’” Jumonü Samuelnü yü tüsho api yappung ching yap.

¹⁰ Kheakü Atungpuh ju ching arü zhipbah, akhuhlim nangde ji, “Samuel! Samuel!” Tüsho Samuelnü alo, “ Asukang, tümüde nü yamlarünü anichoh.”

¹¹ Judüki Atungpuhnü Samuel ki tha, “ Kheahang, inü Israel ching tümüanü arhimopü lah tüsho shepünü ju sobanü nükhün ane chido peangbah.

¹² Ju nimung inü Eli yamkhün azhihde athakhi, atankihnü akheam khiungde adünjibah.

¹³ Tümüde apinü amükheahkhi neak dünkheak inü api yamkhün lünnü athsümüchibah de thado, tümütüsho atsührübonü Thrünpuh ki amülim yu tha, tüsho apinü arü müyankhi.

¹⁴ Jumonü Eli yamkhün neak ju laksah-a kingaünde yungsho jihchungchung she lünnü mübahjih de inü Eli yamkhün ki thiyuchihchim.”

¹⁵ Samuelnü ju ching yapsu khiungde yap; jushu apinü A TUN GPU H yam ripit khimshuh. Samuelnü Eli ki michih thapü tre.

¹⁶ Tüshe Elinü Samuel ji tüsho tha, “I tsah-a, Samuel.” Apinü alo, “I ha ching lah.”

¹⁷ Elinü tha, “ Apinü nü ki tümü thakhea? Ju I kheaknü dümüyim. Apinü nü ki asukkhi tümükhüh I kheak müyimsho Thrünpuhnü nü kheak rhimoshang tüsho alü she rhimoshang.”

¹⁸ Jumonü Samuelnü api ki alala tha tüsho api ki tümü she mümüyim. Tüsho apinü tha, “ Ha Atungpuh lah; apinü atsükhi thsüshang.”

¹⁹ Samuel zode akamchoki, Atungpuh api lung lakheah tüsho api yu tümü lang she alo kheak mayokhishih.

²⁰ Tüsho Dan chingnü Beersheba khiungde Samuel ju Atungpuh thiyuro wukihrü ah de Israel alalanü mükheah.

²¹ Mutuklode Atungpuh Shilo ching akhiuka huh, tüsho Atungpuh yu hode Samuel ki api akhiuka huh.