1 KIUTHSÜYUKHEAN 10 - AMÜSÜH HÜM CL Bible (BSI)

Saul Kiulongthsüpuh Shekhi

¹ Kheakü Filistiarünü Israel bede keochih; tüsho Israel mihtsürü Filistiarü müngüh alihde tso, tüsho Gilboa wung kheaknü laksah.

² Filistiarünü Saul tüsho api tsührübo tholo; tüsho Filistiarünü Saul tsührübo, Jonathan, Abinadab tüsho Malkishua laksah.

³ Thirithsü ju Saul kheak khide müküpde thsungkih; tüsho sanglüh shuhrünü api kip tüsho yurijih.

⁴ Judüki Saulnü thsühnuk hanbuh ki tha, “Nü nukshang thokhitang, tüsho junü I düchipang, junangde harü tsütamübahrünü arübah I kheak mükhemükim müthsüshih.” Tüshe api thsühnuk hanbuhnü mümulong, tümüde api treabah. Jumonü Saulnü nihbuh nukshang lu tüsho ju kheak keam.

⁵ Küyimki api thsühnuk hanbuhnü Saul shekhi ngükhea, api she sheabah.

⁶ Hanangde Saul le atsührü 3 tüsho api yamkhün alala rüpde sheabah.

⁷ Küyimki bonungrü tsokhi tüsho Saul le api tsührübo shekhi jindükhün ching lakhi Israel mihtsürübonü angükhea, arünü arü kiutobo bahjihbah tso; tüsho Filistiarünü arübah jurübo müküh-a lu.

⁸ Ashidopü küyimki Filistiarünü ashemi lupü arükhea, arünü Saul tüsho api tsührübo Gilboa wung kheak yapkhi ngü.

⁹ Arünü api shuh-a lu tüsho aku le api thsühnuk lu, tüsho Filistiarü lomi alala ching arü sangthsübo tüsho mihtsürü kilim yunithsürübo thiyusheak zhide yüshih.

¹⁰ Arünü api thsühnuk arü thrünpuhbo arüngyam ching yuk, tüsho api ku Dagon arüngyam kheak rhükkih-a zo.

¹¹ Tüshe küyimki Filistiarünü Saul kheak rhimokhi Jabesh-gilead alalanü asokhea,

¹² thirithsürü athrungrü alala tsahmusu tüsho Saul pang le api tsührübo pang lubah tso, tüsho jurübo Jabesh ching lude arü. Judüki arünü arü robo Jabesh ching thülamsang khüp kiuyukabah, tüsho arünü nimung thüne khümkeak thsü.

¹³ Junangde api thiyuro mülakhi dünkheaknü Saul sheabah; apinü Atungpuh yukhüm mani, ju lang yung, apinü mesherü ki limbeshihpü keokhi,

¹⁴ tüsho Atungpuh limbekhi müyim. Jumonü Atungpuhnü api sheshih tüsho kiulongthsü Jesse tsührü David kilim jihabah.