1 SAMUEL 26 - AMÜSÜH HÜM CL Bible (BSI)

Kheaküshe Davidnü Saul Rhangdung Khümkhitkhi

¹ Judüki Ziphrü Gibea ching arübah Saul ki tha, “David thsü Jeshimon thripkhüh limpeang, Hakila wung ching jiklah.”

² Jumonü Saulnü asürü tüsho David yimpü amokhitkhi Israel 3000 bebah Ziph sunglo lim yüki.

³ Saul a Jeshimon thripkhüh limpeang limro yean, Hakila wung ching binkheam. Tüshe David a sunglo ching la. Küyimki apinü adunglim Saul arüa lah de asokhea,

⁴ Davidnü thirirhurü yüshih, tüsho Saul ju arünü khiunga lah de mükheah.

⁵ Judüki Davidnü tsahmusu tüsho Saul binpung ching arü; tüsho Saul le Ner tsührü Abner, api bonungrü limthobuh ane yappung Davidnü ngü. Bonungrünü binkheampung mühide abinchoki Saul a binkheampung phulung ching yapa lakheah.

⁶ Judüki Davidnü Hitrü Ahimelek tüsho Zeru tsührü Joab akhiung Abishai ki tha, “Binkheampung ching Saul kilim shepü I lung akiba?” Abishainü tha, “I nü lung yükibah.”

⁷ Jumonü David tüsho Abishai ane azhing ching bonungrü kilim yü; ju ching Saul ju binpung phulung ching aku ki thsüh shunga zobah yapa lakheah; tüsho Abner le bonungrü api mükamde yap.

⁸ Abishainü David ki tha, “ Khihni nü riri Thrünpuhnü nü khah ching jihdo; jumonü kheakü inü api thsühnü alo kheak khülang kinü kheankihanü; inü api mahne ki mükhean.”

⁹ Tüshe Davidnü Abishai ki tha, “ Api düthsümünim; tümüde khürünü Atungpuhnü mujudemokhitkhi kheak azhihde khah chungbah amülim mülabea de?”

¹⁰ Davidnü tha, “Atungpuh lale, Atungpuhnü api kheana lungshihbah; yungsho api nimung ashepü arübah; yungsho api thirithsü ching yükibah tüsho adükheakbah.

¹¹ Atungpuhnü mujude-mokhitkhi kheak azhihde I khah chungpü Atungpuhnü danlolah; tüshe kheakü aku ki lakhi thsüh tüsho keluh luang, tüsho ike tsoanü.”

¹² Jumonü Davidnü Saul ku ki lakhi thsüh tüsho keluh lubah ane tsoabah. Shenü she ju müngü, yungsho mümükheah, yungsho sheshe masürü; tümüde arübo yapshea lakheah, tümütüsho zhimsah-a ayappü Atungpuhnü arü kheak yükihshih.

¹³ Jushu Davidnü püpü thrip yübah arü dükeak ashang zahde limshu ching awung mujuk kheak zhip.

¹⁴ Davidnü bonungrü tüsho Ner tsührü Abner ki jide tha, “ Abner! nünü maloba de?” Judüki Abnernü alo, “ Kiulongthsüpuh jicho ju nü she a?”

¹⁵ Davidnü Abner ki tha, “Nü mihtsürü khülang yung de? Israel ching she nü ruk la? Dale tümü thsükhi nünü nü tungpuh kiulongthsüpuh müneak le? Tümütüsho nü tungpuh kiulongthsüpuh thsümünimpü mihtsürü khülang arükheah.

¹⁶ Nünü arhimokhi ha atsü yung. Atungpuh mung hode nü ashepü thülünlah de thiyuchihchimchoh, tümütüsho nünü nü tungpuh, Atungpuhnü mujude-mokhitkhi müneak. Kheakü kheahang, kiulongthsüpuh thsüh, yungsho aku ki lakhi keluh küching la?”

¹⁷ Saulnü David düsheak mütsan tüsho tha, “I tsührü David, ha nü düsheak a de?” Davidnü alo, “O kiulongthsüpuh, I tungpuh, ha I düsheak ah.”

¹⁸ Tüsho apinü thalo, “ Tümü thsükhi I tungpuhnü api yamlarü müshamcho? Inü tümü rhimoa la? I kheak tümü amülim la?

¹⁹ Jumonü kheakü I tungpuh kiulongthsüpuhnü api yamlarü yu sojang. I kheak azhihde bukakhiukkhi ju Atungpuh hode thsüa lasho, apinü kingaün leangkhishang; tüshe ha mihtsürünü thsüa lasho, Atungpuh muthrumünean arü kheak yükihshang. Tümüde arünü khihni Atungpuh yamrüplurüp I shihcham chingnü yankhita bahde tha, ‘Yüang, püpürü thrünpuhbo tankihang.’

²⁰ Jumonü kheakü Atungpuh kheaknü limshukhi ching, I thiyih alo kheak dayokhishih; tümüde Israel kiulongthsüpuh ju khürünü awung ching mütüm wuhnu jimkhi nangde thüle khülang yimde arüa lah.”

²¹ Judüki Saulnü tha, “Inü amülim rhimodo; I tsührü David alode arang, tümüde kheaküa inü nü müthsümünim, tümütüsho khihni I rhangdung nü miki shoto lakheah; I bünkeangbünrudo, tüsho amülim ato khülang thsüdo.”

²² Davidnü alo, “O kiulongthsüpuh, ha ching thsüh lah! Nü yo athrününgtsüng khülang arüshihbah lushang.

²³ Atungpuhnü nihbuh thiyuro-lungki tüsho khiukde alakhi aban thsambah jihchoh; tümüde khihni Atungpuhnü nü I khah ching jih, tüshe Atungpuhnü mujude-mokhitkhi kheak azhihde inü I khah muchung.

²⁴ Nü rhangdung ju khihni I mük ki shoto lakheah, jumonü I rhangdung Atungpuh mük ki shoto lashang, tüsho apinü I thsümütsü chingnü bekhitshang.”

²⁵ Judüki Saulnü David ki tha, “I tsührü David, nü müngühmühi thsang! Nünü arhimokhi aban ching akuk ngübah.” Jumonü David a nihbuh limro yü, tüsho Saul api lapung lim alode yü.