1 SAMUEL 21 - AMÜSÜH HÜM CL Bible (BSI)

David Tsokhi

¹ Davidnü Nob ching amükeambuh Ahimelek kilim arü. Ahimeleknü ajande David shorupü arü, tüsho api ki tha, “ Tümü thsükhi nü lung she mübede nü zangrü a le?”

² Davidnü amükeambuh Ahimelek ki tha, “ Kiulongthsüpuhnü tümükhüh dünkheak I thiyi tüsho I ki tha, ‘Inü nü yüshihkhi tüsho thiyikhi dünkheak shenü she dümükheahshih.’ Hadürü tüsho ha dangpung thsungkheak inü athrününgtsüng shorupü tsüngdo.

³ Dale kheakü, nü khah ching tümü shuhla? I kilim yikhap phüngü yungsho tümüpürü ha ching lanü jihang.”

⁴ Amükeambuhnü David ki alo, “I khah ching yancho yikhap müla, amüsüh yikhap– athrününgtsüngrü aliberü mütsangrü amüsüh yikhap lang lah.”

⁵ Davidnü amükeambuh ki alo, “Dükde I hantsahchoki lünnü aliberübonü isa kheaknü chamkhide alakheah; boto hantsahchoki she athrününgtsüngbo müsühlah; khihni a küdükhüh she amüsüh laba?”

⁶ Jumonü amükeambuhnü api kilim amüsüh yikhap jih; tümüde ju ching yikhap mülakheah, tüshe alam yikhapnü amüthripü thsüde ju nimung Atungpuh mikinü yihkhita lubah atsokhi ahuhbe yikhap lang alakheah.

⁷ Kheakü Saul yamlarü khürü ju nimung Atungpuh miki tukloa bin; api mung Doeg, Edomrü, Saul mihnu neakrü atobuh lakheah.

⁸ Davidnü Ahimelek ki tha, “Nü lung ha ching thsüh yungsho nukshang müla de? Inü nukshang yungsho thsühnuk hanbah marü, tümütüsho kiulongthsüpuh rhimo ching I niokheamdo.”

⁹ Amükeambuhnü tha, “Nünü Ela jindükhün chingnü alaksahbuh Filistiarü Goliath nukshang, ha ching amükeamrü khim dunglim khim ching düma zolah; nünü lusho, ju luang, tümüde ju khüh yungsho ha ching tümü müla.” Davidnü tha, “ Ju ruk püpü müla; ju I kilim jihang.”

¹⁰ Davidnü asürübah ju nimung Saul kheaknü tsoabah; api Gath kiulongthsüpuh Akish kilim yü.

¹¹ Akish yamlarübonü api ki tha, “ Ha alomi kiulongthsüpuh David yung de? Arünü khülangnü khülang khün thsüde atsünkhi yung de, ‘Saulnü chithürübo laksah tüsho Davidnü chithürü thürübo laksah?’”

¹² Davidnü harü yubo mulong ching lu tüsho Gath kiulongthsüpuh Akish khide tre.

¹³ Jumonü apinü ayakli arü miki müthriabah; apinü arü miki abünrü ruk thsüa huh. Apinü ripit khimdopübo kheak zamareak, tüsho amükeke amükhühnam kheak zhikhishih.

¹⁴ Akishnü ayamlarübo ki tha, “ Mihtsürü ju kheahang! Api abünrü ah! Nüsanü küde thsah api I kilim bede arükhea?

¹⁵ I abünrü shahjungkhinü nüsanü hadürü abünrü I miki ahorishihpü bede arükhea de? Ha buh I yam ching arübea de?”