1 KIULONG THSÜRÜ 3 - AMÜSÜH HÜM CL Bible (BSI)

Solomonnü Lümlung thsungkheak Tamkhüntamnükhi

¹ Solomonnü Ijip kiulongthsüpuh Pharao kheak yihluachihde chingkihachih; apinü Pharao tsührü lu tüsho anihbuhnü ayam le A TUN GPU H yam tüsho Jirusalem mükamde chipi müthsükhiyi khiungde alibe ju David kiuto ching bebah arü.

² Tütüshe mihtsürübonü achang dangpungbo kheaknü laksah-a kingaün, tümütüsho Atungpuh mung thsungkheaknü thüyam müthsüyide alakheah.

³ Solomonnü abuh David yakzanbo ching tsahde Atungpuh muzho; tüshe apinü she achang dangpungbo kheak laksah-a kingaün tüsho rhümthüneabe jih.

⁴ Kiulongthsüpuhnü laksah-a kingaünpü Gibeon ching yü, tümüde ju achang dangpung adungto lakheah; Solomonnü ju kingaün sadam kheak 1000 bande taka kingaün.

⁵ Gibeon ching Atungpuhnü azhing ching Solomon ki milim ching akhiuka huh; tüsho Thrünpuhnü tha, “Inü nü ki tümü jihbeanü kheangang.”

⁶ Tüsho Solomonnü tha, “Nünü nü yamlarü I buh David ki amuzhodakkhi tode huhdo, tümütüsho apinü nü miki khiukdahde thiyuro ching mulong alungki chingnü nü kilim tsah; tüsho nünü api thsungkheak ha ato tüsho muzhodakkhi zojih, tüsho api kilim khihni api kiulongthsü-binkiu kheak binpü tsührü khülang jih.

⁷ Tüsho kheakü, O Atungpuh I Thrünpuh, I azürü thsüa lalashe nünü I nü yamlarü I buh müthri kiulongthsürü kamshih; künangde yakzan shuhbanü inü mümükheah.

⁸ Tüsho nü yamlarü a nünü amokhitkhi khea kheahpü hihdakkhi yungsho mükhekhukkhi boto ato mihtsürü bolung ching lah.

⁹ Jumonü nü yamlarü kilim nü mihtsürü yakzan shuhpü, atsü tüsho amütsü dükeak mütsankhitkhukpü anikhitkhi lümlung jihang; tümüde shenü ha nü mihtsürü ato kurungkheak yakzan shuhkhukba?”

¹⁰ Solomonnü ha kheangkhinü Atungpuh asühshih.

¹¹ Thrünpuhnü api ki tha, “Tümütüsho nünü ha kheang, tüsho nü kutsüp yungsho lakhit, yungsho nü riribo thsungkheak mükheang, tüshe nü thsungkheaknü alungki mütsankhitpü thsüde lümlung kheang,

¹² kheakü inü nü yu yande rhimochoh. Atsütsü inü nü kilim lümlung tüsho mütsankhitpü lümkhi jihchoh; nü müngüh sheshe nü ruk mülakheah tüsho nü ruk sheshe nü dunglim masürü.

¹³ Nünü amükheangkhi lakhit tüsho nü rhangdung amuyung wüntre lapü she inü nü kilim jihchoh; kiulongthsürü püpürü nü nangde müla.

¹⁴ Nü buh Davidnü atsahkhi nangde I yakzanbo tüsho I yukhümbo anide nünü I limrobo ching tsahsho, inü nü kutsüp ashang kamshihbah.”

¹⁵ Judüki Solomonnü asürü; ju milim khülang lakheah. Apinü taka kingaünkhi tüsho mungtsü kingaün jih tüsho api yamlarübo thsungkheak thünio khülang jih.

Solomonnü Mahkhapkhi

¹⁶ Ju dunglim, müzammüramrü aliberü mahne kiulongthsüpuh kilim arübah api miki zhip.

¹⁷ Aliberü khülangnü tha, “I tungpuh, ha liberü tüsho I thüyam khülang ching lachoh; tüsho anihbe thüyam ching lachoki I khungarü khülang lakheah.

¹⁸ Judüki nimung asam nipü inü khungarü zübeshu, ha liberünü she zübe. Ike rukhüh lakheah; thüyam ching ike lung sheshe mülade ike lang alakheah.

¹⁹ Judüki ha liberü tsührü ju azhing ching sheabah, tümütüsho anihbenü api kheak yap.

²⁰ Anihbenü tsüngphulung ching asürü tüsho nü yamlarü yapshea lachoki I ki yapkhi I tsührü lu. Anihbenü api ju atreang kheak yapshih, tüsho atsührü ashekhi ju I treang kheak yapshih.

²¹ Küyimki I tsührü niuh duhpü asürükhea, api ju shea inü ngü; tüshe küyimki yapsu inü api kheak düshihde akheahkhea, atsütsü ju inü azübekhi tsührü yungde alakheah.”

²² Tüshe aliberü püpü junü tha, “Yung, rhangdung lakhi tsührü ju I tsührü ah, tüsho ashekhi tsührü nü tsührü ah.” Akhuhbenü tha, “Yung, ashekhi tsührü ju nü tsührü ah tüsho rhangdung lakhi tsührü ju I tsührü ah.” Junangde ane kiulongthsüpuh miki atsangachih.

²³ Judüki kiulongthsüpuhnü tha, “ Khülangnü thachoh, ‘Rhangdung lakhi ha I tsührü ah, tüsho ashekhi ju nü tsührü ah’; püpünü thachoh, ‘ Jude yung! Nü tsührü ju ashekhi ah, tüsho I tsührü ju rhangdung lakhi ah.’”

²⁴ Jumonü kiulongthsüpuhnü tha, “I kilim nukshang khülang lubah arang,” tüsho arünü nukshang khülang kiulongthsüpuh miki lubah arü.

²⁵ Kiulongthsüpuhnü tha, “Rhangdung lakhi khungarü ha mahne thsüde chamanü; jude thsah thripkhüh khülang kilim jihanü, tüsho thripkhüh püpü khülang kilim jihanü.”

²⁶ Tüshe rhangdung lakhi khungarü abe junü kiulongthsüpuh ki tha–tümütüsho atsührü muzhokhinü amulong ching tru– “Muzhobah I tungpuh, rhangdung lakhi azübuh ju anihbe kilim jihang; dükde api dülaksah!” Püpünü tha, “Ha I yo yungsho nü yo she müthsü; mahne thsüde kiurüpang.”

²⁷ Judüki kiulongthsüpuhnü alo: “Akhuhbe alibe kilim rhangdung lakhi khungarü jihang; api dülaksah. Anihbe ju api abe ah.”

²⁸ Kiulongthsüpuhnü mahkhapjihkhi Israel alalanü so; tüsho arünü kiulongthsüpuh trezung thsüde zhip, tümütüsho mahkhappü thsüde Thrünpuh lümlung api kheak lah de arünü ngükhit.