1 SAMUEL 15 - AMÜSÜH HÜM CL Bible (BSI)

Amalekrü bede Keochihkhi

¹ Samuelnü Saul ki tha, “Atungpuhnü nü Israel mihtsürü kurungkheak kiulongthsürü thsüshihpü thsüde mujude-mokhitshihpü I arüshih; jumonü kheakü Atungpuh yu aniang.

² Hanangde Wuto Atungpuhnü thachoh, ‘Inü Amalekrübo arünü Israelrü Ijip chingnü akhiukchoki zhipdokhi dünkheak thsümüchibah.

³ Kheakü yüang tüsho Amalekrü yanabahang, tüsho arü lakhi alala thsümünimjang; arübo daningshih, tüsho athrürü tüsho aliberü, azürü tüsho khungarü, moshipung tüsho namfimihnu, kemel tüsho donkibo laksahang.’ ”

⁴ Jumonü Saulnü mihtsürübo jimukhung tüsho arübo Telaim ching wühkhekhi, Israel bonungrü 200,000, tüsho Juda bonungrü 10,000.

⁵ Saulnü Amalek kiuto ching arü tüsho jindükhün ching thüram thsübah bin.

⁶ Saulnü Kenrü ki tha, “Yüang! Tsoang! Amalekrü kheaknü tsoang, jude yungsho inü nüsa arü bolungnü adükheakshihbah; tümüde nüsanü Israel mihtsürü Ijip chingnü akhiukchoki alala ki mihmuzho huhdo.” Jumonü Kenrübonü Amalekrü kheaknü chamkhi.

⁷ Saulnü Amalekrü, Ijip aniakhiuklim lakhi Havila kheaknü Shur khiungde yankhitde yü.

⁸ Apinü Amalekrü kiulongthsüpuh Agag arhangnü ram, tüshe mihtsürü alala nukshangnü laksahkham.

⁹ Saul tüsho mihtsürübonü Agag aningshih, tüsho namfimihnu le moshibo, tüsho moshi nunu le namfimihnunu atsüdakbo mülaksah, tüsho tümükhüh atsübo müthsümünim; yihnüpü mülakhi yungsho athülih-kukrukbo arünü shahde thsümünim.

Saul Kiulongthsürü chingnü Abahyukkhi

¹⁰ Atungpuh yu Samuel kilim arü:

¹¹ “Inü Saul kiulongthsürü kamshihkhi I mulong ashichoh, tümüde apinü I ru yankhi chingnü rholodo, tüsho I yukhümbo mürhimo.” Samuelnü bukakhiuk; tüsho tsüngreroro Atungpuh ki zhi.

¹² Samuelnü Saul shorupü yapsu mükikde asürü, tüsho api ki tha, “Saul a anihbuh thsungkheak apinü lung khima zopung Karmel lim yüdo, tüsho alodarüchoki api Gilgal lim yükido.”

¹³ Küyimki Samuel ju Saul kilim arükhea, Saulnü api ki tha, “Atungpuhnü nü müngühshang; inü Atungpuh yukhüm rhimodo.”

¹⁴ Tüshe Samuelnü tha, “Dale tüsho namfimihnu le moshinü akhungkhi inü asokhi ha tümü a?”

¹⁵ Saulnü tha, “ Arübo Amalek chingnü hande arükheah; tümüde mihtsürübonü Atungpuh nü Thrünpuh laksah-a kingaünpü thsüde namfimihnu tüsho moshi atsüdakbo aningshih; tüshe aningkhi püpü a isanü shahde laksahkhamdo.”

¹⁶ Judüki Samuelnü Saul ki tha, “Zhikdang! Yishih Atungpuhnü I ki tümü thakheanü nü ki thabah.” Apinü alo, “ Thaang.”

¹⁷ Samuelnü tha, “Nü ju nü mük ching aninikhüh thsüa lalashe, nü Israel trükbo kurungkheak aku khülang yung de? Atungpuhnü nü Israel kurungkheak kiulongthsürü thsüshihpü mujude-mokhitkhi yung de?

¹⁸ Tüsho Atungpuhnü nü athiyikhi rhimo ching yüshihde tha, ‘Yüang, amüneanrü Amalekrü shahde laksahkhamang, tüsho arübo mükheamkhamyi khiungde arü bebah keochihang.’

