1 KORINT 1 - AMÜSÜH HÜM CL Bible (BSI)

¹ Jisu Khrista amüsüh-thsangyurü thsüpü Thrünpuh lümkhinü ajikhi Paul, tüsho isa keoniorü Sosthena kilimnü,

² Korint ching lakhi Thrünpuh borü, arü tüsho isa Atungpuh Jisu Khrista mung jikhi dangpung aban ching alala lung amüsührü thsüpü rukhüh jikhi Jisu Khrista ching tsangkhitrü kilim:

³ Isa Abuh Thrünpuh tüsho Atungpuh Jisu Khrista kilimnü nüsa kilim amüthsüm tüsho mungtsü lashang.

Khrista ching Müngühmühi

⁴ Khrista hode nüsa kilim jihkhi Thrünpuh amüthsüm dünkheak kamruhroro inü nüsa thsungkheak Thrünpuh kilim makshe jihchoh.

⁵ Tümüde Khrista lung arihkhi ching, thiyutha tüsho mükheahmudu bede lüpdükhi ching nüsa alarü kamdo.

⁶ Khrista dünkheak thiyusheak nüsa kheak düküngde kamshih,

⁷ junangde isa Atungpuh Jisu Khrista amikheak akhiukpü nüsanü aleangkhi ching me thsambah tümü ching she nüsa muzholüm;

⁸ apinü akheam khiungde nüsa kümbah, junangde isa Atungpuh Jisu Khrista nimung ching nüsa amülim mülade alabah.

⁹ Api tsührü isa Atungpuh Jisu Khrista arihako ching nüsa jikhi Thrünpuh ju thiyuro ah.

Borü ching Achamnakbo

¹⁰ Keoniorübo, nüsa alala arihakode nüsa bolung achamnak mülapü tüsho lümkhi rukhüh tüsho zanzhak rukhüh ching arihakopü inü nüsa ki tuthsukchoh.

¹¹ Tümüde I keoniorübo, nüsa bolung rukachihkhi lah de Kloe yamkhün mihtsürünü I ki thiyusheak jihdo.

¹² Inü athakhi amütsan ju a nüsa mihbüm abannü hade thachoh, “I Paul ruyanrü ah,” yungsho “I Apollo ruyanrü ah,” yungsho “I Kephas ruyanrü ah,” yungsho “I Khrista ruyanrü ah.”

¹³ Khrista ju chamnaka la de? Nüsa thsungkheak Paul yümkihkhea shi? Yungsho Paul mung ching nüsa baptikhea shi?

¹⁴ Krispa tüsho Gaia kheak hode inü nüsa sheshe mübaptikhi Thrünpuh kilim makshe jihchoh;

¹⁵ jude yungkhülaa nüsa ju I mung ching baptikheah de khürünü athabah.

¹⁶ (Inü Stephana yamkhün she baptijihdo. Ju hobah inü khürü baptikhi mümükheah.)

¹⁷ Tümüde Khristanü baptipü I thiyikhi yung tüshe thiyusheak-atsü thsangyuthsangrapü ah, tüsho lümlung yu bede yung, jude yungsho Khrista sangkim wu akeangkeang kambah.

Khrista ju Thrünpuh Wu tüsho Lümlung

¹⁸ Tümütüsho dükheakde alarü ki sangkim yusheak ju makhakhi, tüshe isa khümkhita larü ki a Thrünpuh wu ah.

¹⁹ Tümüde ha thrüta lah, “Lüm larü lümlung inü adükheakshihbah, tüsho rük larü rükri duhmüabahshihbah.”

²⁰ Lümlung larü mihtsürü küching la? Mükheahmudurü küching la? Ha lün ching atsangachihrü küching la? Thrünpuhnü alomi lümlung makhashihkhi yung de?

²¹ Tümütüsho Thrünpuh lümlung ching, alominü arü lümlung hode Thrünpuh mümükheah, tüshe akinrü khümkhitpü isanü thsangyuthsangrakhi makha yu hode Thrünpuh asühshih.

²² Tümüde Jihudarünü amütsanbo kheangchoh tüsho Greekrünü lümlung yimchoh,

²³ tüshe isanü a Jihudarü ki jingmükhebe tüsho khiungkerü ki makhakhi, Khrista yümkihkhi thsangyuthsangrachoh,

²⁴ tüshe jia larü Jihudarü le Greekrü chido kilim Khrista ju Thrünpuh wu tüsho Thrünpuh lümlung.

²⁵ Tümüde Thrünpuh makhakhi ju mihtsürü lümlung kheaknü lümlung labe, tüsho Thrünpuh yiuhyiuhkhi ju mihtsürü sühmüh kheaknü adüküngbe ah.

²⁶ Keoniorübo, nüsa jikhi lümakheahang; alomi münchi yande nüsa ahihkhüh lüm larü yung, wu müla, lalim atsü chingnü zübekhi yung;

²⁷ tüshe lümlung larü achihshihpü Thrünpuhnü alomi ching makharü mokhit, sühmüh larü achihshihpü Thrünpuhnü alomi ching ayiuhyiuhrü mokhit.

²⁸ Alominü adungto ah de alümkhi thsümünimpü thsüde alominü khenoa tüsho bahyuka, tüsho tümü mükam de alümkhi Thrünpuhnü mokhit.

²⁹ Junangde mihtsürü shenü she Thrünpuh miki mükükheang.

³⁰ Api ju Thrünpuhnü isa lümlung, isa thiyuro-lungki, atsangkhitrü tüsho rhokhitrü kamshihbuh Jisu Khrista ching nüsa rhangdung limro ah;

³¹ jumonü ha thrüta lah, “Shepü kükheangchonü, Atungpuh lung kükheangshang.”