1 KIULONG THSÜRÜ 9 - AMÜSÜH HÜM CL Bible (BSI)

Thrünpuhnü Solomon ki Akhiuklokhi

¹ Küyimki Solomonnü Atungpuh yam le kiulongthsüpuh yam tüsho apinü athsüpü künkhi alala bankhea,

² api ki Gibeon ching akhiuka huhkhi nangde mahne kipü Atungpuhnü Solomon ki akhiuka huh.

³ Atungpuhnü api ki tha, “Nünü I miki tamkhüntamnükhi tüsho zhoshekhi inü sodo; nünü athsükhi yam ha inü müsühkhitdo, tüsho ju ching lün thsungkheak I mung yuka zolah; I mük tüsho I mulong lünnü ju ching labah.

⁴ Nü thsungkheaknü, mürangkhüh nünü nü buh Davidnü thiyuro mulong tüsho alungki ching tsahkhi nangde, inü nü kilim thiyukhüm jihkhi alala ayannü rhimode tüsho I yakzanbo tüsho yuzüngbo anide I miki tsahsho,

⁵ inü nü buh David ki alokhide, Israel kiulongthsü-binkiu kheak nü müthrirü mülakphah de athakhi nangde, inü Israel kurungkheak nü kiulongthsü-binkiu lünnü alashihbah.

⁶ Nü yungsho nü tsührübonü I yankhi chingnü anguhsho, tüsho inü nü miki zojihkhi I yukhümbo le I yakzanbo manide yübah püpü thrünpuhbo tankihde arü kingaünsho,

⁷ judüki inü Israel ju arü jihkhi lo chingnü adükheakshihbah; tüsho inü I mung thsungkheak müsühkhitkhi yam ju inü abahyukbah; tüsho Israel ju mihtsürü alala bolung müchitmudu tüsho münedung kambah.

⁸ Ha yam ha athsümünimkhibo mujung kambah; ha horü abannü amüyinsahbah, tüsho ish dübah; tüsho arünü athabah, ‘ Tümüde Atungpuhnü ha lomi tüsho ha yam kheak hadürü rhimokhea?’

⁹ Judüki arünü athabah, ‘ Tümütüsho arünü arü jipürü Ijip lo chingnü abekhitbuh Atungpuh arü Thrünpuh bahyukdo, tüsho püpü thrünpuhbo kheak kingaünde tüsho tankihde kapkihdo; jumonü Atungpuhnü ha thsümüchi arü kheak hande arüdo.’ ”

Solomonnü Hiram kheak Thiyuchihchimkhi

¹⁰ Solomonnü Atungpuh yam tüsho kiulongthsüpuh yam mahne thsükhi kam muku akheam ching,

¹¹ Tair kiulongthsüpuh Hiramnü Solomon kilim cedar tüsho saipress sang tüsho suna, api kün thülün jih, kiulongthsüpuh Solomonnü Hiram kilim Galilee lo ching kiuto 20 jih.

¹² Tüshe küyimki Hiramnü Solomonnü ajihkhi kiutobo kheahpü Tair chingnü arükhea, jurübonü api reangmükeamde kam.

¹³ Jumonü apinü tha, “I keonio, nünü I kilim jihkhibo ha tümü kiutobo a?” Jumonü jurü ju khihni khiungde abahkhi-lo de jichoh.

¹⁴ Tüshe Hiramnü kiulongthsüpuh kilim suna khahngak 4000 akumung mühah.

Solomonnü Arhimokhibo

¹⁵ Tüsho kiulongthsüpuhnü thsungkih-a rhimoshihpü thrütde mokhitkhi amütsan ju ha: Atungpuh yam thsüpü, api yam, alo mujung duhlopü, Jirusalem rhü, Hazor, Megiddo, tüsho Gezer.

¹⁶ (Ijip kiulongthsüpuh Pharaonü wutubah Gezer yan tüsho monü takabah, kiuto ching larü Kananrü laksah, tüsho Solomon niube atsührü kilim rhang-kukruk thsüjih;

¹⁷ jumonü Solomonnü Gezer thrünlo). Abobe Beth-horon,

¹⁸ Baalath, alomi phulung sunglo ching lakhi Tamar,

¹⁹ kheaküshe Solomon zowupung kiutobo alala, api khora tüsho khoralolungbe kiutobo, tüsho Solomonnü Jirusalem, Lebanon, tüsho apinü kiulongthsükhi lo ching rhimopü lümkhibo alala.

²⁰ Mihtsürü alala Amorrü, Hitrü, Perizrü, Hivrü, tüsho Jebusrü, sherübo Israel yungde alakhea–

²¹ arü tsühsoniusobo sherübo lomi ching aninga lakhea, sherü kheak Israelrünü shahde müdükheakshihkhea–harübo Solomonnü azhorü thsüde rhimopü thrütde mokhit, tüsho junangde arübo khihni khiungde lah.

²² Tüshe Solomonnü Israelrü a azhorü mükamshih; arübo bonungrü, api torübo, limthorübo, wühkenorübo, tüsho api khora-lolungbe le khoraberü limthorübo lakheah.

²³ Solomon rhimo ching thsungkih-a rhimorü kurungkheak atorübo 550 lakheah.

²⁴ Tüshe Pharao tsührünü David kiuto chingnü Solomonnü anihbe yam thsüjihkhi ching wutu; jushu Solomonnü kiuto tsülim peang alo ju kiua dangjih.

²⁵ Solomonnü kam khülang ching mahsam ki apinü Atungpuh thsungkheak thsükhi kingaün sadam kheak rhümthüneabe Atungpuh miki jihde, taka kingaün tüsho mungtsü kingaün laksah-a jih. Junangde apinü thüyam ju thsükhi.

²⁶ Solomonnü Edom lo ching, Amürüm Keto kheak Elath phünide Ezion-geber ching sangkungbo thsü.

²⁷ Hiramnü api yamlarübo keto rükri mükheahrü, Solomon yamlarübo lung rhimoshihpü sangkungbo chingnü yüshih.

²⁸ Arünü Ophir lim yü, tüsho suna khahngak 14,000 akumung lude arübah kiulongthsüpuh Solomon ki jih.