1 KORINT 11 - AMÜSÜH HÜM CL Bible (BSI)

¹ Inü Khrista kheahkhikhi nangde, I kheahkhiang.

Kingaünkhi ching Ku Dukiukhi

² Lüpdükhi ching I lümkhitkhi tüsho nüsa ki thsangyukhi ching yankhi dünkheak inü nüsa shijihchoh.

³ Tüshe mihtsürü aban kurungkheak aku ju Khrista, aliberü kurungkheak aku ju aniubuh, tüsho Khrista kurungkheak Thrünpuh ah de nüsanü anikhitshihnelah.

⁴ Athrürü shepünü ku dukiubah tamkhüntamnücho yungsho müchitchonü Khrista wüntre müjihchoh,

⁵ tüshe aliberü shepünü ku müdukiude tamkhüntamnücho yungsho müchitchonü aniubuh wüntre müjihchoh–ju anihbe ku hüta bahkhi ruk ah.

⁶ Tümütüsho alibenü müdukiusho anihbenü kuyü nipa bahshang; tüshe aliberü thsungkheaknü nipa bahpü yungsho hüta bahpü ju achihbe thsüsho, anihbenü ku dukiube yihshang.

⁷ Tümüde athrürünü api ku müdukiubeah; tümütüsho Thrünpuh kiphahkhi tüsho müretahkhi lah; tüshe aliberü a athrürü müretahkhi lah.

⁸ Tümüde athrürü ju aliberü kheaknü athrünkhi yung, tüshe athrürü kheaknü aliberü thrünkheah.

⁹ Yungsho aliberü thsungkheak athrürü thrünkhi yung, tüshe athrürü thsungkheak aliberü thrünkheah.

¹⁰ Jumonü yunirübo dünkheaknü aliberünü ku kheak adukiube yihkihbeah.

¹¹ Judüalalashe, Atungpuh lung aliberü ju athrürü kheaknü, yungsho athrürü ju aliberü kheaknü zuzu müla;

¹² tümütüsho aliberü ju athrürü kheaknü thrün, junangde kheakü athrürü ju aliberünü zübekhi lah. Tüsho lüpdükhi Thrünpuh kilimnü lah.

¹³ Nüsa thsungkheak thiyukhapang; aliberünü ku müdukiude Thrünpuh ki tamkhüntamnükhi ju alungki a de?

¹⁴ Athrürünü kuyü shangde awokhi ju nihbuh mungchih ah de mihnü nüsa ki müthsangyucho de?

¹⁵ Tüshe aliberü kuyü ashang wosho, ju anihbe akhampü ah. Tümüde alibe kuyü ju anihbe phudopü jihkheah.

¹⁶ Tüshe khürünü ha dünkheak atsangachihpü mulongsho, isa yungsho Thrünpuh borübo thsüthsü kingaünkhi ching ahoribe püpü müla.

Atungpuh Thünio

¹⁷ Judüalalashe, thsangdanpü lakhibo ching inü nüsa müshijih, tümütüsho nüsa kingaünpü mukhungkhi ju atsü yungde alü amütsü lah.

¹⁸ Akhuhbe ching, nüsa borü mukhungchoki, nüsa bolung achamnak lah de inü sochoh tüsho inü she anükhüh akin lah.

¹⁹ Tümüde nüsa bolung achamnakbo labah, junangde alim larübo mütsanbah.

²⁰ Küyimki nüsa rukhüh mukhungbanü, nüsanü atsühkhi ju Atungpuh thünio yung.

²¹ Tümütüsho yimtsühchoki mihbüm abannü müngüh ajinde nihbuh jim tsühchoh, tüsho khürü a khümlah tüsho püpürü a müshanga lah.

²² Nüsa tsühyungpü thsüde thüyam müla de? Yungsho nüsanü Thrünpuh borü mükhemükimcho de tüsho tümü mülarü junocho de? Inü nüsa ki tümü thaba? Inü ha thsungkheak nüsa shijihba shi? Yung, inü jude müthsü.

²³ Tümüde inü nüsa kilim jihkhi ju Atungpuh kilimnü leangkhi, junangde api yinatsühkhi tsüngre Atungpuh Jisunü yikhap lu,

²⁴ tüsho küyimki apinü makshe jihkheanü yihnak tüsho tha, “Ha athsümünimkhi I pang ah. I lümkhitde ha rhimoang.”

²⁵ Junangde yimtsüh dunglim apinü pung lubah tha, “Ha pung I thiyih ching tangzüng aso ah. Nüsanü ayung aban I lümkhitde ha rhimoang.”

²⁶ Tümüde nüsanü küdükhüh ki ha yikhap tsühba tüsho pung yungbanü api arü khiungde Atungpuh shekhi dünkheak zhiyukjang.

²⁷ Jumonü sherünü müthülünkhi yakli chingnü yikhap tsühba yungsho pung yungbanü Atungpuh pang tüsho thiyih azhihde neak yihbeakkhi amülim labah.

²⁸ Mihtsürü abannü yikhap mütsühyide tüsho pung muyungyide nihbuh akeakheahbeah.

²⁹ Tümütüsho shepünü Atungpuh pang mümütsande tsühcho tüsho yungchonü nihbuh kheak thiyukhap hande arüchoh.

³⁰ Jumonü nüsa ahihkhüh yiuhyiuhlah tüsho tukthsülah, tüsho khürü shedo.

³¹ Tüshe isanü nihbuh akeakheah-a lasho, isa yumükhap.

³² Tüshe küyimki Atungpuhnü isa yukhapbanü, isa danyuka lah, junangde alomi lung isa mübahyuk.

³³ Jumonü keoniorübo, küyimki nüsa tsühyungpü mukhungbanü aleangachihang.

³⁴ Khürü khüma lasho, api thüyam ching yimtsühshang, jude yungsho nüsa rukhüh mukhungkhi ju abahyukkhi kambah. Tüsho küyimki I arübanü khuhlangahuhkhi püpü jihbah.