1 KIUTHSÜYUKHEAN 11 - AMÜSÜH HÜM CL Bible (BSI)

David Israel tüsho Juda Kiulongthsürü Kamkhi

¹ Judüki Israel alala Hebron ching David ki mukhung tüsho tha, “ Kheahang, isa nü ro tüsho nü shih.

² Kheakü anükhüh kheak thsungkheak, Saul kiulongthsüpuh lalashe, nünü Israel bonungrü thiyukhüm jih. Atungpuh nü Thrünpuhnü nü ki tha: Nünü I mihtsürü Israel neakbah, nü I mihtsürü Israel kurungkheak yakzanshuhrü thsübah.”

³ Jumonü Israel azothsürübo alala Hebron ching kiulongthsüpuh ki arü, tüsho Davidnü Hebron ching Atungpuh miki arü kheak tangzüng khülang thsü. Tüsho Atungpuh yu yande arünü Israel kurungkheak kiulongthsürü thsüpü Samuel hode David mujude-mokhit.

⁴ David tüsho Israel alala Jirusalem lim yü, ju lomi ching larü Jebusrü lapung Jebus lakheah.

⁵ Jebus ching larübonü David ki tha, “Nü ha ching mazah.” Tütüshe Davidnü chipi ayünkhi Zion yankhia lu, ju David kiuto.

⁶ Davidnü tha, “Shepünü akhuhde Jebusrü yanbanü akubeatobuh tüsho wühkenobuh thsübah.” Tüsho Zeruia tsührü Joabnü akhuhde wutu, jumonü api akubeatobuh kam.

⁷ Davidnü chipi ayünkhi ching la; jumonü ju David kiuto de ajikheah.

⁸ Apinü Millo chingnü alala mühide kiuto thsü; tüsho Joabnü aningkhi kiuto thsülo.

⁹ Tüsho David atobe tüsho atobe kam, tümüde Wuto Atungpuh api lung lakheah.

Mungthukhi David Bonungrübo

¹⁰ Kheakü harü ha David bonungrü akubeatorübo, arünü Israel dünkheak Atungpuh yu yande, Israel alala thsürude api kiulongthsürü kamshih tüsho api kiulongthsü müküpde kamshih.

¹¹ Ha David yo athrungrübo khekhi: Hakmoni tsührü Jashobeam akube wühkenobuh lakheah; apinü 300 azhihde thsüh shuhkihbah khülang kinü laksah.

¹² Tüsho api khinpü athrungrü mahsam lung ju Ahohrü Dodo tsührü Eleazar lakheah.

¹³ Filistiarü thirithsüpü mukhunga lachoki api Pas-dammin ching David lung lakheah. Ju ching barli lakhi alopung lakheah. Tüsho mihtsürübo Filistiarü kheaknü tso,

¹⁴ tüshe api le Davidnü alopung phulung ching zhipbah tsunglo, tüsho Filistiarü laksah; tüsho Atungpuhnü akuk ngükhi ato jihde arü khümkhit.

¹⁵ Akubeatorü samrü lung mahsamnü Adullam lungkhün ching David kilim lungto lim yüki, judüchoki Filistiarü Rephaim jindükhün ching binde alakheah; tüsho Filistiarü bokhüh Bethlehem ching lakheah.

¹⁶ David a chipi ching lakheah, tüsho Filistia bonungrü Bethlehem ching lakheah.

¹⁷ Davidnü künsahde tha, “O ripit ki lakhi Bethlehem kekhip chingnü khürünü I kilim ke ayungpü jihkhülaa!”

¹⁸ Judüki mahsamnü Filistiarü binpung lakashungde yü tüsho ripit ki lakhi, Bethlehem kekhip chingnü ke khipa lu, tüsho arünü ju David kilim lubah arü. Tüshe Davidnü ju muyung; apinü ju Atungpuh kilim dunga bah,

¹⁹ tüsho tha, “I Thrünpuh inü ha rhimopü danjang. Inü harü mihtsürü thiyih yungkhukba de? Tümüde arü rhangdung jihde ha hande arüdo.” Jumonü apinü muyung. Athrungrü mahsamnü harü rhimo.

²⁰ Kheakü Joab niurü Abishai samrü bolung akubeatobuh lakheah. Api thsühnü 300 bede keochih tüsho arübo laksah, tüsho mahsam lung mungthu ngü.

²¹ Api samrü bolung khide mungthu lakheah, tüsho arü wühkenorü kam; tüshe apinü mahsam ju mukhiung.

²² Jehoiada tsührü Benaia Kabzeelrü mulong torü mihtsürü, rhimo ato rhimorü lakheah; apinü Moabrü Ariel tsührü 2 kinga lungshih. Apinü aru shu nimung yükibah alokhün chingnü kekhüzü she khülang laksah.

²³ Tüsho apinü Ijiprü atoshang mihtsürü, ashanglim khahnap 5 lakhi laksah; Ijipbuhnü akhah ching thsüh ju dükim nangde shuh; tüshe Benaianü tso khülang shuhbah api azhihde yübah thsüh ju Ijipbuh khah chingnü jangkhia lujih, tüsho anihbuh thsühnü api laksah.

²⁴ Hadürü Jehoiada tsührü Benaianü rhimo tüsho apinü athrungrü samrü lung mungthu ngü.

²⁵ Api samrü lung mungthu lakheah, tüshe mahsam a mukhiung. Tüsho Davidnü api aheangpü ching aberü mokhit.

²⁶ Bonungrü bolung athrungrübo ju Joab niurü Asahel, Bethlehemrü Dodo tsührü Elhanan,

²⁷ Harodrü Shammoth, Pelonrü Helez.

²⁸ Tekoarü Ikkesh tsührü Ira, Anathothrü Abiezer,

²⁹ Hushathrü Sibbekai, Ahohrü Ilai,

³⁰ Netopharü Maharai, Netopharü Baana tsührü Heled,

³¹ Benjamin chingnü Gibearü Ribai tsührü Ithai, Pirathonrü Benaia,

³² Gaash phüni jindükhün chingnü Hurai, Arbathrü Abiel,

³³ Baharumrü Azmaveth, Shealbonrü Eliaba,

³⁴ Gizonrü Hashem, Hararrü Shagee tsührü Jonathan,

³⁵ Hararrü Sakar tsührü Ahiam, Ur tsührü Eliphal,

³⁶ Mekerarü Hepher, Pelonrü Ahija,

³⁷ Karmelrü Hezro, Ezbai tsührü Naara,

³⁸ Nathan niurü Joel, Hagri tsührü Mibhar,

³⁹ Amonrü Zelek, Zeruia tsührü Joab thsühnuk hanbuh Beerothrü Naharai,

⁴⁰ Ithrü Ira, Ithrü Gareb,

⁴¹ Hitrü Uria, Alai tsührü Zabad,

⁴² Reubenrü Shiza tsührü Adina, Reubenrü limbebuh, tüsho api lung 30,

⁴³ Maaka tsührü Hanan, tüsho Mithrü Joshaphat,

⁴⁴ Ashterarü Uzzia, Aroerrü Hotham tsührü Shama tüsho Jeiel,

⁴⁵ Shimri tsührü Jediael, tüsho aniurü Tizrü Joha,

⁴⁶ Mahavirü Eliel, tüsho Elnaam tsührü Jeribai tüsho Joshavia, tüsho Moabrü Ithma,

⁴⁷ Mezobarü Eliel, Obed, tüsho Jaasiel.