1 KORINT 12 - AMÜSÜH HÜM CL Bible (BSI)

Amüsüh Me Thsambahbo

¹ Keoniorübo, kheakü me thsambahbo dünkheak nüsanü mümükheahde mülashihne.

² Küyimki nüsa amükinrü lakheanü limro alala ching aduh sangthsübo kilim bephülapkheah de nüsanü mükheahlah.

³ Jumonü shenü she Thrünpuh Me hode atharünü a, “Jisu muthrumüneanshang,” de müthachoh tüsho Amüsüh Me hode yungsho shenü she, “Jisu ju Atungpuh,” de müthachoh de nüsanü anikhitshihnelah.

⁴ Thsambahbo aphuaphu lah, tüshe Me rukhüh;

⁵ tüsho tankihpü aphuaphu lah, tüshe Atungpuh rukhüh;

⁶ rhimo aphuaphu lah, tüshe arü aban kheak athsükhukpü jihkhi Thrünpuh rukhüh.

⁷ Rukhüh tsüpü thsungkheak Me akhiuka huhkhi mihbüm aban kilim jih-a lah.

⁸ Khülang kilim Me hode lümlung yu jih-a lah, tüsho püpü khülang kilim ju Menü mükheahmudu yu jih-a lah,

⁹ püpü kilim ju Me rukhühnü akin, püpü kilim Me khülang tüsho rukhühnü athsüngupü thsambah,

¹⁰ püpü kilim khinthiyinbe rhimopü, püpü kilim müchitpü, püpü kilim mebo dükeak kheahkhitkhukpü, püpü kilim thiyutha aphuaphu, püpü kilim thiyuthabo thanakpü lah.

¹¹ Harü alala Me khülang tüsho rukhüh rhimo ah, tüsho apinü alümkhi yande mihbüm aban kilim jihchoh.

Pang Khülang kheak Achamnakbo

¹² Pang khülang tüsho achamnak ahihdo, pang yo achamnak ahihdo lalashe pang khülang lakhi nangde Khrista she ju ruk ah.

¹³ Tümütüsho Jihudarü yungsho Greekrü, azhorü yungsho zuzu larü thsüthsü isa alala pang khülang ching Me khülangnü baptijih tüsho Me khülang yungshih.

¹⁴ Tümütüsho pang ching achamnak khülang lang yung tüshe ahihdo lah.

¹⁵ Jingnü, “Tümütüsho I a khah yungle pang yo yung,” de athamonü ju pang yo yung düpü?

¹⁶ Tüsho nükhünnü, “Tümütüsho I a mük yungle pang yo yung,” de athamonü ju pang yo yung düpü?

¹⁷ Pang abümnü mük thsükhülaa, asopü küching laba? Abümnü asopü thsükhülaa, amünimpü küching laba?

¹⁸ Tüshe kheakü Thrünpuhnü apinü amulongkhi nangde pang ching achamnakbo büthsüthsü zojih.

¹⁹ Tüsho arü alala mungji khülang lang thsükhülaa, pang küching laba?

²⁰ Kheakü achamnak ahihdo lah, tütüshe pang khülang.

²¹ Tüsho müknü khah ki, “Inü nü yihnüpü müla,” yungsho kunü jing ki, “Inü nü yihnüpü müla,” de athapü mukuk.

²² Jude yung, pang ching achamnak lung akheamkhibe nangde alakhi ju adungto ah.

²³ Tüsho pang yo achamnakbo isanü akheamkhibe nangde alümkhibo kheak isanü tode wüntre jihchoh; tüsho pang ching makhamaleakbo isanü kümchoh,

²⁴ tahle akhamkhi achamnakbo tsüde akümpü yihnüpü müla. Tüshe Thrünpuhnü pang yo achamnakbo hanru tüsho achamnakbo akheamkhibe kilim wüntre atobe jih,

²⁵ junangde pang ching achammüzüt müla, tüshe achamnakbo khülangnü khülang rukhühnü kümachihbah.

²⁶ Achamnak khülang thsünüsho, alala rukhüh thsünüchoh; achamnak khülang wüntre jihsho, alala rukhüh asühachihchoh.

²⁷ Kheakü nüsa ju Khrista pang ah tüsho mihbüm abannü ju lung shihcham ah.

²⁸ Tüsho Thrünpuhnü borü ching akhuhde amüsüh-thsangyurübo moyuk, mahnepü wukihrübo, mahsampü thsangyurübo, jushu khinthiyinbe rhimorü, jushu athsüngurü, arungachihrü, kiuthsürü, thiyutha aphuaphu ching tharübo.

²⁹ Arü alala amüsüh-thsangyurübo a de? Arü alala wukihrübo a de? Arü alala thsangyurübo a de? Alalanü khinthiyinbebo rhimocho de?

³⁰ Alala athsüngupü thsambah la shi? Alalanü thiyuthabo thacho shi? Alalanü thanakcho shi?

³¹ Tüshe achangbe thsambah thsungkheak mushude künang. Tüsho kheaküshe inü nüsa kilim atsüdak limro huhbah.