1 KIUTHSÜYUKHEAN 12 - AMÜSÜH HÜM CL Bible (BSI)

David lung Thirithsürübo

¹ Harü ha Kish tsührü Saul dünkheaknü David zuzu thsüde maphapkhukde alachoki, Ziklag ching api kilim arürübo; arübo api thirithsü ching rungpü thirithsürü amüzhak bolung belah.

² Arübo sanglüh shuhrü, tüsho hühzo kiprü tüsho tsülim yungsho huzulimnü lung hitrü; arübo Benjaminrü, Saul buhtsührü ah.

³ Akubeatobuh ju Ahiezer, ju khin Joash, ane chido Gibearü Shemaa tsührü; kheaküshe Azmaveth tsührübo Jeziel tüsho Pelet; Beraka, Anathothrü Jehu.

⁴ Gibeonrü Ishmaia, samrü bolung thirithsürü tüsho samrü kumung limberü; Jeremia, Jahaziel, Johanan, Gederarü Jozabad,

⁵ Eluzai, Jerimoth, Bealia, Shemaria, Haruphrü Shephatia;

⁶ Elkana, Isshia, Azarel, Joezer, tüsho Korarü Jashobeam;

⁷ tüsho Gedorrü Jeroham tsührübo Joela tüsho Zebadia.

Gad Trük chingnü David Jingyanrü

⁸ Gadrü kilimnü athrungrü tüsho thirithsü ching rük zahrü, tsung tüsho thsüh shuhsorü, miro kekhüzübo nangde, tüsho awung ching alihde atsahkhi rimsung nangde David kilim sunglo chipi ayünkhi ching yü:

⁹ Eleazar akubeatobuh, mahnepü Obadia, asampü Eliab,

¹⁰ aphüyipü Mishmanna, aphüngüpü Jeremia,

¹¹ athurukpü Attai, athünepü Eliel,

¹² atizheahpü Johanan, atukupü Elzabad,

¹³ athürüpü Jeremia, thürükheak khülangpü Makbannai.

¹⁴ Harü ha Gadrü bonungrü torübo, anükbenü chi tüsho atobenü chithürü kurungkheak lakheah.

¹⁵ Harü ha ayung mide abukchoki, tüsho jindükhün ching larü hiumüzütde aniakhiuklim tüsho aniyüzahlim yüshihchoki akhuhbe khinu ching Jordan horübo lakheah.

Benjamin tüsho Juda chingnü Jingyanrübo

¹⁶ Benjaminrü tüsho Judarü khürü chipi ayünkhi ching David kilim arü.

¹⁷ Davidnü arü shorupü wukhiuk tüsho arü ki tha, “Mürangkhüh nüsanü I ki mungtsü ching I rungpü arüa lasho, I mulong nüsa kheak ayebah; tüshe mürangkhüh nüsanü I azhihrü kilim I mülapyukjihpü arüa lasho, I khahbonü tümü amülim mürhimo le, isa jipürü Thrünpuhnü ngüshang tüsho mahkhapshang.”

¹⁸ Judüki samrü yo akubeatobuh Amasai kheak me arü, tüsho apinü tha, “Isa nü yo, O David; tüsho nü lung lah, O Jesse tsührü! Mungtsü, nü kilim mungtsü, tüsho nü rungrü kilim mungtsü! Tümüde nü Thrünpuh ju nü rungbuh.” Judüki Davidnü arübo leangkhi, tüsho api bonungrü torübo kamshih.

Manase chingnü Jingyanrübo

¹⁹ Davidnü Saul bede keochihpü Filistiarü bebah ayüchoki Manaserü khürü api kilim arü. (Tütüshe apinü Filistiarü murung, tümüde arü yakzanshuhrübonü keokhikeora tüsho api thiyia tsoshihde tha, “Isa ku kheamshihpü apinü api putungrü Saul kilim tsoabahbah.”)

²⁰ Api Ziklag lim yüchoki, harü Manaserünü api lung arü: Adna, Jozabad, Jediael, Maikel, Jozabad, Elihu, tüsho Zillethai, Manase ching chithürü kurung wühkenorübo.

²¹ Arünü David rungde thirithsürübo kheak azhih, tümüde arü alala thirithsürü tüsho bonungrü wühkenorübo lakheah.

²² Nimung abande mihtsürübonü David rungpü, Thrünpuh bonungrü nangde bonungrü ato mülayi khiungde arü.

David Bonungrü Khinlang

²³ Harü ha Atungpuh yu yande Saul kiulongthsü David kilim müthrijihpü Hebron ching api kilim arükhi bonungrü chamnak khekhibo.

²⁴ Juda mihtsürü tsung tüsho thsüh shuhrü bonungrü khekhi 6800.

²⁵ Simeonrü thirithsürü amüzhakbo, 7100.

²⁶ Levirü 4600.

²⁷ Aron yamkhün ching limbebuh Jehoiada, tüsho api lung 3700.

²⁸ Athunu thirithsürü, Zadok, tüsho anihbuh jipürü yamkhün chingnü wühkenorü 22.

²⁹ Saul buhtsührü Benjaminrü 3000, arü ahihbenü Saul yamkhün kheak thiyuronü la,

³⁰ Ephraimrü 20,800, thirithsürü amüzhakbo, arü jipürü yamkhünbo ching athukhibo ah.

³¹ Manase trük chamkhüh, mung khekhitde yü tüsho David kiulongthsürü kamshihrü 18,000.

³² Issakarrü Israelrünü tümü rhimobeanü kim anikhitrü atorübo 200, tüsho arü yukhüm ching larü arü buhtsührü alala.

³³ Zebulunrü banthsangkhi bonungrü thirithsü ching thsühnuk alala shuhkhukde lümkhi khülang thsübah David rungrü 50,000.

³⁴ Naphtalirü, wühkenorü 1000 lung tsung tüsho thsüh shuhrü 37,000.

³⁵ Danrü, thirithsüpü thsakhambah alarü 28,600.

³⁶ Asherrü, thirithsüpü thsakhambah alarü 40,000.

³⁷ Reubenrü, Gad tüsho Manase trük chamkhüh, Jordan hobah alakhi thirithsü thsühnuk alala thsakhambah alarü 120,000.

³⁸ Harü alala, thirithsürübonü shihkhin thsübah lümkhi alalanü Israel alala kurungkheak David kiulongthsürü kamshihpü Hebron ching arü; junangde aningkhi Israel alalanü David kiulongthsürü kamshihpü lümkhi khülang thsü.

³⁹ Arübo ju ching David lung nimung mahsam tsühyungde mung, tümüde arü keoniorübonü arü thsungkheak thsakhamjih.

⁴⁰ Kheaküshe, arü yamhingrü Issakar, Zebulun, tüsho Naphtali chingnü tsühyungbe donki, kemel, khoranunu tüsho moshipungbo kheaknü suhdahkhi tsühyungpü, kurungaso yikhap, kurungaso mukuh, yukhu, müdangke, moshipungbo tüsho namfimihnu hanbah arü, tümütüsho Israel ching asühachihkhi lakheah.