1 SAMUEL 23 - AMÜSÜH HÜM CL Bible (BSI)

Keilah Kiuto Khümkhitkhi

¹ Kheakü arünü David ki tha, “Filistiarünü Keilah bede keochihchoh, tüsho rhimopung ching yo hi ahühchoh.”

² Davidnü Atungpuh ki keokhi, “Inü yübah harü Filistiarü yanba shi?” Atungpuhnü David ki tha, “Yübah Filistiarü yanang tüsho Keilah khümkhitang.”

³ Tüshe David mihtsürübonü api ki tha, “ Kheahang, isa Juda ching trede lah; isa Filistia bonungrü azhihde Keilah ching yüsho küdükhüh she alaba?”

⁴ Kheaküshe Davidnü Atungpuh ki keokhi. Atungpuhnü api ki alo, “ He, Keilah lim yükiang; tümüde inü Filistiarü nü khah ching jihbah.”

⁵ Jumonü David le api mihtsürübo Keilah ching yübah Filistiarü bebah keochih tüsho akam-shiwühbo lubah arü, tüsho arü khitode laksah. Hanangde Davidnü Keilah ching larü khümkhit.

⁶ Küyimki Ahimelek tsührü Abiatharnü Keilah ching David kilim yükhea, api khah ching amükeamrü khim shuhbah aki.

⁷ Kheakü David ju Keilah ching arüa lah de Saulnü so. Tüsho Saulnü tha, “ Thrünpuhnü api I khah ching jihdo; tümüde api zangrünü ripit tüsho akhrihbe lakhi kiuto ching azhakbah rihdodo.”

⁸ Saulnü Keilah lim yükibah David tüsho api mihtsürübo mükamdode ayanpü mihtsürübo thirimukhung.

⁹ Küyimki Saulnü api azhihde rük amütsü rhimokhi Davidnü amükheahkhea, apinü amükeambuh Abiathar ki tha, “ Ha ching amükeamrü khim lubah arang.”

¹⁰ Davidnü tha, “O Atungpuh , Israel Thrünpuh, Saulnü Keilah ching arübah I dünkheaknü kiuto thsümünimpü yimkhi nü yamlarünü sodo.

¹¹ Tüsho kheakü, nü yamlarünü asokhi nangde Saul akiba de? O Atungpuh , Israel Thrünpuh, inü nü ki mushuchoh, nü yamlarü ki thaang.” Atungpuhnü tha, “ Api akibah.”

¹² Judüki Davidnü tha, “ Keilah mihtsürünü I kilim arüabah tüsho I mihtsürünü Saul khah ching yüzahabahba de?” Atungpuhnü tha, “ Arünü nü khah ching azahbah.”

¹³ Judüki David tüsho amihtsürübo 600 bande Keilah bahbah tsahmusu; arünü ayükhukpü lakhibo ching yü. Küyimki David Keilah chingnü akhindo de Saulnü asokhea, apinü alümkhi tukloabah.

David Jikkhi

¹⁴ Davidnü awung lomi Ziph sunglo lungkhün ching bin. Saulnü animokhün api yim, tüshe Atungpuhnü api khah ching müjih.

¹⁵ Saulnü api rhangdung yimde arüa lah de sobah Davidnü Horesh ching Ziph sunglo ching la.

¹⁶ Saul tsührü Jonathannü tsahmusubah David kilim Horesh ching arü; Atungpuh hode ju ching api reangzahlode kam.

¹⁷ Apinü anihbuh ki tha, “Dütre; tümüde I buh Saul khah nü kheak müjipkih; nü Israel kurungkheak kiulongthsürü thsübah, tüsho I ju nü khinbuh labah; ha I buh Saulnü she mükheahlah.”

¹⁸ Judüki anenü Atungpuh miki tangzüng; David a Horesh ching la, tüsho Jonathan thüyam lim wulung.

¹⁹ Judüki Ziphrü khürü Gibea ching Saul kilim wutu tüsho tha, “ Jeshimon düjinglim, Hakila wung kheak Horesh lungkhün ching isa lung David jiklah yung de?

²⁰ Kheakü, O kiulongthsüpuh, küyimki nü akipü lümlanü akiang; tüsho isanü arhimopü jua api kiulongthsüpuh khah ching yukjihbah.”

²¹ Saulnü tha, “Nüsanü I ki mihmuzho huhkhi thsungkheak Atungpuhnü nüsa müngühjang!

²² Yüang tüsho khülang ki adüngakhi thsang; api küching la tüsho shepünü api ju ching ngükheanü dükde yimkhitang; tümütüsho I ki thakhia api ju khide rük lah düchoh.

²³ Mühide kheahang tüsho api küching jiklanü ajikpung dangpung alala mükheahang, tüsho thiyusheak mütsanmükhi lubah I kilim arüloang. Jushu I nüsa lung yübah; tüsho api lomi ching lasho, inü Judarü guk alala bolungnü api yimkhitbah.”

²⁴ Jumonü arübo tsahmusubah Saul müngühnü Ziph lim yü. David le api mihtsürübo Jeshimon düjinglim Araba ching, Maon sunglo ching lakheah.

²⁵ Saul tüsho api mihtsürübo api yimde yü. Küyimki Davidnü asokheanü, api lungto lim yükibah Moan sunglo ching la. Küyimki Saulnü ju sokhea, apinü Moan sunglo lim David müshamde yü.

²⁶ Saulnü awung thripkhüh yü, tüsho David le amihtsürübo awung khülim peang yü. Küyimki Saul tüsho amihtsürübonü David tüsho amihtsürübo tholopü thüninde arükheanü David ju Saul kheaknü atsopü niokheam.

²⁷ Judüki yunithsürü khülang arübah Saul ki tha, “Nahdang tüsho arang; tümüde Filistiarünü lomi ching azahpü thsüchoh.”

²⁸ Jumonü Saul ju David müshamkhi chingnü tuklo, tüsho Filistiarü keochihpü yü; jumonü ju dangpung ki Atsokhitpung Lungto de ajikheah.

²⁹ Jushu ju chingnü David wutubah Engedi lungkhün ching la.