1 KORINT 3 - AMÜSÜH HÜM CL Bible (BSI)

Thrünpuh Tankihrübo

¹ Tüshe keoniorübo, inü nüsa ki me ching azorü mihtsürü ki nangde yung, tüshe alomi mihtsürü, Khrista ching khungarü ki nangde asukdo.

² Inü nüsa kilim amüküp yungde niuhke duh; tümüde nüsanü ju leangkhipü mukukyi; tüsho kheaküshe nüsa müthsakham,

³ tümüde nüsa kheakü khiungde shih kilim lah. Tümütüsho nüsa bolung mükthsü tüsho rukachih lachoki, nüsa shih kilim yung de tüsho mihtsürü yancho nangde yakli huhchoh yung de?

⁴ Küyimki nüsa khülangnü, “I Paul ruyanrü,” tüsho püpürünü, “I Apollo ruyanrü,” de athaba, nüsa ju mihtsürü dümung lang yung de?

⁵ Dale tüsho Apollo ju tümü a? Paul ju tümü a? Atungpuhnü mihbüm aban thiyikhi nüsanü arü hode akinkhi tankihrübo lang ah.

⁶ Inü khim, Apollonü ke duh, tüshe Thrünpuhnü toshih.

⁷ Jumonü shepünü khimcho yungsho shepünü ke duhchonü tümü she yung, tüshe atoshihbuh ju Thrünpuh ah.

⁸ Shepünü khimcho tüsho shepünü ke duhchonü ane rukhüh ah, tüsho mihbüm aban api rhimo ayannü mihkhah dün leangkhibah.

⁹ Tümüde isa ju Thrünpuh thsungkheak rukhüh rhimorü ah; nüsa ju Thrünpuh lu, Thrünpuh yam ah.

¹⁰ Thrünpuh amüthsüm I kilim jihkhi ayannü, athsüsorü khülang nangde inü khimtan thsü, tüsho püpürü mihtsürünü ju kheak thsükihchoh. Mihtsürü abannü künangde apinü ju kheak thsükihchonü kümkangang.

¹¹ Tümüde Jisu Khrista khimtankhi kheak hode shenü she püpü khimtan müthsükhuk.

¹² Kheakü khürünü khimtan kheak ju suna, shotoyinchi, shotolungbo, sang, rim tüsho müneangnü thsüsho,

¹³ mihtsürü aban rhimo amikheak akhiukbah; nimungnü ju lahkhita huhbah, tümütüsho ju monü akhiuka huhbah, tüsho rhimokhi aban küdürüanü monü thsahakheahbah.

¹⁴ Mihtsürü khürünü khimtan kheak rhimokhi aninga lasho, apinü thsambah khülang leangkhibah.

¹⁵ Mihtsürü khürü rhimo aniuabahsho ju adükheakbah; tüshe api a mo chingnü tsokhitde akhümkhitbah.

¹⁶ Nüsa ju Thrünpuh arüngyam tüsho Thrünpuh Me nüsa kheak lachoh de nüsanü mümükheah de?

¹⁷ Khürünü Thrünpuh arüngyam thsümünimsho, Thrünpuhnü api thsümünimbah. Tümüde Thrünpuh arüngyam amüsüh, tüsho ju arüngyam nüsa ah.

¹⁸ Sheshe nihbuh küdah thsüde düthsungyukshih. Nüsa bolung khürünü ha lün ching api lümlung larü ah de lümsho, api makharü kamshang, junangde api lümlung larü kambah.

¹⁹ Tümütüsho ha lomi lümlung ju Thrünpuh miki makhakhi lah, tümüde ha thrüta lah, “Apinü arü rükri chingnü lümlung tholochoh,”

²⁰ tüsho kheaküshe, “Lümlung larü lümkhibo akeangkeang de Atungpuhnü mükheahlah.”

²¹ Shenü she mihtsürü dünkheak dükükheang. Tümütüsho alala nüsa yo ah:

²² Paul, Apollo, Kephas, alomi, rhangdung, ashepü, kheakü yungsho arübe thsüthsü alala nüsa yo ah;

²³ tüsho nüsa ju Khrista yo; tüsho Khrista ju Thrünpuh yo.