1 KIUTHSÜYUKHEAN 29 - AMÜSÜH HÜM CL Bible (BSI)

Arüngyam Thsüpü thsungkheak Thsambahbo

¹ Kiulongthsüpuh Davidnü amukhungrü alala ki tha, “Thrünpuhnü amokhitkhi I tsührü Solomon athunu tüsho müyeanlamyi, tüshe rhimo tolah; tümüde arüngyam ha mihtsürü thsungkheak yung tüshe Atungpuh Thrünpuh thsungkheak ah.

² Jumonü inü I Thrünpuh yam thsungkheak jihdo, inü akukkhi thülün, suna kukrukbo thsungkheak suna, shotoyinchi kukrukbo thsungkheak shotoyinchi, tüsho müwayinchi kukrukbo thsungkheak müwayinchi, yinchi kukrukbo thsungkheak yinchi, tüsho sang kukrukbo thsungkheak sang, ju lung shihshihlung ahihdo tüsho akhimbe lungbo, athrathra lung, amujukhi lungbo, shotolungbo mungji alala, tüsho suhdahkhi lungbo.

³ Ju lang yung, ju kheak khiode amüsüh yam thsungkheak inü I Thrünpuh yam thsungkheak shuhmülanga jihmonü, I yo suna tüsho shotoyinchi rahpung jih:

⁴ Inü thüyam rhü lüpdopü thsüde Ophir suna khahngak chithürü 100 tüsho atsangkhitkhi shotoyinchi khahngak chithürü 240 jih,

⁵ tüsho kizükidorünü arhimobe rhimobo thsungkheak alala, suna kukrukbo thsungkheak suna tüsho shotoyinchi kukrukbo thsungkheak shotoyinchi. Dale arü zangrü khihni Atungpuh kilim müsühkhitde, shepünü künsahde ajihba?”

⁶ Judüki jipürü yamkhün limberübonü mulongkhi jih, junangde Israel trükbo limberübo, chithürübo tüsho chibo wühkenorübo, kiulongthsüpuh rhimo kurungkheak atorübonü she jih.

⁷ Arünü arüngyam rhimo thsungkheak suna khahngak chithürü 170 akumung, shotoyinchi khahngak chithürü 340 bande, müwayinchi khahngak chithürü 620 bande tüsho yinchi khahngak chithürü 3400 akumung jih.

⁸ Shotolungbo larünü Atungpuh yam rahpung ching, Gershonrü Jehiel khah ching jih.

⁹ Judüki mihtsürübonü asühachih tümütüsho arünü künsahde jih, tümüde arü lümkhi khülangnü Atungpuh kilim akeangnü jih; kiulongthsüpuh David she khitode asüh.

David Tamkhüntamnü

¹⁰ Judüki amukhungrü alala mikinü Davidnü Atungpuh mung shi; Davidnü tha: “Nü shijihchoh, O Atungpuh , isa Israel jipürü Thrünpuh, lünnü akheam müla.

¹¹ O Atungpuhnü ato, wu-sühmüh, müretahkhi, akukkhi, tüsho wüntremüretah; tümüde yinmi ching lakhi tüsho alomi kheak lakhi alala nü yo ah; kiulongthsü nü yo, O Atungpuh , tüsho nü alala kumung aku nangde shuhkih-a lah.

¹² Lakhit tüsho wüntrepü nü kilimnü arüchoh, tüsho nünü alala kurungkheak yakzan shuhchoh. Nü khah ching wu-sühmüh tüsho wuto lah; tüsho alala kilim toshihpü tüsho sühmüh jihpü nü khah ching lah.

¹³ Tüsho kheakü, isa Thrünpuh, isanü nü ki makshe jihchoh tüsho nü müretahkhi mung shichoh.

¹⁴ “Tüshe isanü ha akeangnü jihchungkhukkhi ha I tüsho I mihtsürübo she a? Tümüde kukruk alala nü kilimnü arüchoh, tüsho nü yo isanü nü jihdo.

