1 KIULONG THSÜRÜ 8 - AMÜSÜH HÜM CL Bible (BSI)

Arüngyam ching Tangzüng Sangdan Ludarükhi

¹ Judüki Solomonnü Israel azothsürübo tüsho trükbo ching akubo alala, Israelrü jipürü yamkhünbo, Zion de ajikhi David kiuto chingnü Atungpuh tangzüng sangdan lubah atupü kiulongthsüpuh Solomon miki Jirusalem ching mukhung.

² Israel mihtsürü alala khinu thüne, Zangrü khinu kheak thünio ching kiulongthsüpuh Solomon miki mukhung.

³ Israel azothsürübo alala arü, tüsho amükeamrübonü sangdan ju han.

⁴ Jumonü arünü Atungpuh sangdan, ashorupung khimyam tüsho amüsüh kukruk alala lubah atu; amükeamrübo tüsho Levirübonü jurübo hanbah atu.

⁵ Kiulongthsüpuh Solomon tüsho api miki mukhungkhi Israel boto alala namfimihnu tüsho moshipung mükhekhamkhukbe thsüde ahihdo laksah-a kingaünde api lung sangdan miki lakheah.

⁶ Judüki amükeamrübonü Atungpuh sangdan lubah arüngyam alunglim Khide Amüsüh Dangpung, cherubim ghidükeangbo khüp arü.

⁷ Tümüde cherubim ghidükeangbo ju sangdan zopung khiungde chutreak, junangde cherubimnü sangdan kumung tüsho akhrihbe-sangbo hüpdo.

⁸ Akhrihbebo ju khide ashangmonü alunglim arüngyam miki amüsüh dangpung kheaknü she akhrihbe münkheam ngüde alakheah; tüshe wungdo chingnü a jurü müngü; jurübo khihni khiungde lah.

⁹ Sangdan ching tümü she mülakheah tüshe Israelrü Ijip lomi chingnü akhiukchoki Atungpuhnü arü kheak tangzüng pung Horeb ching Mosanü lungbeak mahne yukkhi lang alakheah.

¹⁰ Tüsho küyimki amükeamrübo amüsüh dangpung chingnü akhiukkhea, Atungpuh yam ching amonü mi.

¹¹ Junangde amo lakhinü amükeamrübonü tankihpü müzhipkhukde kam; tümüde Atungpuh müretahkhinü api arüngyam mide kam.

¹² Judüki Solomonnü tha, “Amo amiting ching api lakhukbah de Atungpuhnü tha.

¹³ Inü nü kilim nü lünnü alapü atsüdak yam khülang thsüdo.”

Solomonnü Mihtsürübo ki Thakhi

¹⁴ Judüki kiulongthsüpuhnü mühiphülap tüsho Israel boto alala zhipde alachoki arü alala müngühjih.

¹⁵ Apinü tha, “Israel Thrünpuh, Atungpuh shiang, api münnü I buh David ki alokhikhi akhah hode dünjishih, apinü tha,

¹⁶ ‘Inü I mihtsürübo Ijip chingnü abekhitkhi nimungnü, thüyam khülang thsüpü thsüde inü Israel trük püpü bolungnü kiuto mumokhit; tüshe I mihtsürü Israel kurungkheak lashihpü inü David mokhit.’

¹⁷ Israel Thrünpuh, Atungpuh mung thsungkheak thüyam khülang thsüpü I buh David lümkhi ching lakheah.

¹⁸ Tüshe Atungpuhnü I buh David ki tha, ‘I mung thsungkheak thüyam khülang thsüpü lümkhi nünü tsüde rhimodo;

¹⁹ judüalalashe nünü thüyam müthsü, tüshe nü kilim zübejihpü lakhi nü tsührünü I mung thsungkheak thüyam thsübah.’

²⁰ Kheakü Atungpuhnü alokhikhi rhimodo; tümüde I buh David lapung ching I asürü; Atungpuhnü alokhikhi nangde Israel kiulongthsü-binkiu kheak I bin, tüsho Israel Thrünpuh, Atungpuh mung thsungkheak thüyam thsü.

²¹ Ju ching apinü isa jipürü Ijip lo chingnü bekhitchoki Atungpuh tangzüng zahkhi sangdan zopü dangpung inü zolah.”

Solomonnü Tamkhüntamnükhi

²² Solomonnü Atungpuh kingaün sadam müngüh, Israel amukhungrü miki zhip, tüsho api khah thüning lim chungkih.

²³ Apinü tha, “O Atungpuh ; Israel Thrünpuh, nü yamlarübo arü mulong athrünkhinü nü müngüh tsahrü thsungkheak tangzüng zokhi tüsho düngyingde muzhokhi nü nangde achanglim yinmi ching tüsho abolim alomi kheak Thrünpuh sheshe müla,

²⁴ nünü nü yamlarü I buh David ki thakhi tangzüng zodo; nünü nü münnü alokhi tüsho khihni nü khahnü dünjishihdo.

