1 KIULONG THSÜRÜ 6 - AMÜSÜH HÜM CL Bible (BSI)

Solomonnü Arüngyam Thsükhi

¹ Israelrü Ijip chingnü akhiuk dunglim kam chi phüyikheak zheahrü, Solomon kiulongthsükhi kam phüyipü, khinu mahnepü Khirhim khinu ching apinü Atungpuh yam thsüpü tankih.

² Kiulongthsüpuh Solomonnü Atungpuh thsungkheak thsükhi yam ju ayunglim khahnap 60, atolim khahnap 20, tüsho achanglim khahnap 30 lakheah.

³ Thüyam müngüh ayüzahpung khiungshak ju ashanglim khahnap 20 tüsho atolim ju apunglim lakshakde khahnap 10 lakheah.

⁴ Apinü thüyam ching ayinripitbo amükhipdobe yukbah thsü.

⁵ Khuhto khiungshak tüsho arüngyam alunglim yande apinü dukhukimpü thsü, ju ching arheanglim akhiungshakbo lakheah.

⁶ Abobe sadam ju atolim khahnap 5, aphulung sadam atolim khahnap 6, tüsho aleangbe sadam atolim khahnap 7 lakheah; tümüde abinkiubo thüyam rhü ching muyukpü thsüde apinü thüyam aleanglim mükamde amükhamlobebo yuk.

⁷ Thüyam ju lung-lahpung chingnü azünkhi lungbonü athsükheah, jumonü thüyam thsüchoki yümlung yungsho müzam yungsho yinchi kukruk tümü khün she muso.

⁸ Aphulungbe sadam ching yüzahpü ju thüyam düjinglim lakheah: rünkihleak ju aphulung ching dünkih tüsho ju kheaknü asampü ching yükih.

⁹ Junangde apinü thüyam ju thsükhi; apinü thüyam ching ju cedar sang abinkiu tüsho sangbeakbonü damzü thsü.

¹⁰ Apinü thüyam abümnü mükamde dukhukimpü thsü; sadam abande achanglim khahnap 5nü thsü, tüsho ju cedar sangbeakbonü thüyam kheak rünkih.

¹¹ Kheakü Atungpuh yu Solomon kilim arü,

¹² “Nünü thsüde alakhi ha thüyam dünkheaknü, mürangkhüh nünü I yakzanbo ching tsahsho, I yuzüngbo anisho, tüsho jurü ching tsahde I yukhümbo alala zosho, inü nü buh David kheak alokhikhi nü thsungkheak rhimobah.

¹³ I Israel tsührü bolung labah, tüsho I mihtsürü Israel mübahyuk.”

¹⁴ Jumonü Solomonnü thüyam ju thsükhi.

Arüngyam Alunglim Thsükhibo

¹⁵ Tüsho apinü thüyam alunglim rhü ju cedar sangbeaknü thsü; thüyam sadam kheaknü damzü yo azan khiungde apinü alunglim sangnü lüpdo; tüsho apinü thüyam sadam ju saipress sangbeaknü lüpdo.

¹⁶ Apinü yamkiung lim sadam kheaknü damzü khiungde achanglim khahnap 20 cedar sangbeakbonü thsü, tüsho apinü ha arüngyam alunglim Khide Amüsüh Dangpung thsü.

¹⁷ Alunglim lakhi arüngyam müngüh lakhi yamkhuh khiungshak ju ashanglim khahnap 40 lakheah.

¹⁸ Thüyam ching lakhi cedar ju dozüdodo tüsho sangbün pungde thsüa lakheah; alala cedar lakheah, lung tümü she müngü.

¹⁹ Atungpuh tangzüng sangdan zopü thüyam lung ching apinü alungbe arüngyam thsakham.

²⁰ Alungbe arüngyam ju ashanglim khahnap 20, atolim khahnap 20, achanglim khahnap 20; apinü ju suna müthsünnü lüpdo. Kheaküshe apinü kingaün sadam ju cedarnü lüpdo.

²¹ Solomonnü thüyam lung ching suna müthsünnü lüpdo, tüsho apinü alungbe arüngyam müngüh lakhode suna wuhrün binga zo, tüsho ju sunanü lüpdo,

²² ju khin, apinü atsüdakshihpü thsüde thüyam alala ju sunanü lüpdo; alungbe arüngyam yo kingaün sadam she apinü sunanü lüpdo.

²³ Alungbe arüngyam ching apinü cherubim mahne oliv sangnü, achanglim khahnap 10nü thsü.

²⁴ Cherub khülang ghi ashanglim ju khahnap 5 tüsho püpü cherub khülang ghi ashanglim khahnap 5; khülang ghi münkheam kheaknü püpü ghi münkheam khiungde khahnap 10 lakheah,

²⁵ püpü cherub ju she khahnap 10 akekhit; cherub mahne chido akekhi rukhüh tüsho akheahpü rukhüh lakheah.

²⁶ Cherub aban achanglim khahnap 10 lakheah.

²⁷ Apinü thüyam lung ching cherubim yuk; cherubim ghidükeangbo chutreak, jumonü khülang ghinü rhü khülang qiu, tüsho püpü cherub ghinü rhü püpü qiu; ane ghidükeang püpü thüyam phulung lim lakhi ju ghidükeangnü ghidükeang kheak qiuachih.

²⁸ Apinü cherubim she sunanü lüpdo.

²⁹ Arüngyam mükamde, alungbe tüsho aleangbe khiungshakbo kheak apinü cherubim ashidungbo tüsho sangbünbo pungde thrünkih.

³⁰ Apinü alungbe tüsho aleangbe arüngyam khiungshak sadambo kheak she sunanü lüpdo.

³¹ Apinü arüngyam lunglim yüzahpung khimdopübo oliv sangnü thsü; ayinripit kümlobe tüsho khimdopü dungjingbo ju kungzhu-phüngü lakheah.

³² Apinü oliv sang yo khimdopü mahne ju cherubim, ashidung, tüsho apungkhi sangbün thrünkhibonü lüpdo; apinü cherubim le ashidungbo kheak suna yihkih.

³³ Junangde apinü yamkhuh khiungshak yüzah limro oliv sangnü kungzhu-phüngünü thsü,

³⁴ tüsho saipress sang yo khimdopü mahne anapbe thsü.

³⁵ Apinü cherubim, ashidungbo, tüsho sangbünbo pungde kheanbah suna shahshahde mujukih.

³⁶ Apinü alungbe khiungshak ju akingarihkhi lung phu mahsam tüsho cedar sang abinkiu phu khülangnü thsü.

³⁷ Kam phüyipü, Khirhim khinu ching Atungpuh yam khimtan ju khim.

³⁸ Kam tizheahpü müzhi khinu ching akeanangkhi nangde mungji athrünkhi thsükham. Apinü ju kam thüne chingnü thsükhi.