1 KIUTHSÜYUKHEAN 13 - AMÜSÜH HÜM CL Bible (BSI)

Kiriath-jearim chingnü Tangzüng Sangdan Akhinkhi

¹ Davidnü chithürü tüsho chi kumung wühkenorü, limberü abande keokhikeora.

² Davidnü Israel amukhungrü alala ki tha, “Ha nüsanü tsüde lümsho, tüsho Atungpuh isa Thrünpuh lümkhi thsüsho, isanü Israel lomi ching aninga lakhi alala isa keoniorübo, amükeamrü tüsho Levirü, kiutobo ching rimlopungbo larübo kilim thiyu yüshihanü, junangde arübo isa lung mukhungde arübah.

³ Jushu isanü isa Thrünpuh sangdan isa kilim hanlode aranü; tümüde Saul nimungbo ching isanü ju bahyuk.”

⁴ Amukhungrü alalanü jude athsüpü mulongkhit, tümüde junü mihtsürü alala asühshih.

⁵ Jumonü Kiriath-jearim chingnü Thrünpuh sangdan lude arüpü Ijip ching Shihor kheaknü Lebo-hamath khiungde Israel alala bemukhung.

⁶ Cherubim kumung Atungpuh mung lakhi Thrünpuh sangdan ludarüpü David tüsho Israel alala Judarü yo Kiriath-jearim lim, Baala ching wutu.

⁷ Arünü Abinadab yam chingnü Thrünpuh sangdan lolungbe aso kheaknü hanbah arü, tüsho Uzza le Ahio bünenü lolungbe bekheah.

⁸ David tüsho Israel alalanü arü sühmüh alalanü, khündung khünyubo, bingshangbo, züpzüppü, larüpbo tüsho hulipungpungbo khungde Thrünpuh miki tsün.

⁹ Küyimki arü Kidon rhimopung ching arükhea, Uzzanü sangdan ramlopü akhah chungkhit, tümütüsho moshipung jing juphah.

¹⁰ Uzza kheak Atungpuhnü bukakhiuk; apinü anihbuh shika lungshih tümütüsho apinü akhah sangdan lim chungkhit; tüsho api ju ching Atungpuh miki sheabah.

¹¹ Davidnü bukakhiuk tümütüsho Atungpuhnü Uzza kheak azhihde bukakhiuk; jumonü ju dangpung ki khihni khiungde Perez-uzza de jichoh.

¹² Ju nimung Davidnü Thrünpuh trede tha, “ Küde thsah Thrünpuh sangdan I ki hande arüba?”

¹³ Jumonü Davidnü sangdan ju David kiuto ching hande müyüzah; ju müthri apinü Gitrü Obed-edom yam ching hande yüzah.

¹⁴ Thrünpuh sangdan ju Obed-edom yamkhün lung api yam ching khinu mahsam la, tüsho Thrünpuhnü Obed-edom yamkhün tüsho api lakhi alala müngühjih.