²⁵ Jumonü, O Atungpuh Israel Thrünpuh, nü yamlarü I buh David ki alokhide ha thakhi zoang, ‘Nünü I miki tsahkhi nangde nü tsührübonü I miki tsahpü arü limro kümkangsho, nü müthri khülang Israel kiulongthsü-binkiu kheak binpü küyimkishe mülakphah.’

²⁶ Jumonü, O Israel Thrünpuh nünü nü yamlarü I buh David ki alokhikhi nü yu dünjishang.

²⁷ “Tüshe Thrünpuhnü alomi kheak lakhukba de? Yinmi tüsho achangbe yinminü she nü mazüh, inü athsükhi ha yam khide mudukke!

²⁸ Nü yamlarünü tamkhüntamnükhi tüsho zhoshekhi kheahyukjang, O Atungpuh I Thrünpuh, khihni nü yamlarünü azhikhi tüsho tamkhüntamnükhi sojang;

²⁹ junangde are tüsho animung, ‘ Ju ching I mung labah,’ de nünü athakhi dangpung ha yam lim nü müknü akheahbah, junangde nü yamlarünü ha yam lim tamkhüntamnüchoki nünü anibah.

³⁰ Nü yamlarü tüsho nü mihtsürü Israelnü ha yam lim zhoshede tamkhüntamnüchoki sojang; O nü lapung yinmi chingnü sojang; sojang tüsho neak bahjang.

³¹ “Khürünü yamhingrü azhihde neak yihbeaksho tüsho thiyuchihchimshihpü bede arübah ha yam ching nü kingaün sadam miki thiyuchihchimsho,

³² yinmi chingnü sobah rhimoang. Amülimkhibo bahyukde tüsho anihbuhnü arhimokhi aku kheak yihkihde, nü yamlarübo kheak mahkhapang, tüsho thiyuro rhimorü kheak arü thiyuro lakhi yande thiyuro thsambah jihang.

³³ “Küyimki nü mihtsürü Israelnü, nü azhihde neak yihbeakkhi hode thiriri mukukba tüshe nü kilim alode anguhbah nü mung ching neak alokhide, ha yam ching nü ki tamkhüntamnü tüsho zhoshesho,

³⁴ yinmi chingnü sojang, nü mihtsürü Israel neak bahjang, tüsho nünü arü jipürü kilim jihkhi lo ching arü belode arang.

³⁵ “Küyimki yinmi rihdoba tüsho arünü nü azhihde neak yihbeakmonü tsüng marübanü, tüsho arünü nü mung ching alokhide ha yam lim tamkhüntamnüba, tüsho nünü arü thsümüchikhi hode arü neak chingnü arholoba,

³⁶ judüki yinmi chingnü sojang, tüsho nünü arünü atsahpü limro atsü arü ki thsangyuchoki, nü yamlarübo, nü mihtsürü Israel neak bahjang; tüsho nünü nü mihtsürü kilim yamrüplurüp jihkhi nü lo kheak tsüng arüshang.

³⁷ “Lomi ching khümzung, arüm, apung-tukthsü, mokri, tangkho, yungsho lungbün lasho; arü ririnü arü kiuto khürü ching lang she yansho; ju ching tümüpürü arüm yungsho tukthsü lanü;

³⁸ tümüpürü tamkhüntamnü, yungsho zhoshekhi langzü yungsho nü mihtsürü Israel alalanü arü mulong ching thsümüchi lakhi mükheahde ha yam lim arü khah chungkihbanü;

³⁹ judüki nü lapung yinmi chingnü sojang, neak bahjang, rhimoang, tüsho nünü mulong mükheahkhi alala ki arü thülünkhi ayannü rungang, tümüde mihtsürü mulong abande tümü lanü nünü lang mükheahlah,

⁴⁰ junangde nünü isa jipürü kilim jihkhi lo ching arü lakhi amuyung arünü nü trebah.

⁴¹ “Küyimki, nü mihtsürü Israel yungde khiungkerü khülang nü mung hode limshu lomi chingnü arübanü–

⁴² tümüde arünü nü mung ato, nü khah sühmüh, tüsho nü bin chungkhitkhi sobah küyimki khiungkerü khülang arüba tüsho ha yam lim tamkhüntamnüba,

⁴³ judüki nü lapung yinmi chingnü sojang, tüsho khiungkerünü nü ki jikhi yande alala rhimoang, junangde nü mihtsürü Israelnü arhimokhi ruk, lomi mihtsürü alalanü nü mung mükheahbah tüsho nü trebah, tüsho junangde inü athsükhi ha yam ching nü mung jia lah de arünü amükheahbah.

⁴⁴ “Nü mihtsürübo arü riri bede keochihpü yüsho, kürü ching nünü arü yüshihba, tüsho nünü amokhitkhi kiuto le nü mung thsungkheak inü athsükhi yam lim arünü Atungpuh ki tamkhüntamnüba,

⁴⁵ judüki arü tamkhüntamnükhi tüsho arü zhoshekhi yinmi chingnü sojang, tüsho arü kilim akuk ngüshang.

