1 KORINT 10 - AMÜSÜH HÜM CL Bible (BSI)

Sangthsübo azhihde Athakhi

¹ Keoniorübo, isa jipürübo amo khüp lakheah, tüsho alalanü keto hokheah de nüsanü lümkhitshihnelah,

² tüsho alala amo tüsho keto ching Mosa lung bapti,

³ tüsho alalanü rukhüh me jim tsüh

⁴ tüsho alalanü rukhüh me yungbe yung. Tümüde arünü arü lung yükhi me Lung chingnü yung, tüsho Lung ju Khrista lakheah.

⁵ Judüalalashe, arü ahihdo kheak Thrünpuhnü masühde alakheah; tümüde arübo sunglo ching hiumüzütshih.

⁶ Kheakü harü ha arünü amütsü rhimokhi nangde mükünpü isa thsungkheak dühdükhi lah.

⁷ Arü khürü nangde sangthsü kingaünrü düthsü; ha thrüta lah, “Mihtsürübonü binbah tsühyung tüsho atsünpü wusu.”

⁸ Arü khürünü rhimobah nimung khülang chingnü 23,000 keamkhi nangde isanü müzammüram ching mümüneanbeah.

⁹ Arü khürünü rhimobah phurutonü arü mukiusahkhi nangde isanü Atungpuh rükmakibeah;

¹⁰ yungsho arü khürünü rhimobah athsümünimrünü adükheakshihkhi nangde isanü matsangnü.

¹¹ Kheakü arübo ki harü atünadopü dünji, tüshe akheam lün arüa larü isabo thsungkheak thsangdanpü harü thrüt.

¹² Jumonü shepünü zhiplah de lümchonü mulungpü thsüde kümkangang.

¹³ Mihtsürü kheak müdünjikhi nüsa kilim tümü rükaki marü. Thrünpuh ju thiyuro, tüsho apinü nüsa sühmüh kheak hode rükmakishih, tüshe rükaki lungnü she atsokhitpü jihbah, junangde nüsanü ju arümkhukbah.

¹⁴ Jumonü inü amuzhorübo, sangthsübo kingaünpü bahkhiang.

¹⁵ Anikhit mihtsürü ki nangde inü asukchoh; inü tümü thachonü nüsa thsungkheak mütsanmükhiang.

¹⁶ Isanü müngühjihkhi müngühmühi pung ju Khrista thiyih ching shihcham lukhi yung de? Isanü ayihnakkhi yikhap ju Khrista pang ching shihcham lukhi yung de?

¹⁷ Tümütüsho yikhap khülang a le, isa ahihkhüh ju pang khülang ah, tümüde isa alalanü yikhap khülang chingnü lang chamachihchoh.

¹⁸ Israel mihtsürü lümakheahang; sherünü shuhmülanga kingaünkhi tsühchonü kingaün sadam ching shihcham-lurü yung de?

¹⁹ Dale tüsho sangthsü kilim shuhmülanga kingaünkhi ju tümükhüh a shi, yungsho sangthsü tümükhüh a?

²⁰ Yung, tüshe amükinrünü shuhmülanga kingaünkhi ju arimribo kilim jihchoh tüsho Thrünpuh kilim yung. Inü nüsa ju arimribo lung atruachihrü müthsüshihne.

²¹ Nüsanü Atungpuh pung tüsho arimri pung muyungkhuk. Nüsanü Atungpuh tüsho arimribo dükhüm kheak müyimtsühkhuk.

²² Isanü Atungpuh mükthsüshihba shi? Isa api kheaknü amürangbe a de?

²³ “Alala amülübe lah,” tüshe alala alü thsübe yung. “Alala amülübe lah,” tüshe alala a athsülim yung.

²⁴ Shenü she nihbuh tsüpü yung tüshe nihbuh yamhingrü tsüpü yimang.

²⁵ Tümüpürü shih yinpung ching yinchonü lümzülümdo dünkheaknü tümü dükeokhide tsühang.

²⁶ Tümüde alomi tüsho ju ching lüpdükhi Atungpuh yo ah.

²⁷ Amükinrü khülangnü nü yimtsühpü jisho tüsho ayüpü nünü pungkhisho, lümzülümdo dünkheaknü tümüpürü nü miki shua zojihlanü tümü dükeokhide tsühang.

²⁸ Tüshe khürünü nü ki, “Ha shuhmülanga kingaünkhi ching jihkheah,” de thasho nü ki thabuh mihtsürü tüsho lümzülümdo dünkheaknü ju dütsüh–

²⁹ nü yungde püpü mihtsürü lümzülümdo. Tümüde püpürü lümzülümdonü I zuzu lakhi thiyukhapshihpü?

³⁰ Inü makshe jihde tsühyungpü ching shihcham lusho, inü Thrünpuh ki makshe jihkhi thsungkheak tümü thsükhi I chikhipü la?

³¹ Jumonü nüsanü tsühtsüh she tüsho yungyung she, yungsho tümüpürü rhimobanü, alala Thrünpuh müretahpü rhimoang.

³² Jihudarü, Greekrü yungsho Thrünpuh borü sheshe jing dümükheshih–

³³ lüpdükhi limro ching inü she mihbüm aban asühshihpü mürangchoh. Tümüde inü I tsüpü yung tüshe arübo khümkhitpü thsüde ahihdo tsüpü yimchoh.