1 KIUTHSÜYUKHEAN 16 - AMÜSÜH HÜM CL Bible (BSI)

¹ Arünü Thrünpuh sangdan hande yüzah, tüsho Davidnü athsükhi khimyam alunglim zo; tüsho arünü taka kingaünkhi tüsho mungtsü kingaün Thrünpuh miki jih.

² Küyimki Davidnü taka kingaünkhi tüsho mungtsü kingaünbo jihkhamkhea, apinü Atungpuh mung chingnü mihtsürübo müngühjih;

³ tüsho apinü Israel ching athrürü tüsho aliberü aban kilim yikhap, shihtsan, tüsho kurungaso mukuh khap khülang khülang chama jih.

⁴ Amushupü, makshe jihpü, tüsho Atungpuh Israel Thrünpuh shishihpü thsüde apinü Levirü khürü Atungpuh sangdan miki tankihrübo moyuk.

⁵ Akubuh ju Asaph, api khinbuh Zekaria, Jeiel, Shemiramoth, Jehiel, Mattithia, Eliab, Benaia, Obed-edom, tüsho Jeiel arünü bingshang tüsho bingkhungbo khung; Asaphnü larüpbo king;

⁶ tüsho amükeamrübo Benaia le Jahazielnü Thrünpuh tangzüng sangdan müngüh hulipungpungbo mutukzhakde müt.

⁷ Ju nimung Davidnü akhuhde Atungpuh kilim mungshi khün thsüshihpü Asaph tüsho api buhtsührü kilim hahmülang jih.

Mungshi Khün

⁸ O Atungpuh kilim makshe jihang, api mung jiang, mihtsürü bolung api rhimobo mükheahshang.

⁹ Api ki khün thsüang, api ki mungshi khün thsüang, api amüyinsahbe rhimobo alala thaang.

¹⁰ Api amüsüh mung ching müretahang; Atungpuh yimrü mulong asühachihshang.

¹¹ Atungpuh tüsho api sühmüh yimang, api miro mutuklode yimang.

¹² Apinü arhimokhi amüyinsahbe rhimobo, api khinthiyinbebo, tüsho apinü athakhi mahkhapkhibo lümkhitang,

¹³ O api yamlarü Israel tsührü, Jakob tsührübo, apinü amokhitkhibo.

¹⁴ Api Atungpuh isa Thrünpuh; api mahkhapkhibo alomi alala ching lah.

¹⁵ Api tangzüngkhi lünnü lümkhitang, apinü chithürü lünbo thsungkheak thiyukhüm jihkhi yu,

¹⁶ apinü Abraham ki tangzüngkhi, apinü Isak ki thiyuchihchimkhi,

¹⁷ küpü apinü Jakob ki yakzan-thsükhi kamshihkhea, Israel kilim akheam mülakhi tangzüng,

¹⁸ tha, “Inü nü kilim Kanan lo yamrüplurüp thsungkheak nü shihcham jihbah.”

¹⁹ Küyimki arü akhekhi nükde alakhea, kheakheahkhi anikhüh, tüsho ju ching mihsobo la,

²⁰ trükshih ching nü trükshih rümzürümdode, kiulongthsü khülang chingnü püpürü mihtsürü kilim,

²¹ apinü arü junopü she ki mümülüjih; apinü arü dünkheak kiulongthsürübo thürüh,

²² tha, “Inü mujude-mokhitkhibo düqiu; I yo wukihrübonü athsümünimbe tümü müthsü.”

²³ Alomi alalanü Atungpuh ki khün thsüang. Api akhümkhitkhi nimung aban thaang.

²⁴ Api müretahkhi trükshih bolung, api amüyinsahbe atsü rhimobo mihtsürü bolung khipkhitang.

²⁵ Tümüde ato ju Atungpuh , tüsho tode ashijihbe; api thrünpuhbo alala kurungkheak atrebe lah.

²⁶ Tümümüde mihtsürü alala thrünpuhbo ju sangthsübo, tüshe Atungpuhnü thüningbo thrün.

²⁷ Akinashu tüsho wüntre-müretah api miki lah; sühmüh tüsho asühpü api lapung ching lah.

²⁸ Atungpuh kilim jihang, O mihtsürü yamkhünbo, müretah tüsho sühmüh Atungpuh kilim jihang.

²⁹ Atungpuh kilim api mung ching alim lakhi müretahkhi jihang; kingaün khülang hande arang, tüsho api miki arang. Amüsüh azhingzhing chingnü Atungpuh kingaünang;

³⁰ alomi alalanü api miki ajanang. Alomiküp ju düküngde thsüa lah; ju küyimkishe matrüt.

³¹ Thüningbo asühang, tüsho alominü asühachihang, tüsho arünü trükshih bolung thashang, “Atungpuh ju kiulongthsüpuh!”

³² Keto tüsho ju ching lakhi lüpdükhinü arungang; thulu tüsho ju ching lakhi lüpdükhinü asühang.

³³ Judüki murung sangdungbonü Atungpuh miki asühde khün thsübah, tümüde api alomi mahkhappü arüchoh.

³⁴ O Atungpuh kilim makshe jihang, tümüde api tsülah; tümüde api amuzho lünnü lah.

³⁵ Kheaküshe thaang: “Isa khümkhitang, O isa khümkhitrü Thrünpuh, tüsho isa bemukhungang tüsho isa trükshih bolungnü khümkhitang, junangde isanü nü mung amüsüh kilim makshe jihbah, tüsho nü shikhi ching müretahbah.

³⁶ Akheam mülakhi chingnü akheam mülakhi khiungde, Israel Thrünpuh, Atungpuh shiang.” Judüki mihtsürü alalanü tha, “Amen!” tüsho Atungpuh shijih.

Jirusalem tüsho Gibeon ching Kingaünkhi

³⁷ Davidnü Asaph tüsho api buhtsührübo Atungpuh tangzüng sangdan miki nimung aban sangdan miki yihnüpü lakhi mutukzhakde tankihpü zojih,

³⁸ tüsho kheaküshe Obed-edom tüsho api buhtsührü 68; Jeduthun tsührü Obed-edom tüsho Hosa ane a ripit neakrü lakheah.

³⁹ Tüsho apinü Zadok amükeambuh tüsho buhtsührü amükeamrübo Gibeon ching lakhi achang dangpung ching Atungpuh arüngkhimyam miki zojih,

⁴⁰ apinü Israel ki thiyukhüm jihkhi Atungpuh yakzan ching thrüta lakhi nangde yapsu tüsho arelim mutukzhakde taka kingaünkhi kingaün sadam kheak Atungpuh kilim kingaünpü lakheah;

⁴¹ arü lung Heman tüsho Jeduthun, tüsho aningkhi Atungpuh kilim makshe jihshihpü mung jide mokhit, tümüde api muzho lünnü lah.

⁴² Heman tüsho Jeduthun lung khün düsheak thsungkheaknü hulipungpungbo tüsho larüpbo, tüsho amüsüh khün thsungkheaknü kingzükingdobebo lakheah. Jeduthun tsührübo ripit ching binpü mokhit.

⁴³ Judüki mihtsürü alala arü yam lim chamachihde yü, tüsho Davidnü nihbuh yamkhün müngühjihpü yü.