1 KIUTHSÜYUKHEAN 17 - AMÜSÜH HÜM CL Bible (BSI)

Nathan Yusheak David kilim

¹ Kheakü küyimki David anihbuh yam ching lakhea, Davidnü Nathan ki tha, “I a cedar yam khülang ching lah, tüshe Atungpuh tangzüng sangdan khimyam khüp lah.”

² Nathannü David ki tha, “Nü lüm ching lakhi alala rhimoang, tümüde Thrünpuh nü lung lah.”

³ Tüshe ju tsüngrenü Atungpuh yu Nathan kilim arü:

⁴ Yüang tüsho I yamlarü David ki thaang: Atungpuhnü ha thachoh: Nünü I lashihpü thüyam müthsü.

⁵ Tümüde inü Israel bekhitkhi nimungnü thüyam ching laamükheah, tüshe I khimyam tüsho arüngkhimyam ching lakheah.

⁶ I Israel alala lung tsahkhi ching, I mihtsürü bepü thiyukhüm jihkhi Israel mahkhaprü khürü ki, tümüde nüsanü I kilim cedar yam müthsü le de inü thiyu thakhea de?

⁷ Kheakü jumonü ha nünü I yamlarü David ki thaang: Ha Wuto Atungpuhnü thachoh: Inü nü I mihtsürü Israel kurungkheak yakzanshuhrü thsüshihpü namfimihnu yande alakhi, rimlopung chingnü bea lu;

⁸ tüsho nü yüpungbo ching I nü lung lakheah, tüsho nü müngüh nü riri alala tukloabahshih; kheakü alomi ching lakhi mung ato nangde inü nü mung kamshihbah.

⁹ Tüsho inü I mihtsürü Israel thsungkheak dangpung khülang mokhitbah, tüsho arü lashihbah, junangde arünü arü nihbuh lapung ching labah, tüsho kheakü phü mümüsüp; tüsho akhuhlim rhimokhi nangde amütsü rhimorübonü kheaküa arü müjuno,

¹⁰ I mihtsürü Israel kurungkheak inü mahkhaprübo mokhitkhi kim chingnü; tüsho inü nü riribo alala juyuka bahbah. Kheaküshe Atungpuhnü nü khilim thüyam khülang thsüjihbah de inü khipkhitchoh.

¹¹ Küyimki jipürü lung yüpü nü nimungbo khiungbanü, inü nü dunglim nü tsührü khülang asürüshihbah. Tüsho inü api kiulongthsü tankihjihbah.

¹² Apinü I thsungkheak thüyam khülang thsübah, tüsho inü api kiulongthsü-binkiu lünnü alashihbah.

¹³ I api abuh thsübah, tüsho api I tsührü thsübah tüsho inü nü müngüh labuh kheaknü alukhi nangde I mihmüthsüm api kheaknü mulu,

¹⁴ tüshe inü api I yam tüsho I kiulongthsü ching lünnü alashihbah, tüsho api kiulongthsübinkiu lünnü alabah.

¹⁵ Harü yubo alala tüsho ha michih alala yande Nathannü David ki asuk.

Davidnü Makshe Tamkhüntamnükhi

¹⁶ Judüki David kiulongthsüpuhnü yüzah tüsho Atungpuh miki binbah tha, “I she a, O Atungpuh T HRÜNPU H , tüsho I yamkhün tümü ah de nünü I ha lokhüh bede arükhea?

¹⁷ Tüshe ha nü mük ki kukruk anikhüh lakheah O Thrünpuh; nünü nü yamlarü yamkhün thsungkheak arübe kuhi she asuk. Nünü I atoashang khürü nangde khejih, O Atungpuh T HRÜNPU H .

¹⁸ Tüsho nü yamlarü ki wüntre jihkhi thsungkheak Davidnü nü ki tümü thakhukba? Nünü nü yamlarü mükheahlah.

¹⁹ O Atungpuh , nü yamlarü dünkheaknü, tüsho nü mulongkhi yande, nünü harü ato rhimobo mükheahshihde rhimodo.

²⁰ Nü kiphahde she müla, O Atungpuh , tüsho isa nükhünnü asokhi alala yande, nü hobah Thrünpuh she müla.

²¹ Nünü Ijip chingnü arhokhitkhi nü mihtsürü müngühnü trükshihbo yankhitde api mung toshihde tüsho atrebe rhimode Thrünpuhnü api mihtsürü thsüpü rhokhitpü yükhi alomi kheak lakhi trükshih khülang, nü mihtsürü Israel nangde she la?

²² Tüsho nünü nü mihtsürü Israel lünnü nü mihtsürü thsüpü kamshih; tüsho O Atungpuh , nü arü Thrünpuh kam.

²³ “Tüsho kheakü, O Atungpuh , nünü nü yamlarü tüsho api yamkhün dünkheak asukkhi yu lünnü lashang, tüsho nünü alokhikhi nangde rhimoang.

²⁴ Hanangde nü mung lünnü lade tüsho shide athabah, ‘Wuto Atungpuh , Israel Thrünpuh ju Israel Thrünpuh ah’; tüsho nü yamlarü David yamkhün nü miki labah.

²⁵ Tümüde I Thrünpuh, nünü api thsungkheak thüyam khülang thsübah de nü yamlarü ki akhiuka huh; jumonü nü yamlarünü nü miki tamkhüntamnüpü mulong toshih.

²⁶ Tüsho kheakü, O Atungpuh nü Thrünpuh ah, tüsho nünü ha atsü nü yamlarü ki alokhi;

²⁷ jumonü nü yamlarü yukhüm müngühmühipü thsüde hanü nü asühshang, junangde ha nü miki lünnü alabah. Tümüde, O Atungpuh , nünü müngühjih tüsho lünnü müngühmühibah.”