1 KIULONG THSÜRÜ 7 - AMÜSÜH HÜM CL Bible (BSI)

Solomon Yam

¹ Solomonnü anihbuh yam kam thürükheak mahsam thsü, tüsho apinü ayam alala thsükhi.

² Apinü Lebanon Murung yam ju ayunglim khahnap 100, atolim khahnap 50, tüsho achanglim khahnap 30 cedar dungjing ru phüyinü abinkiu bebah thsü.

³ Azan 44 kheak cedarnü ayi lüp, ju dungjing kheaknü ru abande 15 lakheah.

⁴ Ayinripit ru mahsam abina kheahachihde alakheah.

⁵ Khimdopü limro tüsho khimdopü dungjingbo ju akümlobe kungzhu-phüyinü kheahkihachihde ru mahsam lakheah.

⁶ Apinü dungjingbo bebah thüyambo ayunglim khahnap 50 tüsho atolim khahnap 30nü thsü. Ju miki dungjingbo bebah mükü tüsho azhindobe lakheah.

⁷ Apinü kiulongthsü-binkiu thüyamto khülang, mahkhappung, thiyuro thüyamto, sadamnü sadam khiungde cedarnü lüpdobah thsü.

⁸ Thüyamto dunglim anihbuh lapung yam alunglim mahkhappung lakhi ju rukhüh thsüa lakheah. Solomonnü alukhi Pharao tsührü alibe thsungkheak she ha thüyamto nangde thüyam khülang thsüjih.

⁹ Harü alala amo-achak lungbo akekhi ayannü nipbah, sangrhütbenü rhütde, yamkiung tüsho yamkhuh akhimtan kheaknü abinpü khiungde tüsho wungdo kheak mahkhappung ato khiungde thsü.

¹⁰ Akhimtan ju amo-achak lungbo, lung amülak, khahnap 8 tüsho 10 lungbo lakheah.

¹¹ Akumung ju aniparihkhi amoachak lungbo tüsho cedar sang lakheah.

¹² Mahkhappung ato ju akheanarihkhi lung phu mahsam tüsho cedar sang abinkiu phukhühnü yihdoa lakheah. Junangde Atungpuh yam alunglim khikzhakpung tüsho arüngyam mükübo kheak lakheah.

Huram Rhimobo

¹³ Kheakü Solomon kiulongthsüpuhnü Huram ju Tair chingnü bebah arü.

¹⁴ Api ju Naphtali trük khimoberü tsührü, abuh ju Tair mihtsürü, api ju müwayinchi rhimosorü lakheah; api rükri, lümzülümdo, tüsho müwayinchi rhimopü ching mükheahmudunü mide alakheah. Api kiulongthsüpuh Solomon kilim arü, tüsho anihbuh rhimo alala rhimo.

Müwayinchi Dungjing Mahne

¹⁵ Apinü müwayinchi dungjing 2 zün. Khülang ju achanglim khahnap 18 tüsho amükamkhi ju khahnap 12 rukhüh lakheah.

¹⁶ Kheaküshe apinü dungjingbo kumung kheak yihkihpü müwayinchinü kikiuk 2 achanglim khahnap 5nü thsü.

¹⁷ Dungjingbo ku kheak lakhi kikiukbo thsungkheaknü wuhründe akeakrukhi ayikeang lakheah; kikiuk khülang thsungkheak 7, tüsho kikiuk püpü thsungkheak 7.

¹⁸ Jumonü apinü dungjingbo thsü, tüsho aku kheak lakhi kikiukbo kumung mükamde alakhi ayikeang kumung tsarümkiu ru mahne thsü; tüsho ju ruk apinü kikiuk püpü thsungkheak thsü.

¹⁹ Tüsho thüyamto ching dungjingbo ku kheak lakhi kikiukbo ju thrilung sangbün jakjak lakheah, achanglim khahnap 4.

²⁰ Kikiukbo ju dungjingbo ku kheak tüsho ayikeang rheang ki thulungde mujuka lakhi kumung lakheah; tsarümkiubo ju mükamde ru thsübah 200 lakheah; tüsho kikiuk püpü kheak ju ruk lakheah.

²¹ Apinü arüngyam thüyamto ching dungjingbo khima zhipshih; apinü abolim dungjing khima zo tüsho Jakin de ji; tüsho apinü akulim dungjing khima zo tüsho Boaz de ji.

²² Dungjing kubo kheak ju thrilung sangbün rhimokhi lakheah. Ha ruk dungjingbo rhimo akhik thsü.

Müwayinchi Kekung

²³ Huramnü müwayinchinü kekung thulungde thsü, amünkheamnü amünkheam khiungde khahnap 10, achanglim khahnap 5 tüsho mükamde khahnap 30.

²⁴ Amünkheam khüp mükamde sangaso thrünkhibo khahnapkhüh ching 10, kekung mükamde alakheah; sangaso thrünkhi ru mahnenü thsükih.

²⁵ Ju moshipung 12 kheak zhip, 3 akulim abin, 3 aniyüzahlim abin, 3 düjinglim abin, tüsho 3 aniakhiuklim abin; kekung ju arübo kheak zhipshih. Arü düthsün ju alunglim abin.

²⁶ Akheahlim ju yingduk 3 bande alakheah; amünkheam ju thrilung sangbün nangde, pung münküp ruk thsü; kekung ching pungdüchi 40,000 ngüm lakheah.

