1 PETER 2 - AMÜSÜH HÜM CL Bible (BSI)

Arhang Lung tüsho Amüsüh Trükshih

¹ Jumonü lungchihkhi alala, rükmütsü alala, yiuhkhapkhi, mükthsükhi, tüsho dünthamungtha bahang.

² Aso zübekhi khungarübo nangde, me niuhke müthsün yungang, junü nüsa akhümkhit ching zokihbah;

³ tümüde nüsanü Atungpuh mihmuzho tsahkeakheahdo.

⁴ Mihtsürünü abahyukkhi tüshe Thrünpuhnü amokhitkhi tüsho api ki shoto lakhi arhang lung kilim arang;

⁵ tüsho amüsüh amükeamrü thsüpü Jisu Khrista hode Thrünpuh kilim aleangkhikhukbe me shuhmülanga kingaünkhi jihpü nüsabo arhang lungbo nangde me yam ching thüyam thsang.

⁶ Tümüde amüsühyu ching ha thachoh, “Kheahang, amokhitkhi tüsho shoto lung khülang inü Zion ching zochoh, tüsho shepü api kheak kinbanü achih müngü.”

⁷ Jumonü nüsa akinrübo ki api ju shoto ah, tüshe amükinrü thsungkheak, “Thüyam-thsürünü abahyukkhi lung thsü amühit-lung adungtobe kamdo,”

⁸ tüsho “Arü jing mükhebe lung khülang, arü angakshihbe lungto khülang”; arü jing mükhechoh tümütüsho Thrünpuhnü alümjihkhi nangde arünü thiyu mani.

⁹ Tüshe nüsa amokhitkhi trük, kiulongthsü amükeamrü, amüsüh trükshih, Thrünpuh mihtsürü, junangde amiting chingnü nüsa amüyinsahbe ayin ching jikhitkhi amüyinsahbe api rhimobo nüsanü akhipkhitbah.

¹⁰ Khülangki nüsa Thrünpuh mihtsürü yungde alakheah, tüshe kheaküa nüsa api mihtsürü ah; khülangki nüsanü mihmüthsüm müleangkhide alakheah tüshe kheaküa nüsanü mihmüthsüm leangkhido.

Thrünpuh Azhorübo

¹¹ I müyamrübo, nüsa hanrü tüsho tsotsahrü a le nüsa me azhihde thirithsükhi shihkünkhi ching danyukang de nüsa ki tuthsukchoh.

¹² Khiungkerü bolung tsüde rhimoang, junangde arünü nüsa azhihde amülim rhimorü ah de thasho, api arü nimung arünü nüsa rhimobo atsü ngübah tüsho Thrünpuh müretahbah.

¹³ Atungpuh thsülimnü nüsanü mihtsürü thiyukhüm-sühmüh aban bukkhüp laang: thiyukhüm-sühmüh atobe kiulongthsürü,

¹⁴ yungsho amülim rhimorü thsümüchipü tüsho alim rhimorü shijihpü apinü thiyikhi kovünorbo.

¹⁵ Tümüde alim rhimokhinü makha mihtsürü yakli mümükheahde athakhi nüsanü zhikde akamshihpü Thrünpuh lümkhi lah.

¹⁶ Zuzu mihtsürü nangde laang, tüshe nüsa zuzu ju amütsü thsungkheak ahoripü yung; Thrünpuh yamlarü nangde laang.

¹⁷ Mihtsürü alala wüntreang, keoniorü muzhoang, Thrünpuh treang, tüsho kiulongthsürü wüntreang.

Khrista Thsünükhi Amütsan

¹⁸ Yamlarübo, nüsa putungrübo, muzhode tüsho amüthsümrü ki lang yung tüshe amüküprü ki she khide wüntre jihang.

¹⁹ Mihtsürü khürünü alim-mülakhi thsünü ching arümsho api athülünkhi lah tümütüsho apinü Thrünpuh anikhitlah.

²⁰ Tümütüsho nüsanü amülim rhimobah ju dün arümkhi nüsa tsakamkhi tümü la? Tüshe küyimki nüsanü alim rhimobah ju dün thsünükhi arümbanü Thrünpuh miki nüsa mungshipü lah.

²¹ Tümüde nüsa ha ching jikheah, tümütüsho nüsanü api jingshu ching yanpü amütsan zojihde Khrista she nüsa dünkheaknü thsünü.

²² Apinü neak müyihbeak; amünnü akeangyu mütha.

²³ Küyimki api luhkheanü, apinü muluhlo; küyimki api thsünükheanü, apinü mümüzün; tüsho thiyuro mahkhapbuh kheak apinü mulonglam la.

²⁴ Isanü neak ching shebah thiyuro-lungki ching lapü thsüde apinü anihbuh pang chingnü sangdung kheak isa neakbo han. Api mübo hode nüsa thsüngu.

²⁵ Tümüde nüsa tsokhide alakhi namfimihnubo lakheah, tüshe kheakü nüsa me kümrü namfimihnu neakrü kilim rholodo.