1 SAMUEL 25 - AMÜSÜH HÜM CL Bible (BSI)

Samuel Shekhi

¹ Kheakü Samuel sheabah; tüsho Israel alala mukhungbah api mi trip. Arünü api Rama ching lakhi anihbuh yam ching kiuyukabah. Judüki Davidnü asürübah Paran sunglo lim yüki.

David tüsho Abigail

² Ju ching nihbuh lakhit-kukruk Karmel ching larü mihtsürü khülang Maon ching lakheah. Mihtsürü ju khide alarü lakheah; api namfimihnu 3000 tüsho mihnu 1000 lakheah. Api Karmel ching mihnu nam nipde alakheah.

³ Kheakü mihtsürü mung ju Nabal, tüsho aniube Abigail lakheah. Alibe ju rükri larü tüsho akheahakham lakheah, tüshe aniubuh a bukmükerü tüsho khükhürararü Kalebrü lakheah.

⁴ Nabal a api namfimihnu nam nipchoh de Davidnü sunglo chingnü so.

⁵ Jumonü Davidnü athrününgtsüng 10 yüshih; tüsho Davidnü athrününgtsüngbo ki tha, “ Karmel lim wutuang, tüsho Nabal kilim yübah I mung chingnü salüm jihang.

⁶ Nüsanü api ki ha ruk akin jihang: ‘Nü mungtsü laang, tüsho nü yamkhün ching mungtsü laang, tüsho nü lakhi alala ching mungtsü laang.

⁷ Nü mihnu nam niprü lah de inü sodo; kheakü nü yo namfimihnubo isa lung lakheah, tüsho isanü arü kheak amütsü mürhimo, tüsho arü tümü she müdükheak, kim alala ching arübo Karmel ching lakheah.

⁸ Nü yo athrününgtsüngrü ki keokhiang, tüsho arünü nü ki thabah. Jumonü nü yo athrününgtsüngbo nü mük ki amuzho ngüshang; tümüde isa thünio nimung khülang ching arükheah. Muzhobah nü khah ching tümüpürü lanü nü yamlarübo tüsho nü tsührü David kilim jihang.’ ”

⁹ Küyimki David yo athrününgtsüngbo arükheanü, arünü Nabal ki ha alala David mung chingnü tha; tüsho arünü aleang.

¹⁰ Tüshe Nabalnü David yamlarübo ki alo, “David ju shepü a? Jesse tsührü ju she a? Khihni nihbuh putungrü kheaknü chamkhide atsokhi yamlarübo ahihdo lah.

¹¹ Inü yikhap le ke tüsho I mihnu nam niprü thsungkheak laksahkhi shih inü mümükheahkhi chingnü arürü mihtsürü kilim jihba shi?”

¹² Jumonü David yo athrününgtsüngbonü rholo tüsho alodarübah ha alala api ki tha.

¹³ Davidnü amihtsürübo ki tha, “ Mihtsürü abannü nihbuh nukshang noang!” Tüsho mihbüm abannü nukshang noa lu; David she api nukshang noa lu; tüsho mihtsürü 400 ngüm David dunglim yü, tüsho 200 hah ki bin.

¹⁴ Tüshe athrününgtsüng khülangnü Nabal niube, Abigail ki tha, “Isa putungpuh salüm jihshihpü Davidnü yunithsürübo sunglo chingnü arüshihdo; tüsho apinü arü kheak mükhemürangde zhi.

¹⁵ Tüshe mihtsürübonü isa kheak khide tsüde la, tüsho isa küpkhuk müjih, tüsho isa thulu ching arü lung lachoki khiungde tümü she müdükheak;

¹⁶ isa arü lung namfimihnu neakchoki azhing tüsho animung chido arübo isa chipi lakheah.

¹⁷ Jumonü kheakü ha mükheahang tüsho nünü tümü rhimobeanü lümakheahang; tümüde isa putungpuh tüsho api yamkhün alala kheak amütsü rhimo lümkihabahdo; api ju shenü masukachihkhukpü thsüde mihbukmuyuk ah.”

¹⁸ Judüki Abigailnü niokheamde yübah yikhap 200, yukhu zahkhi shihküp qiuqiu 2, amüthreangkhi namfimihnu 5, angukhi hi khahngak 17, amukuhkhi kurungaso düchi 100, tüsho khubaso yikhap 200 de lu. Anihbenü donkibo kheak mühah,

¹⁹ tüsho anihbe athrününgtsüngbo ki tha, “I müngühnü yüang; I nüsa dunglim arüchoh.” Tüshe alibenü aniubuh Nabal ki mütha.

²⁰ Alibe donki kheak binbah awung khüp akichoki, David tüsho amihtsürübo anihbe kilim aki; tüsho alibenü arü shoru.

²¹ Kheakü Davidnü tha, “ Tsükjide inü harü mihtsürübo sunglo ching khümkhitbah, arü kukruk tümü müdükheakshihkhi akeangkeang thsüdo; tüshe apinü I kilim atsü müthri amütsü jihlodo.

²² Yapsu mukhiungyide inü jurü athrürübo mülaksahkhama lasho Thrünpuhnü I kheak thsümüchishang!”