Müwayinchi Lolungbebo

²⁷ Apinü müwayinchi lolungbe 10 thsü; jurü ayunglim khahnap 4, atolim khahnap 4, tüsho achanglim khahnap 3 lakheah.

²⁸ Lolungbebo ju ha ruk thsükheah: jurübo ching amüchinkhibo lakheah; amüchinkhibo ju akümlobe khüp lakheah;

²⁹ akümlobe khüp lakhi amüchinkhibo kheak kekhüzübo, moshipungbo, tüsho cherubim lakheah. Akümlobe kheak, kekhüzübo tüsho moshipungbo akumung tüsho abukkhüp chido ching nahlode arhimokhi arhophülapkhibo lakheah.

³⁰ Lolungbe abande müwayinchi jing phüyi tüsho müwayinchi müheandungbo lakheah; mühit phüyi ching müsühmüra-phuru tsunglobebo lakheah. Atsunglobebo ju arheanglim arhophülapkhi lungnü yuk.

³¹ Akutsünpü ching lakhi akulim akhimshuhbe ju alunglim khahnap 1 lakheah; akhimshuhbe ju dungjing nangde thulungkhürado, khahnap 1 kheak thripkhüh lakheah. Akhimshuhpung ju kiklokikrade alakheah; tüshe amungyean ju muthulungde kungzhu-phüyinü thsü.

³² Ajing phüyi ju amungyean khüp yuk; ajing müheandungbo ju adung ching yuk; tüsho ajing achanglim ju khahnap 1 kheak thripkhüh lakheah.

³³ Ajingbo ju khora-lolungbe jing nangde thsü; müheandungbo, yinchimükambo, yinchikeangbo, tüsho yinchikeang tholobe alala müwayinchinü thsü.

³⁴ Kungzhu-phüyi ching adung abande aduhlobe phüyi yuk; aduhlobe ju adung kheak mungjikhüh lakheah.

³⁵ Lolungbe abande aku kheak khahnap thripkhüh mükama kihshih; aduhlobe tüsho sangmüchinkhibo ju lolungbe ching mungjikhüh lakheah.

³⁶ Apinü aduhlobe tüsho sang-müchinkhi mikheak adükeak lakhi thülün cherubim, kekhüzü, ashidung mükamde hinga thrünkih.

³⁷ Hanangde lolungbebo thsü; arübo alala kheahmütsanpü thsüde atolim tüsho akheahpü rukhüh lakheah.

³⁸ Apinü lolungbe abande khülang khülang müwayinchinü müsühmüraphuru 10 thsü; müsühmüra-phuru abande pungdüchi 800, tüsho adünkhi khahngak 4 lakheah.

³⁹ Apinü lolungbe 5 thüyam düjinglim, tüsho 5 thüyam dukulim zhipshih; apinü kekung ju thüyam mühit lim düjinglim zo.

Arüngyam Thsükhi Khinlang

⁴⁰ Huramnü phühbo, alo-thsukbe, tüsho müsühmüra-phurubo she thsü. Jumonü Huramnü kiulongthsüpuh Solomon thsungkheak Atungpuh yam kheak rhimo alala thsükham:

⁴¹ dungjing 2, dungjing ku kheak kihkhi phurusük 2, dungjing ku kheak kihkhi phurusük 2 hüpdobe müchinmüra kukruk 2;

⁴² müchinmüra kukruk 2 thsungkheak tsarümkiu 400, dungjingbo ku kheak kihkhi phurusük 2 hüpdopü keakru-rhimo abande tsarümkiu ru 2;

⁴³ lolungbe 10, lolungbe kheak müsühmüra-phuru 10;

⁴⁴ kekung 1, tüsho kekung bukkhüp moshipung 12.

⁴⁵ Phühbo, alo-thsukbe, tüsho müsühmüra-phurubo, harü kukruk alala Huramnü kiulongthsüpuh Solomon khilim Atungpuh yam thsungkheak thsükhi ju müwayinchi ashahshah lakheah.

⁴⁶ Jordan dükhün ching, Sukkoth tüsho Zarethan dükeak akhimniuhniuh lo chingnü jurübo kiulongthsüpuhnü thsü.

⁴⁷ Solomonnü kukruk alala madünde zo, tümütüsho jurübo ahihdo lakheah; müwayinchi adünkhi ju mümütsande alakheah.

⁴⁸ Jumonü Atungpuh yam ching lakhi kukrukbo alala Solomonnü thsü: suna kingaün sadam, ahuhbe yikhap zopung suna dükhüm,

⁴⁹ suna müthsün tsünpung zopungbo, tsülim 5 tüsho huzulim 5 de alunglim kingaünpung miki lakheah; sangbünbo, tsünpungbo, suna mokhihmüjipbebo;

⁵⁰ pungbo, moyünbe, müsühmüra-phuru, rhümthüneabe thsungkheak phühbo tüsho suna müthsün moli-takpung; Khide Amüsüh Dangpung alunglim khimdopü thsungkheak tüsho suna arüngyam yamkhuh khiungshak khimdopü müchinkhibo.

⁵¹ Hanangde kiulongthsüpuh Solomonnü Atungpuh yam kheak thsükhi rhimo alala ban. Abuh Davidnü mümükheahkhi kukrukbo shotoyinchi, suna, pangjiphühbo lubah yüzah tüsho jurübo Atungpuh yam rahpung zopung ching zo.