1 SAMUEL 13 - AMÜSÜH HÜM CL Bible (BSI)

Filistiarü kheak Keochihkhi

¹ Küyimki Saul kiulongthsürü kamkhea, api kam 30 lakheah, tüsho apinü Israel kurungkheak kam yirükheak mahne kiulongthsü.

² Israel bolung ching Saulnü 3000 mokhit; 2000 ju Mikmash tüsho Bethel awung lomi ching Saul lung lakheah, tüsho 1000 ju Benjamin lomi Gibea ching Jonathan lung lakheah; aningkhi mihtsürübo apinü nihbuh khimyambo ching thiyia yüshih.

³ Jonathannü Geba ching Filistia thirithsürü binpung yanabah; tüsho Filistiarünü ju so. Tüsho Saulnü lomi alala ching hulipungpung mütde tha, “Ibrirübonü soang!”

⁴ Küyimki Saulnü Filistia thirithsürü binpung yankhitdo tüsho Filistiarünü Israel kheak mükihde kamdo de Israel alalanü asokhea, mihtsürübo Saul lung bepü Gilgal ching jimukhung.

⁵ Filistiarünü Israel kheak keochihpü thsüde khora-lolungbe 30,000, khoraberü 6000 tüsho thirithsürü mih hihde keyean loyi nangde trüngmukhung; arünü atu tüsho Beth-aven aniakhiuklim Mikmash ching bin.

⁶ Küyimki Israelrünü ju ngükhea, arübo lümthsünü ching lakheah (tümüde thirithsürübo ju müküpdakde alakheah), mihtsürübonü arü zangrü lungkhün, alokhün, lungtobo tüsho akukarukbo ching jikabah.

⁷ Ibrirü khürü Jordan hode Gad tüsho Gilead lomi lim yü. Saul a judü lang Gilgal ching lakheah, tüsho mihtsürü alalanü ajande api yande yü.

⁸ Samuelnü tsüngdoa jihkhi kim ching apinü nimung thüne aleang; tüshe Samuel Gilgal ching marü, tüsho mihtsürübo Saul kheaknü chamkhide atsopü tankih.

⁹ Jumonü Saulnü tha, “ Taka kingaünkhi tüsho mungtsü kingaün ha ching I ki hande arang.” Tüsho apinü taka kingaün.

¹⁰ Apinü taka kingaünkhi jihkhamkhi yanalünde, Samuel arü khiung; tüsho Saulnü api shorupü asühde wukhiuk.

¹¹ Samuelnü tha, “Nünü tümü rhimokhea?” Saulnü alo, “ Küyimki inü mihtsürübo I kheaknü chamkhiabahde angükhea, tüsho nünü atsüngdokhi nimungbo dükeak ching nü marükhea, tüsho Filistiarü Mikmash ching trüngmukhungkhea,

¹² inü tha, ‘ Kheakü Filistiarü I kilim Gilgal ching akibah, tüsho inü Atungpuh ki mushude mükheang’; jumonü inü I zangrü lümkihbah taka kingaün jih.”

¹³ Samuelnü Saul ki tha, “Nünü bünkeangbünrude rhimodo; apinü nü kilim thiyukhüm jihkhi Atungpuh nü Thrünpuh yukhüm nünü manidebahdo. Atungpuhnü nü kiulongthsü Israel kurungkheak lünnü alashihpü thsükheah,

¹⁴ tüshe kheakü nü kiulongthsü tukloabahbah; Atungpuhnü amulongkhi mihtsürü khülang yimkhitdo; tüsho Atungpuhnü amihtsürü kurungkheak yakzan shuhshihpü api mokhitdo, tümütüsho nünü Atungpuhnü thiyukhüm jihkhi mani.”

¹⁵ Tüsho Samuel ju Gilgal chingnü tsoabah. Aningkhi mihtsürübonü bonungrü lung bepü Saul dunglim yan; arübo Gilgal chingnü Benjamin ching lakhi Gibea lim wutu. Saulnü api lung lakhi mihtsürübo 600 ngüm khekhit.

¹⁶ Saul, atsührü Jonathan, tüsho ane lung lakhi mihtsürübo Benjamin ching lakhi Gibea ching la; tüshe Filistiarü Mikmash ching binkheam.

¹⁷ Tüsho Filistiarü binkheampung chingnü thiriri boto mahsam thsübah akhiuk; boto khülang Shual limpeang, Ophra thrip anguh,

¹⁸ boto püpü Beth-horon lim anguh, tüsho asampü sunglo limpeang Zeboiim jindükhün abina kheahpung wung lim anguhbah yü.

¹⁹ Kheakü judüki Israel lomi alala ching yingkingrü mülade alakheah; tümüde Filistiarünü tha, “Ibrirünü arü thsungkheak nukshang tüsho thsüh kingbah mütsü le”;

²⁰ jumonü Israelrü alalanü arü chawuh, alo-kiube, awü yungsho hi rhüpbe züa lupü Filistiarü ki yükide alakheah;

²¹ chawuh tüsho alo-kiube zükhi dün ju shonak 2, awü zükhi tüsho wuhyak thsülokhi dün shonak anikhüh 1 lakheah.

²² Jumonü keochihkhi nimung ching Saul le Jonathan büne kheak hode she khah ching she thsühnuk mülade alakheah.

²³ Kheakü Filistia thirithsürü boto khülang Mikmash wung limro zhipdopü yü.