¹⁹ Dale tümü thsükhi nünü Atungpuh yu manikhea? Tümüde nünü ayankhikhi kukruk lim nanachihde yükikhea tüsho Atungpuh miki amütsübe rhimokhea?”

²⁰ Saulnü Samuel ki tha, “Inü Atungpuh yu anido, inü Atungpuhnü athiyikhi rhimo ching yüdo, inü Amalek kiulongthsüpuh Agag hande arüdo, tüsho Amalekrü alala laksahkhamdo.

²¹ Tüshe ayankhikhi kukruk ching yo, thsümünima bahpü zokhi, Gilgal ching Atungpuh nü Thrünpuh ki laksah-a kingaünpü lakhi, namfimihnu tüsho moshipungbo atsüdak mihtsürübonü ludo.”

²² Tüsho Samuelnü tha, “Atungpuh yu anikhi kheaknü taka kingaünkhi tüsho laksah-a kingaünkhi ching Atungpuhnü alü asühcho de? Tsükjide, laksah-a kingaünkhi kheaknü a mihyuanikhi atsübe, tüsho namfimihnu pung müdang kheaknü mihyuanikhi atsübe.

²³ Tümüde azhihde arhimokhi ju thümüthiyi nangde neak tüsho nihnihrarakhi ju amülimkhi tüsho sangthsü kingaünkhi ruk ah. Tümütüsho nünü Atungpuh yu bahyukdo, apinü nü she kiulongthsürü chingnü bahyukdo.”

²⁴ Saulnü Samuel ki tha, “Inü neak yihbeakdo; tümüde inü Atungpuh yukhüm tüsho nü yubo lakmihdo, tümütüsho inü mihtsürübo kheak trede arü yu anido.

²⁵ Jumonü kheakü, inü tamkhüntamnüchoh, I neak bahjang, tüsho I kilim rholoang, junangde inü Atungpuh kingaünanü.”

²⁶ Samuelnü Saul ki tha, “Inü nü kilim murholo; tümüde nünü Atungpuh yu bahyukdo, tüsho nü Israel kurungkheak kiulongthsürü chingnü Atungpuhnü bahyukdo.”

²⁷ Samuelnü atsopü rholochoki, Saulnü api shulünkhim münkheam kheak tholo, tüsho ju rukrüp.

²⁸ Tüsho Samuelnü api ki tha, “ Ha nimungnü Atungpuhnü Israel kiulongthsü nü kheaknü rukrüpdo, tüsho ju nü kheaknü atsübe, nü yamhingrü kilim jihabahdo.

²⁹ Shepü Israel Müretahkhi lanü apinü akeangyu müthachoh yungsho api lümkhi mümüthri; tümüde api lümkhi müthripü thsüde api mihtsürü khülang yung.”

³⁰ Judüki Saulnü tha, “Inü neak yihbeakdo; judüalalashe kheakü I mihtsürü azothsürü tüsho Israel miki I wüntre jihang, tüsho I kilim rholoang, junangde inü Atungpuh nü Thrünpuh kingaünbah.”

³¹ Jumonü Samuelnü Saul kilim rholode yü; tüsho Saulnü Atungpuh kingaün.

³² Judüki Samuelnü tha, “ Amalekrü kiulongthsüpuh Agag ha ching I ki bebah arang.” Tüsho Agagnü trede ajande api ki arü. Agagnü tha, “ Tsükjide ha khühde ashepü lah.”

³³ Tüshe Samuelnü tha, “Nü nukshangnü aliberübo aniungyüh kamshihdo, jumonü aliberü bolung nü be a aniungyüh labah.” Tüsho Samuelnü Agag ju Gilgal ching Atungpuh miki adütre kamde khapthünak.

³⁴ Judüki Samuel ju Rama ching yü; tüsho Saul a nihbuh yam lim Gibea ching yü.

³⁵ Samuelnü api shekhün ching yüzahde Saul müngüdebah, tüshe apinü Saul dünkheak tüzho. Tüsho Atungpuhnü Saul ju Israel kurungkheak kiulongthsürü thsüshihkhi dünkheak api mulong ashide lüm.