1 SAMUEL 10 - AMÜSÜH HÜM CL Bible (BSI)

¹ Judüki Samuelnü oliv müdangke lubah aku kheak dungkihjih, tüsho api kheak müthsüpbah tha: “Atungpuhnü api yamrüplurüp Israel mihtsürü kurungkheak yakzan shuhpü nü mujude-mokhitdo yung de?

² Küyimki nü khihni I kheaknü chamachihbanü nünü mihtsürü mahne Benjamin lomi, Zelza ching Rachel kiuyuk miki shorubah; anenü nü ki thabah, ‘Nünü yimde ayükhi donkibo ngüdo, tüsho nü buhnü arü le nü thsungkheak mulong sansande: I tsührü thsungkheak I küde athsüba? de athakhi thsü tukloabahdo.’

³ Jushu nünü ju kheaknü ayübah tüsho Tabor sang ki arübah; ju ching mihtsürü mahsam Bethel ching Thrünpuh kilim wuturünü nü shorubah, khülangnü mihnu nunu mahsam, khülangnü yikhap mahsam tüsho khülangnü shihküp qiuqiu de ahanbah.

⁴ Arünü nü ki salüm jihbah tüsho yikhap mahne jihbah, ju nünü aleangkhibah.

⁵ Ju dunglim nü Filistiarü binkheampung Gibeath-elohim ching arübah; ju ching, nü kiuto lim arüchoki, nünü wukihrü bokhüh bingkhung, züpzüppü, khungpi, tüsho bingshang khungde kingaün sadam limnü akikhi shorubah; arübonü müchitmudude aphaparabah.

⁶ Jushu Atungpuh me nü kheak labah, tüsho nü she arü lung müchitmudude akambah tüsho mihtsürü püpü kambah.

⁷ Kheakü küyimki harü amütsanbo nünü ashoruba, nünü tsüde angükhi thsang, tümüde Thrünpuh nü lung lah.

⁸ Tüsho nü I müngühnü Gilgal lim yükibah; jushu taka kingaünpü tüsho laksah-a mungtsü kingaünkhi jihpü I nü kilim akibah. I nü kilim arübah nünü arhimobebo muhuhyichoki nünü nimung thüne aleangang.”

⁹ Api Samuel bahbah anguhchoki, Thrünpuhnü api kilim mulong püpü jih; tüsho amütsan harü alala ju nimung dünjikham.

¹⁰ Küyimki arü ju chingnü Gibeath lim yüde alakhea, wukihrü boto khülangnü api shoru; tüsho Thrünpuh me api kheak la, tüsho api she arü bolung müchitmudude kam.

¹¹ Püpüki api ngürü mihtsürü alalanü küyimki api arü lung müchitmudukhi ngükhea, mihtsürübonü khülangnü khülang ki tha, “ Kish tsührü kheak tümü arüa la? Saul she wukihrü bolung bela de?”

¹² Ju dangpung ching larü mihtsürü khülangnü keokhi, “ Tüsho harü abuh ju shea?” Jumonü, “Saul she wukihrü bolung bela de?” dükhi ha müchitmudu khülang kam.

¹³ Küyimki api müchitmudukhi kheamkhea, apinü awung lim kingaünpung wutu.

¹⁴ Saul akünü api le azübuh ki tha, “Nüke külim yükhea?” Tüsho apinü alo, “Donkibo yimpü; tüsho küyimki ikenü amüngüpü kamkhea, ike Samuel kilim yü.”

¹⁵ Saul akünü tha, “Samuelnü nüke ki tümü thakheanü I ki thaang.”

¹⁶ Saulnü akü ki tha, “Donkibo ngüdo de apinü ike ki thakheah.” Tüshe Samuelnü kiulongthsürü thsüpü dünkheak thakhi apinü tümü mütha.

¹⁷ Samuelnü mihtsürübo Mizpa ching jimukhung

¹⁸ tüsho arü ki tha, “Atungpuh , Israel Thrünpuhnü hanangde thachoh, ‘Inü Israel ju Ijip chingnü bekhit, tüsho inü nüsa Ijiprü tüsho nüsa junokhi kiulongthsübo khah chingnü khümkhit.’

¹⁹ Tüshe khihni nüsanü nüsa Thrünpuh shepünü nüsa thsümütsü dünjikhi tüsho lümthsünübo chingnü khümkhitchonü api bahyuk; tüsho nüsanü tha, ‘Yung! tüshe kiulongthsürü khülang isa kurungkheak zojang.’ Jumonü kheakü nüsanü Atungpuh miki nüsa trükbo tüsho gukbo ayannü mukhungang.”

²⁰ Judüki Samuelnü Israel trük alala phünide bebah arü tüsho Benjamin trük mokhit.

²¹ Apinü Benjamin trük yamkhün phünide bebah arü tüsho Matri yamkhün mokhit; tüsho akheam ching Kish tsührü Saul mokhit. Tüshe küyimki arünü api yimkhea, api müngüde alakheah.

²² Jumonü kheaküshe arünü Atungpuh ki keokhi, “ Mihtsürü ha ching marüyi de?” Tüsho Atungpuhnü alo, “ Kheahang, api hah thsükhi bolung jiklah.”

²³ Jushu arünü alihde yü tüsho ju chingnü api bebah arü. Küyimki apinü mihtsürü bolung zhipkhea, püpürü kheaknü api atoshangbe lakheah.

²⁴ Samuelnü mihtsürü alala ki tha, “Atungpuhnü amokhitkhi ha nüsanü ngüchonah? Api nangde mihtsürü alala bolung she müla.” Tüsho mihtsürü alalanü zhi, “ Kiulongthsüpuh kutsüpshang!”

²⁵ Samuelnü mihtsürübo ki kiulongthsürünü alungki rhimobebo tha; tüsho apinü jurü hüm khülang ching thrüt tüsho Atungpuh miki zojih. Jushu Samuelnü mihtsürü alala nihbuh yam lim thiyiloa yüshih.

²⁶ Saul she api yam lim Gibea ching yü, tüsho api lung Thrünpuhnü mulong qiukhi adüküng bonungrübo yü.

²⁷ Tüshe amüthülünkhi mihtsürü khürünü tha, “ Ha buh mihtsürünü küde thsah isa khümkhitkhukpü?” Arünü api mükhemükim thsü tüsho api kilim thsambah lubah marüjih. Tüshe apinü amüsomürang thsüabah.