1 KORINT 16 - AMÜSÜH HÜM CL Bible (BSI)

Akinrübo Rungpü Kingaün

¹ Kheakü akinrü rungpü threzüthredo thsungkheak ju, inü Galatia borübo ki thakhi nangde rhimoang.

² Amu-khip akhuhbe nimung nüsa mihbüm abannü nihbuh lalim ayannü tümükhüh zomukhungang, junangde küyimki I arübanü müthrezüthredo.

³ Tüsho küyimki I arübanü, nüsanü tsülah dükhi mihtsürübo ki huhtan kihüm jihbah tüsho nüsa thsambahbo hanbah Jirusalem lim yüshihbah.

⁴ I she ayüpü yihnüpü kamsho, arü I lung yübah.

Paul Lümkhi

⁵ Inü Macedonia ho dunglim nüsa rhuakheahbah, tümüde I Macedonia hopü lümkhi lah,

⁶ Khükia I nüsa lung anükhühkheak mungpü labah, yungsho tsüngkam she amungbah, junangde I kürü ching yübanü I hantsah ching nüsanü arungbah.

⁷ Tümüde kheakü aholim inü nüsa mushorune; Atungpuhnü mülüsho, kim anükhüh nüsa lung mungpü mulonglam lah.

⁸ Tüshe I thünimni-thünio khiungde Efisia ching mungbah,

⁹ tümütüsho ju ching I azhihrü hihde lalashe kukzam rhimopü thsüde I kilim ripit mülihde khimshuh-a lah.

¹⁰ Küyimki Timothi arübanü, nüsa bolung api mütrede lashang, tümüde api ju I nangde Atungpuh rhimo thsüchoh.

¹¹ Shenü she api mükhemükim düthsü. Api I kilim alode arüpü thsüde mungtsü chingnü alimro ching yüshang. Keoniorübo lungnü arüpü inü mükkin thsülah.

¹² Isa keoniorü Apollo ju, keoniorü püpürü bebah nüsa rhuakheahpü inü api ki khide tuthsukdo, tüshe kheakü arüpü apinü müküntsan; tütüshe kim tsüchoki api arübah.

Akheam Yubo

¹³ Kurhangang, akin ching düküngde zhipang, mulong toang, reangzahang.

¹⁴ Lüpdükhi amuzho ching rhimoang.

¹⁵ Keoniorübo, Akaia ching Stephana yamkhün akhuh mulong müthri, tüsho akinrü tankihpü ching arünü shuhmülanga jihdo de nüsanü mükheahlah;

¹⁶ harü mihtsürü tüsho rukhüh rhimorü le kimthsürü aban ki akinashu lapü nüsa ki tuthsukchoh.

¹⁷ Shephana le Fortunata tüsho Akaiaka arükhi I asühchoh tümütüsho nüsa mülakhi arünü lamlamjih.

¹⁸ Tümütüsho arünü I tüsho nüsa me reangzahshih. Hadürü mihtsürü mükheahpü athülün lah.

¹⁹ Asia borübonü salüm mühahchoh. Aquila le Priscilla tüsho arü yam ching mukhungkhi borübonü Khristan amuzho salüm mühahchoh.

²⁰ Keoniorü alalanü salüm mühahchoh. Amüsüh mün müthsüpkhinü khülangnü khülang ki salüm jihachihang.

²¹ I, Paul ha salüm I khahnü thrütchoh.

²² Khürü Atungpuh thsungkheak amuzho mülasho, api muthrumüneanshang. O Atungpuh, arang!

²³ Atungpuh Jisu amüthsüm nüsa lung laang.

²⁴ Jisu Khrista ching I muzho nüsa alala lung laang. Amen.