1 KORINT 7 - AMÜSÜH HÜM CL Bible (BSI)

Yamkhün Thsükhi dünkheak Keokhikhibo

¹ Kheakü nüsanü athrütkhi dünkheak. Athrürü khülangnü yamkhün müthsükhi ju atsü ah.

² Tüshe müzammüram rükaki lakhi hode athrürü abannü nihbuh niuberü tüsho aliberü abannü nihbe niubuhrü labeah.

³ Niubuhrünü niuberü alim yihnüpü lakhi rhimobeah, tüsho niuberünü niubuhrü ki junangde athsübeah.

⁴ Tümüde niuberünü nihbe pang kurungkheak atungrü müthsü, tüshe niubuhrünü ahorichoh; junangde niubuhrünü nihbuh pang kurungkheak atungrü müthsü, tüshe niuberünü ahorichoh.

⁵ Nüsanü shuhmülanga jihde tamkhüntamnüpü baplapkhi kim kheak hode khülangnü khülang ki darochih; tüshe jushu shoruachihloang, jude yungsho zangrü müdanyukkhi hode amüneannü nüsa rükakibah.

⁶ Inü ha thiyukhümnü yungde alungki lakhi limronü thachoh.

⁷ Alala I ruk lakhülaa de inü lümchoh, tüshe mihbüm aban Thrünpuh kilimnü thsambah büthsüthsü, khülang kilim khülang tüsho püpü kilim püpü de lah.

⁸ Yamkhün mükamrü tüsho khimoberü ki I nangde langzü lasho tsülah de inü thachoh.

⁹ Tüshe arünü nihbuh küdah thsüde müdankhuksho, arünü yamkhün thsübeah. Tümüde mulong phurude alapü dün a yamkhün thsükhi atsübe ah.

¹⁰ Yamkhün kamrü, niuberünü niubuhrü kheaknü müchambeah de inü yungde Atungpuh yukhüm jihchoh.

¹¹ Tüshe anihbenü jude thsüsho, alibe ju mürhangde alabeah yungsho aniubuh ki chingkihbeah. Tüsho niubuhrünü nihbuh niuberü mübahbeah.

¹² Püpürü ki Atungpuhnü yungde inü thachoh: Keoniorü khürü amükinrü niuberü lasho tüsho alibenü api lung lapü mulongsho, apinü anihbe mübahbeah.

¹³ Tüsho keonioberü khürü amükinrü niubuhrü lasho, tüsho apinü anihbe lung lapü mulongsho, alibenü api kheaknü müchamkhibeah.

¹⁴ Tümütüsho amükinrü niubuhrü ju aniube hode müsühkhitchoh, tüsho amükinrü niuberü ju aniubuh hode müsühkhitchoh. Jude yungsho, nüsa tsührübo mümüsühde alabah, tüshe ha hode arü amüsüh ah.

¹⁵ Tüshe amükinrü yamkhünrünü chamachihpü künsho, jude thsüshang; hadürü ching niubuhrü yungsho niuberü rhüka müla. Tümüde Thrünpuhnü nüsa mungtsü ching lapü jikheah.

¹⁶ Niuberü, nünü nü niubuh khümkhitba shi yungnü küde thsah mükheahla? Niubuhrü, nünü nü niube khümkhitba shi yungnü küde thsah mükheahla?

Thrünpuhnü Nü Jikhi nangde Laang

¹⁷ Mihbüm abannü Atungpuhnü api kilim thsambah jihkhi tüsho Thrünpuhnü api jichoki nangde alabah. Ha borü alala ching I yuzüng lah.

¹⁸ Khürü api jikhi kim ching tsütabah-a lakhea de? Apinü tsütabahkhi areak yihkhita bahpü dümürang. Khürü api jikhi kim ching tsütamübah-a lakhea de? Apinü tsütabahpü dümürang.

¹⁹ Tümütüsho tsütabahkhi yungsho tsütamübahkhi yungde Thrünpuh yuzüng zokhi khechoh.

²⁰ Mihbüm abannü nihbuh jichoki nangde alabeah.