¹⁵ Tümüde isa le isa jipürübo nü miki khiungkerü tüsho nahde atsopü lah; alomi kheak isa nimungbo me khülang nangde lah, tüsho ju ching mulonglam müla.

¹⁶ O Atungpuh isa Thrünpuh, nü mung amüsüh thsungkheaknü isanü suhdahde ajihkhi alala ha nü khah chingnü arüchoh tüsho alala nü yo ah.

¹⁷ I Thrünpuh, nünü mulong yimchoh tüsho thiyuro lungki ching reangkeamchoh de inü mükheahlah; I mulong alungki chingnü inü ha kukrukbo alala akeangnü jihdo, tüsho kheakü nü mihtsürübonü ha ching nü kilim akeangnü tüsho asühde ajihkhi inü ngüdo.

¹⁸ O Atungpuh isa jipürü Abraham, Isak tüsho Israel Thrünpuh, hadürü lümkhi tüsho mulongkhi nü mihtsürübo mulong ching zojang, tüsho arü mulong nü kilim peang zojang.

¹⁹ I tsührü Solomon kilim nü yukhümbo, nü kiuthsü yukhüm, nü yakzan thsükhibo alala yande, inü tsanglunga lakhi arüngyam thsüpü thiyuro lümkhi jihang.”

²⁰ Judüki Davidnü amukhungrü alala ki tha, “Atungpuh nüsa Thrünpuh shijang.” Tüsho amukhungrü alalanü arü jipürü Thrünpuh, Atungpuh shijih, tüsho arü ku mükhümde Atungpuh tüsho kiulongthsüpuh miki akin jih.

²¹ Ashidopü arünü laksah-a kingaünkhi tüsho taka kingaünkhi Atungpuh kilim moshipung 1000, namfimihnupung 1000, namfimihnunu 1000, ju lung yukhubo, tüsho Israel alala thsungkheak laksah-a kingaünkhi suhdahde jih;

²² tüsho ju nimung arünü tode asühachihde Atungpuh miki tsühyung. Arünü mahnepü ching David tsührü Solomon kiulongthsürü kamshih; tüsho arünü Atungpuh miki api yakzanshuhrü tüsho Zadok amükeamrü thsüpü mujude-mokhit.

²³ Jushu, Solomonnü abuh David müthri kiulongthsürü kamde A TUN GPU H kiulongthsü-binkiu kheak bin; apinü akuk ngü, tüsho Israel alalanü api ki mihyuani.

²⁴ Limberü alala, amüzhak thirithsürübo tüsho kiulongthsüpuh David tsührübo alalanü kiulongthsüpuh Solomon ki thiyuronü alapü thiyuchihchim.

²⁵ Atungpuhnü Israel alala miki Solomon changde shuhkih, tüsho Israel ching api müngüh kiulongthsürü she kheak mülakhi kiulongthsü wüntremüretah api kheak jih.

David Shekhi

²⁶ Hanangde Jesse tsührü Davidnü Israel alala kurungkheak kiulongthsü.

²⁷ Apinü Israel kurungkheak kiulongthsükhi kim ju kam yirü; apinü Hebron ching kam thüne tüsho Jirusalem ching kam samrükheak mahsam kiulongthsü.

²⁸ Api tsüde ashinkhi kim, nimungbo khiukdahbah, lakhitde tüsho wüntrede lade she; tüsho api tsührü Solomonnü api müthri.

²⁹ Kheakü kiulongthsüpuh David rhimobo, atankihnü akheam khiungde angürü Samuel hümbo, wukihbuh Nathan hümbo, tüsho angürü Gad hümbo ching thrüta lah,

³⁰ ju lung, api kiulongthsü khekhi, api sühmüh, tüsho api le Israel tüsho alomi kiulongthsübo kheak dünjikhi alala.