1 SAMUEL 12 - AMÜSÜH HÜM CL Bible (BSI)

Samuel Akheam Yu

¹ Samuelnü Israel alala ki tha, “Nüsanü I ki thakhi alala ching inü anijihdo, tüsho inü kiulongthsürü khülang nüsa kurungkheak zojihlah.

² Kheahang, nüsa becho ha kiulongthsüpuh ah; I shina lah tüsho ku buyiuka lah, tüshe I tsührübo nüsa lung lah: I athunu kim chingnü khihni khiungde inü nüsa bedo.

³ I ha ching lah; Atungpuh tüsho mujude-mokhitbuh miki I azhihde thiyumütsan jihang. Inü shepü lude? Yungsho shepü donki inü lude? Yungsho inü shepü kheak mulomülap de? Shepü kheak junokhi rhimode? Yungsho I mük tukpü thsüde shepü khah chingnü inü buknim lude? I azhihde thiyumütsan jihang tüsho ju inü nüsa kilim shaklobah.”

⁴ Arünü tha, “Nünü isa kheak mümulomülap yungsho isa mujuno yungsho isa shepü khah chingnü tümü lang she mulu.”

⁵ Apinü arü ki tha, “Nüsa azhihde Atungpuh thiyumütsan lah, tüsho mujude-mokhitbuh ha nimung thiyumütsan lah, junangde nüsanü I khah ching tümü she müngü.” Tüsho arünü tha, “ Am, Atungpuh thiyumütsan ah.”

⁶ Samuelnü mihtsürübo ki tha, “ Mosa tüsho Aron mokhitjihde nüsa jipürübo Ijip lo chingnü bekhitbuh Atungpuh thiyumütsan lah.

⁷ Jumonü kheakü nüsa küching lanü zhipang, junangde Atungpuh miki nüsa mahkhapbah, tüsho Atungpuhnü nüsa le nüsa jipürü thsungkheak akhümkhit rhimokhi inü nüsa ki thabah.

⁸ Küyimki Jakob ju Ijip ching yükhea tüsho Ijiprünü arü junokhea, judüki nüsa jipürünü Atungpuh ki zhi tüsho Atungpuhnü Mosa le Aron ane thiyia, nüsa jipürü Ijip chingnü bekhitbah arübo ha dangpung ching lashih.

⁹ Tüshe arünü Atungpuh arü Thrünpuh mihabah; tüsho apinü arübo Hazor kiulongthsüpuh Jabin bonungrü limthobuh Sisera, Filistiarü, tüsho Moab kiulongthsüpuh khah ching yinabah; tüsho arünü arü azhihde keochih.

¹⁰ Judüki arünü Atungpuh ki zhi, tüsho tha, ‘Isanü neak yihbeakdo, tümütüsho isanü A TUN GPU H bahyuk, tüsho Baalbo le Astarbo tankih; tüshe kheakü isa riri khah chingnü isa khümkhitang, tüsho isanü nü tankihbah.’

¹¹ Tüsho Atungpuhnü Jerubbaal, Bedan, Jephtha, tüsho Samuel thiyibah nüsa mühi thiriribo khah chingnü nüsa khümkhit; tüsho nüsa akhümkhitkhi ching la.

¹² Tüshe küyimki Amon kiulongthsüpuh Nahashnü nüsa azhihde arükhi nüsanü angükhea, Atungpuh nüsa Thrünpuh nüsa kurungkheak kiulongthsüpuh lalashe nüsanü I ki tha, ‘Yung, tüshe kiulongthsürü khülangnü isa kurungkheak kiulongthsübah.’

¹³ Kheahang, shepü nüsanü amokhitkhea tüsho akeokhikhea, kiulongthsüpuh ha ching lah; kheahang, Atungpuhnü kiulongthsürü khülang nüsa kurungkheak zojihlah.

¹⁴ Nüsanü Atungpuh tresho tüsho api tankihsho tüsho api yu anide Atungpuhnü thiyukhüm jihkhi mazhihsho, tüsho nüsa le nüsa kurungkheak kiulongthsüpuhnü Atungpuh nüsa Thrünpuh yansho, ju atsübah;

¹⁵ tüshe nüsanü Atungpuh yu manide api yukhüm azhihsho, nüsa jipürü kheak azhihkhi nangde Atungpuh khahnü nüsa le nüsa kiulongthsüpuh azhihbah.

¹⁶ Jumonü kheakü nüsa düngde zhipang tüsho Atungpuhnü nüsa mük ki ha ato rhimokhi kheahang.

¹⁷ Khihni ha wheat hi yimluchoh yung de? Inü Atungpuh ki jibah, junangde apinü tsüngmuk tüsho tsüng arüshihbah; tüsho nüsanü Atungpuh miki kiulongthsürü kheangde amütsü rhimokhi tolah de nüsanü angübah.”

¹⁸ Jumonü Samuelnü Atungpuh ki ji, tüsho Atungpuhnü ju nimung tsüngmuk tüsho tsüng arüshih; tüsho mihtsürü alalanü Atungpuh tüsho Samuel khide tre.

¹⁹ Mihtsürü alalanü Samuel ki tha, “Nü yamlarübo thsungkheaknü Atungpuh nü Thrünpuh ki tamkhüntamnüjang, junangde isa müshe; tümüde isa thsungkheaknü kiulongthsürü khülang kheangkhi hode isa neakbo kheak yukajakde alü yihbeaklodo.”

²⁰ Tüsho Samuelnü mihtsürübo ki tha, “Dütre; nüsanü ha amütsü rhimobo alala rhimodo, tütüshe Atungpuh yankhi chingnü dürholo, tüshe nüsa mulong athrünkhinü Atungpuh tankihang;

²¹ tüsho alü mülabe yungsho mükhümkhitbe akeangkeang kukruk lim danguh, tümüde jurübo akeangkeang ah.

²² Tümüde api mung ato dünkheaknü Atungpuhnü amihtsürübo mübahyuk, tümütüsho nüsabo api mihtsürü thsüpü Atungpuhnü asühdo.

²³ Kheaküshe nüsa thsungkheaknü tamkhüntamnüpü tuklokhi hode inü Atungpuh azhihde neak yihbeakpü I kheaknü limshuabahang; tüsho inü nüsa ki atsü tüsho alungki limro thsangyubah.

²⁴ Atungpuh lang treang, tüsho nüsa mulong athrünkhinü api khiukde tankihang; tümüde apinü nüsa thsungkheak tümü ato rhimodünü lümakheahang.

²⁵ Tüshe nüsanü judü lang amütsü rhimosho, nüsa le nüsa kiulongthsüpuh chido phüta bahbah.”