²¹ Ajichoki nü azhorü lakhea de? Masühde düla. Tüshe nü zuzu ngükhuka lasho, jude laang.

²² Tümüde shepü azhorü thsüde Atungpuhnü ajikheanü Atungpuh zuzu mihtsürü ah. Junangde ajichoki shepü zuzu lakheanü Khrista yo azhorü ah.

²³ Nü ju amo jihbah athulokheah; mihtsürü yo azhorü dükam.

²⁴ Jumonü keoniorübo, mihbüm aban künangde alachoki jikhea, api Thrünpuh lung lashang.

Yamkhün Mükamrü tüsho Khimoberü

²⁵ Kheakü yamkhün mükamrü dünkheak Atungpuh yukhüm müla, tüshe Atungpuh mihmüthsüm mulonglam hode I lümkhi jihchoh.

²⁶ Kheakü lümthsünü lakhi yandüa mihtsürü khülang ju api künangde lanü ju ruk lakhi atsübe ah de inü lümchoh.

²⁷ Nü niuberü la shi? Abahpü dümürang. Nü yamkhün müthsü shi? Yamkhün thsüpü dümürang.

²⁸ Tüshe nü yamkhün thsüsho nünü neak müyihbeakchoh, tüsho aliberü khülang ju rhangsho anihbenü neak müyihbeakchoh. Tüshe sherü yamkhün thsüchonü alomi küpkhukbo labah, tüsho inü ju chingnü nüsa tsokhitshihnelah.

²⁹ Keoniorübo, ju amütsan akhukhi kim khide khihabahdo; kheakünü rünbah sherü niuberü lanü arünü mülakhi nangde,

³⁰ tüsho sherü tüzhochonü, arünü mütüzhokhi nangde, tüsho sherü asühachihchonü, arünü masühachihkhi nangde, tüsho sherü thulochonü, arünü kukruk mülakhi nangde,

³¹ tüsho sherünü alomi kukruk ahorichonü, arünü mahorikhi nangde laang. Tümüde kheakü alomi hode tsochoh.

³² Inü nüsa mulong sansan chingnü zuzu kamshihnelah. Yamkhün mükamkhi mihtsürünü künangde Atungpuh asühshihbanü de Atungpuh rhimo dünkheak mulong sansanchoh;

³³ tüshe yamkhün kamkhi mihtsürünü, künangde aniube asühshihbanü de alomi rhimo dünkheak mulong sansanchoh,

³⁴ tüsho api lümkhi lümtrüp thsülah. Tüsho mürhangkhi liberü yungsho anünürünü, künangde pang tüsho me ching amüsüh laba de Atungpuh rhimo dünkheak mulong sansanchoh; tüshe arhangkhi liberü a künangde aniubuh asühshihbaki de alomi rhimo dünkheak mulong sansanchoh.

³⁵ Inü ha nüsa rhüka lapü yungde nüsa tsüpü thachoh, junangde nüsanü Thrünpuh kilim shuhmülanga jihkhi ching müchammüzütde alungki limro ching labah.

³⁶ Khürünü anihbuhnü thiyu zokhi anünürü ki yakli mülakhi rhimochoh de lümsho, tüsho apinü mulong phurude yamkhün thsübeah de lümsho, apinü akünkhi rhimoshang, apinü neak müyihbeak. Ane yamkhün kamshang.

³⁷ Tüshe shepünü anihbuh lümkhi ching adüngakhi la, shepü animkihkhi khüp mülacho tüshe nihbuh lümkhi kurungkheak adanyukkhi la, tüsho shepünü anünübe ju mulupü lümkihlanü, apinü alungki rhimochoh.

³⁸ Junangde shepünü anünübe luchonü alungki rhimochoh, tüshe shepünü alibe mulunü atsüdakbe rhimochoh.

³⁹ Niuberü ju aniubuh la khiungdüa zuzu müla. Aniubuh shesho, alibenü amulongkhi Khristanrü ki lang arhangpü zuzu labah.

⁴⁰ Tüshe alibe ju ruk lang alakhipü anihbe asühbe labah de inü lümchoh. Tüsho I a Thrünpuh Me lah de inü lümchoh.