1 PETER 3 - AMÜSÜH HÜM CL Bible (BSI)

Niuberübo tüsho Niubuhrübo

¹ Niuberübo, junangde nüsanü nüsa niubuhrü bukkhüp laang, jude athsükhinü khürünü thiyu mania lalashe, thiyu mübede arü niuberü yakli hode arübo kuka lubah,

² tümütüsho nüsa yakli küdükhüh atsangkhit a tüsho wüntrebe lanü arünü angübah.

³ Nüsa jak tsükhi ju aleanglim kuyü müchekhi, suna züt thsükhi, tüsho khimmih atsü yihkhinü dülashih,

⁴ tüshe müdükheakbe mürelung azhihayih bede rama lakhi mihtsürü mulong tüsho Thrünpuh miki shoto, zhikde alakhi me lashang.

⁵ Junangde ahokhi ching Thrünpuh kheak mulonglam larü amüsüh liberübonü arü niubuhrü bukkhüp lakhinü arü jak tsüde kamshih.

⁶ Saranü ju ruk Abraham ki mihyuanide, api ki atungpuh de ji. Tüsho nüsanü alungki rhimosho nüsa ju anihbe tsührübo ah tüsho tümünü she nüsa dütreshih.

⁷ Niubuhrübo, junangde nüsa niuberü lung anikhitkhinü laang, tüsho reangmüzahkhi nüsa atrurü tüsho nüsa lung shoto rhangdung thsambah yamrüplurüp lurü nangde arü ki akin jiang, junangde nüsa tamkhüntamnü tümünü she müzhipdo.

Alungki Rhimo dün Thsünükhi

⁸ Akheam ching, nüsa alalanü, me arihako, lümrhihachihkhi, keoniorü amuzho, mulong athünak tüsho azhihayih lümkhi laang.

⁹ Amütsü müthri amütsü düjihlo yungsho luhsho düluhlo; tüshe judübüdün a müngühjang, tümüde nüsanü müngühmühi ngüpü thsüde nüsa ha ching jikheah.

¹⁰ Amüsühyunü thachoh, “Shepünü rhangdung muzhola tüsho atsü nimungbo ngüpü künlanü amütsü asukpü tüsho akeangyu thapü tuklobeah.

¹¹ Apinü amütsü chingnü rholobah atsü rhimobeah; apinü mungtsü yimbeah tüsho ju müshambeah.

¹² Tümüde thiyuro-lungkirü kheak Atungpuh mükbo lah, tüsho api nükhünbo arü tamkhüntamnükhi lim lah. Tüshe Atungpuh miro amütsü rhimorü azhihde lah.”

¹³ Kheakü nünü atsü rhimopü künsho shenü nü trünthsüpüla le?

¹⁴ Tüshe thiyuro-lungki thsülimnü nü thsünüa lalashe, nü müngühmühibah, sheshe dütre tüsho mulong düsansan.

¹⁵ Tüshe nü mulong ching Khrista ju Atungpuh de wüntre jihang. Nü kheak lakhi mulonglam amütsan thanakpü khürünü akeokhichoki alopü thsüde kamruhroro thsakhambah laang. Tüshe ha azhihayihde tüsho wüntrede rhimoang;

¹⁶ tüsho nü lümkhi müsühde zoang, junangde nü amülim jihchoki, sherünü nü yakli atsü luhmünebanü Khrista ching achih ngübah.

¹⁷ Tümüde amülim rhimopü dün a, Thrünpuh lümkhi thsüsho alungki rhimokhi dün thsünükhi atsübe ah.

¹⁸ Tümüde Khrista she neakbo dünkheaknü thiyuro-mülungkirü dünkheak thiyuro-lungkirü khülangkinü lang ashekheah, junangde shih ching ashekhi kamshihbah me ching arhang lashihde apinü isa ju Thrünpuh kilim bede arüpü lakheah;

¹⁹ shepü hode apinü rihyam ching yübah mebo ki thsangyuthsangra,

²⁰ harünü Noanü sangkung thsüde alachoki adüso nimungbo ching Thrünpuhnü arümkheamde aleangchoki mihyumanikheah. Ju ching anükbe, mihtsürü 8 lang ke chingnü khümkhit,

²¹ tüsho ha ke ju kheakü nüsa khümkhitkhi baptikhi amütsan lah–pang chingnü dükhüh throa bahkhi yung tüshe Thrünpuh kilim lümkhi atsünü thiyuchihchimkhi lah. Jisu Khrista arhang kamlokhi hode nüsa khümkhitchoh,

²² shepü yinmi ching yü tüsho Thrünpuh khah tsülim la–yunirübo lungnü, thiyukhüm-sühmüh tüsho wubonü api ki anide lah.