1 KIUTHSÜYUKHEAN 19 - AMÜSÜH HÜM CL Bible (BSI)

Davidnü Amon tüsho Siriarü Kukkhi

¹ Kim anükhüh dunglim, Amon kiulongthsüpuh Nahash sheabah, tüsho api tsührünü api müthri.

² Davidnü tha, “Inü Nahash tsührü Hanun ki amuzho huhbah, tümüde abuhnü I ki amuzho huh.” Jumonü Davidnü abuh dünkheak api mulong shukheampü yunithsürübo yüshih. Küyimki David yamlarübo api mulong shukheampü Amonrü lo ching Hanun kilim arükhea,

³ Amonrü torübonü Hanun ki tha, “Davidnü mulong shukheamrü nü kilim arüshihmonü apinü nü buh ki wüntre jihchoh de nünü lümcho shi? Api yamlarübo nü yimde lahyuka bahpü tüsho alomi thirirhua kheahpü arükhi yung de?”

⁴ Jumonü Hanunnü David yamlarübo rambah arü mükhühnam hüta bahjih, arü kiung phulungnü khimmihbo nipa bahjih, tüsho arü tsoshih.

⁵ Küyimki mihtsürübo dünkheak David ki thakhea, apinü yunithsürübo arü shorupü yüshih, tümüde arübo khide achih ngüa lakheah. Kiulongthsüpuhnü tha, “Nüsa mükhühnam müchinyi khiungde Jirikho ching laang, tüsho jushu alode arang.”

⁶ Küyimki Amonrünü David kheak mütsüde rhimokhi arü zangrü lümkhitlokhea, Mesopotamia, Siria ching lakhi Maaka tüsho Zoba chingnü khora-lolungbe tüsho khorabonungrü muloshihpü Hanunnü shotoyinchi khahngak 34,000 mühah.

⁷ Arünü khora-lolungbe 32,000 tüsho api bonungrü bede Maaka kiulongthsüpuh mulode arü tüsho Medeba müngüh binkheam. Tüsho Amonrübo arü kiutobo chingnü trüngmukhung tüsho thirithsüpü arü.

⁸ Küyimki Davidnü ju sokhea, apinü Joab tüsho thirithsü bonungrü alala yüshih.

⁹ Amonrünü akhiuk tüsho kiuto limro ki thirithsüpü thsakham, tüsho arüa lakhi kiulongthsürübo lomi mükeak ching lakheah.

¹⁰ Küyimki Joabnü api müngüh tüsho dunglim api bede thirithsüpü thsakhama lakhi ngükhea, apinü athrükhitkhi Israel mihtsürü khürü mokhit tüsho Siriarü bede keochihpü duklangshih;

¹¹ aningkhi api bonungrü apinü anihbuh niurü Abishai bukkhüp zojih, tüsho arünü Amonrü azhihpü thsakham.

¹² Apinü tha, “I thsungkheaknü Siriarü khide amürang a sho, nünü I rungbah; tüshe nü thsungkheaknü Amonrü khide amürang a sho, inü nü rungbah.

¹³ Reangzahang, tüsho isanü isa mihtsürü tüsho isa Thrünpuh kiutobo thsungkheak mulong toanü; tüsho Atungpuhnü tümü api ki atsüanü rhimoshang.”

¹⁴ Jumonü Joab tüsho api lung bekhi thirithsürübo Siriarü bede keochihpü mikhuh ching yü.

¹⁵ Küyimki Siriarü tsokhi Amonrünü angükhea, junangde arü she Joab niurü Abishai müngüh tso, tüsho kiuto ching yüzah. Jushu Joabnü Jirusalem ching arü.

¹⁶ Tüshe küyimki Israelnü arü kukkhi Siriarünü angükhea, arünü yunithsürü yüshih tüsho Euphra hobah alakhi Siriarü, Hadadezer bonungrü wühkenobuh Shophaknü aku thsübah arü be.

¹⁷ Küyimki Davidnü ju sokhea, apinü Israel alala bemukhungbah Jordan hode arü kilim arü, tüsho arü azhihde api bonungrübo thsakham. Küyimki Davidnü Siriarü azhihde thirithsüpü thsakhamkhea, arünü api bede keochih.

¹⁸ Siriarünü Israel müngüh tso; tüsho Davidnü Siriarü khoralolungbe berü 7000 tüsho jingbonungrü 40,000 laksah, tüsho arü bonungrü wühkenobuh Shophak she laksah.

¹⁹ Küyimki Hadadezer yamlarübonü arübo Israelnü akukkhi ngükhea, arünü David kheak mungtsü thsü, tüsho api mihtsürü kamabah. Jumonü kheaküa Siriarünü Amonrü murungnede kamabah.