1 SAMUEL 16 - AMÜSÜH HÜM CL Bible (BSI)

Samuelnü David Mujude-mokhitkhi

¹ Atungpuhnü Samuel ki tha, “ Külokhüh nü Saul dünkheak tüzhoba? Inü api Israel kurungkheak kiulongthsüpü chingnü bahyukdo. Nü shihjuh ching oliv müdangke yukang tüsho tsahmusuang; inü nü Bethlehem ching Jesse kilim yüshihbah, tümüde api tsührü bolungnü inü kiulongthsürü khülang mokhitdo.”

² Samuelnü tha, “Inü küde thsah ayüba? Ha Saulnü sosho, apinü I laksahbah.” Tüsho Atungpuhnü tha, “Nü lung moshi nunu khülang beang, tüsho thaang, ‘I Atungpuh ki laksah-a kingaünpü arükheah.’

³ Laksah-a kingaünkhi ching Jesse jiyukang, tüsho nünü tümü rhimobeanü inü ahuhbah; tüsho inü nü ki mung jihkhi I thsungkheaknü mujudemokhitang.”

⁴ Atungpuhnü thiyukhüm jihkhi Samuelnü rhimo, tüsho Bethlehem ching arü. Kiuto azothsürübonü api shorupü ajande arü, tüsho tha, “Nü mungtsü chingnü arücho de?”

⁵ Apinü tha, “ Mungtsü chingnü ah; I Atungpuh ki laksah-a kingaünpü arüdo; nüsabo müsühkhitang tüsho I lung laksah-a kingaünkhi ching arang.” Tüsho apinü Jesse le atsührübo müsühkhit tüsho arübo laksah-a kingaünkhi ching jiyuk.

⁶ Küyimki arü arükhea, apinü Eliab kheak kheah, tüsho lüm, “ Tsükjide Atungpuhnü mujude-mokhitkhi kheakü Atungpuh miki lah.”

⁷ Tüshe Atungpuhnü Samuel ki tha, “ Api jak-ku yungsho trungdung dükheah, tümütüsho inü api bahyukdo, tümüde mihtsürünü akheahkhi nangde Atungpuhnü mükheah; mihtsürünü aleanglim kheahchoh, tüshe Atungpuhnü mulong kheahchoh.”

⁸ Jumonü Jessenü Abinadab ji, tüsho api Samuel miki hoshih. Apinü tha, “Atungpuhnü ha she mumokhit.”

⁹ Jushu Jessenü Shamma hoshih. Tüsho apinü tha, “Atungpuhnü ha she mumokhit.”

¹⁰ Jessenü atsührü 7 Samuel miki hoshih, tüsho Samuelnü Jesse ki tha, “Atungpuhnü harü bolung sheshe mumokhit.”

¹¹ Samuelnü Jesse ki tha, “Nü tsührü alala ha ching la shi?” Tüsho apinü tha, “ Kheakü akheambuh aninga lah, tüshe api namfimihnu neakchoh.” Tüsho Samuelnü Jesse ki tha, “ Api ha ching arüshang; tümüde api ha ching marüyichokia isa mübin.”

¹² Apinü thiyia yüshihbah anihbuh bede yüzah. Kheakü api shihphü atsü, mük akheahakham, tüsho trungdung atsü lakheah. Atungpuhnü tha, “Wusuang tüsho api mujude-mokhitang; tümüde ha buh ah.”

¹³ Judüki Samuelnü oliv müdangke pung lu, tüsho akhiungmungrü mikinü api mujude-mokhit; tüsho ju nimungnü Atungpuh me ju wu chingnü David kheak arü. Jushu Samuelnü tsahmusu tüsho Rama lim yü.

Saul Mahkhappung ching David Lakhi

¹⁴ Kheakü Atungpuh me Saul kheaknü chamachih, tüsho A TUN GPU H kilimnü amünean me arübah api thsurang.

¹⁵ Tüsho Saul yamlarübonü api ki tha, “ Kheakü kheahang, Thrünpuh kilimnü amünean me arübah nü thsurangchoh.

¹⁶ Kheakü isa tungpuhnü yamlarübo thiyukhüm jih-a bingkhung khungsorü yimshang; tüsho küyimki Thrünpuh kilimnü amünean me nü kheak arübanü, apinü ju khungbah, tüsho nü tsüde akambah.”

¹⁷ Jumonü Saulnü ayamlarübo ki tha, “Shepünü tsüde khungsolanü yimang tüsho api I kilim bebah arang.”

¹⁸ Athrününgtsüng khülangnü tha, “Inü Bethlehemrü Jesse tsührü khülang akingsorü, mulong torü, athrungrü, thiyu ching ayuk, tüsho trungdung akheahakhamkhi ngüdo; tüsho Atungpuh api lung lah.”

¹⁹ Jumonü Saulnü Jesse kilim yunithsürü yüshih, tüsho tha, “Nü tsührü David shepü namfimihnu lung lanü I kilim arüshang.”

²⁰ Jessenü donki lubahle yikhap, shihküp qiuqiu tüsho mihnu nunubo hah thsükihbah David kheaknü mühah-a Saul kilim yüshih.

²¹ Tüsho Davidnü Saul kilim arübah api tankihpü ching yüzah. Saulnü api khide muzho, tüsho api ju anihbuh thsühnuk hanrü kam.

²² Saulnü Jesse kilim thiyia yüshihde tha, “David I tankihpü ching lashang, tümüde I mük ki api tsüde ngüdo.”

²³ Tüsho küyimki Thrünpuh kilimnü amünean me Saul kheak arüde alakhea, Davidnü bingkhung ju akhahnü shuhbah khung, tüsho Saul keamramde la tüsho tsüde kam, tüsho amünean me api kheaknü chamachih.