²³ Küyimki Abigailnü David ngükhea, alibenü niokheamde yü tüsho donki kheaknü akibah amiro alo lim mükhümde David ki khukning.

²⁴ Alibenü ajing kheak khukning tüsho tha, “I tungpuh, I kheak lang amülim lashang; muzhobah nü yamlaberünü nü nükhün ching asukshang, tüsho nü yamlaberü yubo sojang.

²⁵ I tungpuh, ha mihbukmuyuk Nabal yakli dünkheak sükde dülüm; tümüde api mung yande, api ju ah; api mung Nabal ah, tüsho makhakhi api kheak lah; tüshe I, nü yamlaberünü I tungpuhnü arüshihkhi athrününgtsüngbo müngü.

²⁶ “Jumonü kheakü, I tungpuh, Atungpuh tüsho nü lale, tümütüsho Atungpuhnü thiyih bukpü tüsho nü khahnü royimpü chingnü nü danlodo, kheakü nü riri tüsho sherünü I tungpuh ki amütsü rhimo yimchonü Nabal nangde kamshang.

²⁷ Tüsho kheakü nü yamlaberünü I tungpuh kilim hande arükhi thsambah ha I tungpuh yande arürü athrününgtsüngbo kilim jihang.

²⁸ Muzhobah nü yamlaberünü alakmihkhi neak bahjang; tümüde Atungpuhnü tsükjide I tungpuh kiulongthsürü kamshihbah, tümütüsho I tungpuhnü Atungpuh thirithsü keochihchoh; tüsho nü lakhi amuyung nü kheak amütsü rhimo müngü.

²⁹ Khürünü nü müshampü asürüsho tüsho nü rhangdung yimsho, I tungpuh rhangdung ju Atungpuh nü Thrünpuhnü akümkhi rhangdung ching rhükdoa zobah; tüshe nü riribo rhangdung a lunghitliu chingnü hitkhita bahkhi nangde apinü hitkhita bahbah.

³⁰ Küyimki apinü nü dünkheak atsü alala thakhi, tüsho nü Israel kurungkheak kiulongthsürü thsüpü mokhitkhi yande Atungpuhnü I tungpuh kheak rhimobanü,

³¹ I tungpuh a akeangnü thiyih bukkhi yungsho nihbuh royimkhi dünkheak mulong tukthsü tüsho lümkhilümduh hahmülang mülade alabah. Tüsho küyimki Atungpuhnü I tungpuh kheak tsüde arhimobanü, nü yamlaberü lümkhitang.”

³² Davidnü Abigail ki tha, “I khihni shorupü nü thiyibuh, Atungpuh Israel Thrünpuh shiang!

³³ Nü lümkhi atsü müngühshang, tüsho thiyih bukpü tüsho I khahnü royimpü tukloshihkhi nü tsükjide müngühmühi thsang!

³⁴ Tümüde Atungpuh Israel Thrünpuh shepünü nü thsümünimpü lakhi chingnü I tholokhea, api mung chingnü thachoh, nünü niokheamde I shorupü marükhülaa, tsükjide yapsunü Nabal mihtsürü athrürü khülang she maningpü lado.”

³⁵ Jushu alibenü api khilim tümü hande arükheanü akhah chingnü Davidnü leangkhi; apinü alibe ki tha, “Nü yam lim mungtsü chingnü wutuang; kheahang, inü nü yu anido, tüsho nünü amushukhi inü alojihdo.”

³⁶ Abigailnü Nabal kilim arü; kiulongthsürü thünio nangde, api yam ching thüniode alakheah. Nabal mulong ching asühkhi lakheah, tümüde api müshanga lakheah; jumonü yapsu mukhiungyikia alibenü api ki tümü she mütha.

³⁷ Yapsu, küyimki Nabal müsükhea, aniubenü harübo api ki tha, tüsho api mulong sheabah; api lung khülang nangde kam.

³⁸ Nimung thürü ngüm dunglim Atungpuhnü Nabal kheak lak tüsho api sheabah.

³⁹ Küyimki Nabal shekhi Davidnü asokhea, apinü tha, “Nabalnü I kheak mükhemürangkhi dünkheak mahkhapkhi tüsho api yamlarü amütsü rhimo chingnü atukloshihbuh Atungpuh shiang; Nabalnü amütsü rhimokhi Atungpuhnü aku kheak yihkihlojihdo.” Judüki Davidnü aniube thsüpü Abigail kilim thiyusheak yüshih.

⁴⁰ Küyimki David yamlarübo Karmel ching Abigail kilim arükhea, arünü alibe ki tha, “Nü bede yübah aniube thsüpü Davidnü isa arüshihkheah.”

⁴¹ Alibenü asürü tüsho amiro alo lim mükhümbah khukning, tüsho tha, “Nüsa yamlaberü a I tungpuh yamlarübo jing müsühpü azhorü ah.”

⁴² Abigailnü nahde asürü tüsho donki kheak binbah limro ching yü; anihbe yamlaberü phüngünü alibe yande yü. Alibenü David yunithsürübo dunglim yü tüsho api niube kam.

⁴³ Davidnü Jezreel ching yo Ahinoam she lu; ane chido aniube kam.

⁴⁴ Saulnü atsührübe David niube Mikal ju Gallimrü Laish tsührü Palti kilim jih.