1 SAMUEL 22 - AMÜSÜH HÜM CL Bible (BSI)

Amükeamrübo Laksahkhi

¹ Davidnü ju chingnü akhinde Adullam lungkhün ching tsokhide yü; akhiung pürü tüsho buhtsührübonü ju sobah api shorupü ju ching yüki.

² Lümthsünürü, shozüng larü, tüsho reangmükeamrü alala api ki mukhung; tüsho arü kurungkheak api wühkenorü kam. Api lung larübo 400 bande alakheah.

³ Davidnü ju chingnü Moab lomi Mizpa ching yü. Apinü Moab kiulongthsüpuh ki tha, “ Thrünpuhnü I thsungkheak tümü rhimobanü inü mümükheahyi khiungde, muzhobah I buh le I be nü kilim arüshang.”

⁴ Apinü arübo Moab kiulongthsüpuh ki zojih, tüsho David lungkhün ching lakhi amuyung arübo api lung lakheah.

⁵ Judüki wukihrü Gadnü David ki tha, “Lungkhün ching dübin; tsoang, tüsho Juda lomi ching yüang.” Jumonü Davidnü bahbah Hereth murung ching yü.

⁶ David tüsho api lung larübo ngüdo de Saulnü so. Saul a akhah ching thsüh shuhbah Gibea ching tamarisk sang khüp awung kheak bin, tüsho ayamlarü alalanü api sündoa zhip.

⁷ Saulnü api sündoa zhiprübo ayamlarübo ki tha, “ Kheakü aniang, nüsa Benjaminrübo; Jesse tsührünü nüsa abande thulubo le kurungasolubo jihba de, apinü nüsa alala chithürübo tüsho chibo kurung wühkenorü kamshihba de?

⁸ Jumonü nüsa alalanü rük yimde I azhihcho de? I tsührünü Jesse tsührü kheak arihakokhi shenü she I ki thaa muhuh, nüsa shenü she I thsungkheak are de mülüm yungsho I tsührünü I yamlarü thurumusua I azhihde khihni ha nangde I laksahpü jimkhi thaa muhuh.”

⁹ Edomrü Doeg, Saul yamlarü atobuhnü alo, “Inü Jesse tsührü ju Ahitub tsührü Ahimelek kilim Nob ching arükhi ngüdo;

¹⁰ apinü David thsungkheak Atungpuh ki keokhi, tüsho apinü tsühyungpü tüsho Filistiarü Goliath nukshang api kilim jih.”

¹¹ Kiulongthsüpuhnü Ahitub tsührü Ahimelek tüsho api buhtsührü alala, Nob ching larü amükeamrübo jipü yüshih; tüsho arü alala kiulongthsüpuh ki arü.

¹² Saulnü tha, “ Ahitub tsührü, kheakü aniang.” Apinü alo, “I tungpuh, I ha kheak lah.”

¹³ Saulnü api ki tha, “ Tümü thsükhi Jesse tsührü kilim yikhap le nukshang jihde nükenü I mulomülapde tüsho api thsungkheak Thrünpuh ki keokhide khihni ha ruk apinü I laksahpü jimshihkhea?”

¹⁴ Judüki Ahimeleknü kiulongthsüpuh ki alo, “Nü yamlarü bolung shepü David nangde thiyuro la? Api kiulongthsüpuh tsühmeakrü ah tüsho nü aheangpü ching athrilah, tüsho nü yam ching alalanü wüntre jihchoh.

¹⁵ Inü api thsungkheak Thrünpuh ki keokhikhi khihni akhuhbea de? Küdüküdü she yung! Kiulongthsüpuhnü ayamlarü yungsho I buhtsührü shepü kheak she dümudo; tümüde nü yamlarünü ha alala, hihde yungsho nükde tümü mümükheah.”

¹⁶ Kiulongthsüpuhnü tha, “Nü tsükjide ashebah, Ahimelek, nü tüsho nü buhtsührü alala.”

¹⁷ Kiulongthsüpuhnü api mükamde azhiprü aheangrü ki tha, “Rholoang tüsho Atungpuh amükeamrübo laksahang, tümütüsho arübo she David kilim tsanglah; arünü api tsokhi mükheahlah, tüsho I ki thaa muhuh.” Tüshe kiulongthsüpuh yamlarübonü Atungpuh amükeamrübo laksahpü arü khah mushuhkih.

¹⁸ Judüki kiulongthsüpuhnü Doeg ki tha, “Nü, Doeg, rholoang tüsho amükeamrübo laksahang.” Edomrü Doegnü rholobah amükeamrübo laksah; ju nimung apinü amükeamrü khim phuyurü 85 laksah.

¹⁹ Saulnü amükeamrü kiuto Nob she nukshang yüzahshih; athrürü tüsho aliberü, azürü tüsho khungarü, moshipung, donki, tüsho namfimihnu, apinü nukshangnü laksah.

²⁰ Tüshe Ahitub tsührü Ahimelek tsührü bolung khülang, amung Abiathar tsokhita David dunglim tsode yü.

²¹ Saulnü Atungpuh amükeamrübo laksahkhi Abiatharnü David ki thaa huh.

²² Davidnü Abiathar ki tha, “Edomrü Doeg, ju ching lachoki, apinü tsükjide Saul ki thabah de inü ju nimung mükheah. Nü buhtsührü alala rhangdung thsungkheak I hahmülang thsübah.

²³ I lung laang, tüsho dütre, tümüde shepünü I rhangdung yimchonü nü rhangdung yimchoh; nü I lung khümkhitbah.”