⁴⁶ “Arünü nü azhihde neak yihbeaksho–tümüde neak müyihbeakrü sheshe müla–tüsho arü kheak nü bukakhiukde thiriri kilim jihba, junangde arübo aramrü thsüde thiriri lomi ching limshu yungsho aphüni ching hande tsosho;

⁴⁷ judüalalashe arü ramde ayükhi lomi ching arünü lümrhangde kamsho, tüsho mulong müthribah arü ramrü lomi ching nü ki zhoshede thasho, ‘Isanü neak yihbeakdo, tüsho amülim rhimodo; isanü mihbukmuyuk rhimodo’;

⁴⁸ arünü arü mulong tüsho me athrünkhinü arü rama lubah ayükhi arü riri lomi chingnü müthrisho, tüsho nünü mokhitkhi kiuto tüsho nü mung thsungkheak thüyam thsükhi tüsho nünü arü jipürü kilim jihkhi lo lim nü ki tamkhüntamnüsho;

⁴⁹ judüki nü lapung yinmi chingnü arü tamkhüntamnükhi tüsho arü zhoshekhi sojang, arü kilim akuk ngüshang

⁵⁰ tüsho nü mihtsürünü nü azhihde neak yihbeakkhi tüsho arünü nü azhihde amülim rhimokhibo neak bahjang; tüsho arü ramrü miki arübo mihmuzho huhang, junangde arünü arü kheak mihmuzho labah

⁵¹ (tümüde arübo ju Ijip ching, yinchi niuthünakbe dang chingnü nünü abekhitkhi nü mihtsürü tüsho yamrüplurüp ah.)

⁵² Nü yamlarünü zhoshekhi tüsho nü mihtsürü Israelnü zhoshede nü ki jikhibo ching arü ki anide, nü mük khimshuhang.

⁵³ Tümüde nünü isa jipürü Ijip chingnü bekhitchoki, nünü Mosa hode alokhikhi nangde nü yamrüplurüp thsüpü arübo lomi mihtsürü alala lungnü nünü arü bemuwuhdo, O Atungpuh T HRÜNPU H.”

Akheam Tamkhüntamnü

⁵⁴ Kheakü küyimki Solomonnü Atungpuh kilim ha tamkhüntamnü tüsho zhoshekhi alala bankhea, apinü yinmi lim akhah chungkihbah khukningkhi Atungpuh kingaün sadam lim abinkhi chingnü asürü;

⁵⁵ apinü zhip tüsho düsheak achangnü Israel boto alala müngühjih:

⁵⁶ “Apinü alokhikhi nangde api mihtsürü Israel kilim sühakhim jihbuh Atungpuh shiang; apinü ayamlarü Mosa hode alokhikhi atsü thiyu khülang she mülakphah.

⁵⁷ Api isa jipürü lung lakhi nangde Atungpuh isa Thrünpuh isa lung laang; apinü isa düdükhe shi yungsho isa dübahyuk shi,

⁵⁸ tüshe api limrobo alala ching tsahpü tüsho isa jipürü ki thiyukhüm jihkhi api yukhümbo, api yakzanbo, tüsho yuzüngbo zopü isa mulong api kilim anguhanü.

⁵⁹ Inü Atungpuh miki zhoshekhi I yu harü ha, animung tüsho are Atungpuh isa Thrünpuh thüninshang, tüsho apinü nimung aban yihnüpü lakhi, ayamlarü tüsho amihtsürü Israel ki mihmüthsüm zoshang;

⁶⁰ junangde lomi mihtsürü alalanü Atungpuh ju Thrünpuh ah de amükheahbah; ju ching püpü müla.

⁶¹ Jumonü khihni nangde api yakzanbo tüsho api yukhümbo anide nüsabo Atungpuh isa Thrünpuh kilim shuhmülanga jihang.”

Arüngyam Müsükhitkhi

⁶² Judüki kiulongthsüpuh, tüsho api lung Israel alalanü Atungpuh miki laksah-a kingaün.

⁶³ Solomonnü moshipung 22,000 tüsho namfimihnu 120,000 Atungpuh kilim laksah-a mungtsü kingaün jih. Jumonü kiulongthsüpuh tüsho Israel mihtsürü alalanü Atungpuh yam müsükhit.

⁶⁴ Ju nimungnü Atungpuh yam müngüh lakhi aphulungbe khiungshak kiulongthsüpuhnü müsükhit; tümüde ju ching apinü taka kingaünkhi, hi kingaün tüsho mungtsü kingaünkhi müdang jih, tümütüsho Atungpuh miki lakhi müwayinchi kingaün sadam ju taka kingaünkhi, hi kingaün tüsho mungtsü kingaünkhi müdang jihkhibo leangkhipü thsüde khide ninide alakheah.

⁶⁵ Junangde Solomonnü api lung Lebo-hamath kheaknü Ijip ayung khiungde boto ato tüsho Israel alala bebah Atungpuh isa Thrünpuh miki nimung thüne thünio mung.

⁶⁶ Atizheah nipü mihtsürübo thiyia tsoshih; tüsho arünü kiulongthsüpuh müngühjih, tüsho Atungpuhnü api yamlarü David tüsho api mihtsürü Israel ki atsü alala huhkhi dünkheaknü asühachihde tüsho mulong asühde arübonü arü yam lim yü.