1 KIULONG THSÜRÜ 5 - AMÜSÜH HÜM CL Bible (BSI)

Solomonnü Arüngyam Thsüpü Tsanglungkhi

¹ Küyimki arünü abuh müthri kiulongthsürü thsüpü Solomon mujude-mokhitkhi Tair kiulongthsüpuh Hiramnü asokhea, apinü ayamlarübo kilim yüshih; tümüde kamruhroro Hiram ju David müyambuh lakheah.

² Solomonnü Hiram kilim thiyu yüshihde tha,

³ “Atungpuhnü api mühirü thiriribo api jinglung khüp müyüzahshihyi khiungde thirithsükhi hode I buh Davidnü Atungpuh api Thrünpuh mung thsungkheaknü thüyam khülang müthsükhukkhi nünü mükheahlah.

⁴ Tüshe kheakü Atungpuh I Thrünpuhnü thrip abande I kilim mungtsü jihdo; I riri yungsho kuhi amütsü müla.

⁵ Jumonü Atungpuhnü I buh David ki ha ruk thakhi nangde Atungpuh I Thrünpuh mung thsungkheaknü inü thüyam khülang thsüpü lümlah, ‘Nü tsührü, shepü nü müthri nü kiulongthsü-binkiu kheak inü abinshihbanü, apinü I mung thsungkheaknü thüyam khülang thsübah.’

⁶ Jumonü Lebanon ching lakhi cedarbo I khilim kiushakpü thiyukhüm jihang. I yamlarübonü nü yamlarübo lung arihbah, tüsho nü yamlarübo thsungkheak nünü tümüpürü mihkhahbo jihdünü inü nü kilim jihbah; tümüde Sidonrü nangde sang-rhütsorü isa bolung sheshe müla de nünü mükheahlah.”

⁷ Küyimki Hiramnü Solomon yubo sokhea, apinü khide asüh, tüsho tha, “ Khihni ha mihtsürü ato kurungkheak lapü thsüde David kilim lümlung lakhi tsührü khülang jihbuh Atungpuh shiang.”

⁸ Hiramnü Solomon kilim thiyu yüshih, “Nünü I kilim arüshihkhi yusheak inü sodo; cedar tüsho saipress sangthulung thsungkheaknü nü yihnüpü alala inü arhimobah.

⁹ I yamlarübonü ju Lebanon chingnü keto ching hande azahbah; nünü ahuhkhi dangpung ching ke chingnü phungde ayüshihpü thsüde ju athsünrubah. Nünü lubah ayüshihpü thsüde ju ching inü atrünbah. Tüsho I yamkhün kilim tsühyungpü jihkhi hode nünü I yihnüpü dünjishihbah.”

¹⁰ Jumonü cedar tüsho saipress sangthulung Solomon yihnüpü alala Hiramnü jih.

¹¹ Solomonnü Hiram kilim ayamkhün thsungkheak wheat hi muluk 125,000 tüsho atsangkhitkhi oliv müdangke qiumuk 96 jih. Solomonnü Hiram kilim ha kam atukde jih.

¹² Jumonü anihbuhnü api kheak alokhikhi nangde Atungpuhnü Solomon kilim lümlung jih. Hiram tüsho Solomon dükeak mungtsü lakheah; tüsho anenü binthrüm thsü.

¹³ Kiulongthsüpuh Solomonnü rhimo mürangrü Israel alala bolungnü thrütde-mokhit; amokhitkhi ju mihtsürü 30,000 lakheah.

¹⁴ Apinü arübo 10,000nü shihcham mahsam thsübah yüshih; arünü khinu khülang Lebanon ching la tüsho khinu mahne thüyam ching la; rhimo mürangrü kurungkheak Adoniram ju abebuh lakheah.

¹⁵ Kheaküshe Solomon a awung lomi ching rhimorü 70,000 tüsho lunglahrü 80,000 lakheah,

¹⁶ tüsho apinü arü rhimokhi kheahpü khuhto mihtsürü 3300 zojih.

¹⁷ Tüsho kiulongthsüpuhnü arü ki lung atoto, amo-achak lungbo lahpü thiyukhüm jih tüsho arüngyam khimtanpü lungbo phukthünak.

¹⁸ Jumonü Solomon le Hiram thsungkheak rhimorü tüsho Gibalrünü thüyam thsüpü arhütsang tüsho lungbo tsanglung.