1 KIULONG THSÜRÜ 21 - AMÜSÜH HÜM CL Bible (BSI)

Naboth Kurungasolu

¹ Harü dünji dunglim: Jezreelrü Naboth kurungasolu khülang, Samaria kiulongthsüpuh Ahab yam rheang ki lakheah.

² Tüsho Ahabnü Naboth ki tha, “Nü yo kurungasolu I kilim jihang, junangde inü wotsühwora shahwün thsanü, tümütüsho ha I yam phünide lah; ju thsungkheak inü nü kilim kurungasolu atsübe jihanü; yungsho, nünü tsülah de lümsho, inü ju dün nü kilim sho jihanü.”

³ Tüshe Nabothnü Ahab ki tha, “Isa jipürü yamrüplurüp nü kilim jihpü thsüde Atungpuhnü mümülü.”

⁴ Jezreelrü Nabothnü api ki thakhi dünkheaknü Ahabnü abukakhiukde tüsho mulong zhipzhipde thüyam lim yü; tümüde apinü tha, “Isa jipürü yamrüplurüp inü nü müjih.” Apinü ayapkiu kheak yapbah api miro anguhabah, tüsho müyimtsüh.

⁵ Aniube Jezebelnü api ki arübah tha, “Tümüde nü müyimtsühpü thsüde khide lümthsünü la?”

⁶ Apinü alibe ki tha, “Tümütüsho inü Jezreelrü Naboth ki asukachih tüsho api ki tha, ‘Nü yo kurungasolu sho mo I kilim jihang; yungsho, nünü mulongsho ju müthri inü kurungasolu püpü nü kilim jihanü’; tüshe apinü alo, ‘Inü I yo kurungasolu nü müjih.’”

⁷ Aniube Jezebelnü api ki tha, “Nünü kheakü Israel yakzan shuhla de? Asürang, tsühyungbe khürü tsühang, tüsho asühang; inü Jezreelrü Naboth yo kurungasolu nü jihbah.”

⁸ Jumonü alibenü Ahab mung chingnü kihümbo thrüt tüsho anihbuh yo mütsanyümnü yüm; alibenü kihümbo ju api kiuto ching Naboth lung larü azothsürübo tüsho amükheahrübo kilim mühah.

⁹ Alibenü kihümbo ching thrüt, “ Khümkeak thsüpü zhiyukang, tüsho amukhungrü bolung Naboth ju adungtobe thsüde binshang;

¹⁰ api mikhuh mihtsürü mahne binshang, tüsho api azhihde thashang, ‘Nünü Thrünpuh tüsho Kiulongthsüpuh athrudo.’ Judüki api bekhitang, tüsho api rusahang.”

¹¹ Api kiuto mihtsürübo azothsürübo tüsho amükeamrübo api kiuto ching larünü arü kilim Jezebelnü arüshihkhi yu yande rhimo. Alibenü arü kilim mühahkhi kihümbo ching thrütkhi nangde,

¹² arünü khümkeak thsüpü zhiyuk tüsho Naboth ju mihtsürü bolung adungtobe thsüde binshih.

¹³ Mihtsürü amütsü mahne azah tüsho Naboth mikhuh bin; tüsho mihtsürü amütsübonü Naboth azhihde mihtsürü mikinü tha, “Nabothnü Thrünpuh tüsho kiulongthsüpuh athrudo.” Jumonü arünü api kiuto aleanglim bekhit, tüsho api rusahabah.

¹⁴ Judüki arünü Jezebel ki thaa yüshih, “Naboth rusahdo; api shea lah.”

¹⁵ Naboth rukhi tüsho api shekhi Jezebelnü asoakede, alibenü Ahab ki tha, “Yüang, apinü sho mo nü ki thsunglokhi, Jezreelrü Naboth yo kurungasolu luang; tümüde Naboth arhang müla tüshe shea lah.”

¹⁶ Naboth shekhi Ahabnü asoakede, Ahabnü Jezreelrü Naboth yo kurungasolu lupü yükipü tsahmusu.

¹⁷ Judüki Atungpuh yu Tishbirü Elija kilim thaa arüshih:

¹⁸ Samaria ching yakzanshuhbuh Israel kiulongthsüpuh Ahab shorupü yükiang; kheakü apinü yübah alukhi Naboth yo kurungasolu ching api lah.

¹⁹ Nünü api ki thaang, “Atungpuhnü ha thachoh: Nünü mihtsürü laksahdü de, tüsho yamalo she ludü de?” Nünü api ki thaang, “Atungpuhnü ha thachoh: khihnubonü Naboth thiyih müleakpung ching, khihnubonü nü thiyih she amüleakbah.”

²⁰ Ahabnü Elija ki tha, “O I riri, nünü I ngüdü de?” Apinü alo, “Inü nü ngüdo. Tümütüsho nünü Atungpuh miki amütsü rhimode nü zangrü yindo,

²¹ inü nü kheak thsümüchi hande arübah; inü nü muyubah, tüsho Israel ching rhüka lakhi tüsho zuzu lakhi athrürü Ahab kheaknü akheamshihbah;

²² tüsho inü nü yam ju Nebat tsührü Jeroboam yam le Ahija tsührü Baasha yam nangde akamshihbah, tümütüsho nünü I bukakhiukshih tüsho Israel neak yihbeakshihdo.

²³ Kheaküshe Jezebel dünkheak Atungpuhnü tha, ‘ Khihnubonü Jezebel ju Jezreelrü chipi khüpnü atsühbah.’

²⁴ Khürü Ahab betsührü shepü kiuto ching shebanü khihnubonü atsühbah; tüsho khürü mükeak chingnü shesho thüning wuhnubonü atsühbah.”

²⁵ (Judüki Ahabnü aniube Jezebelnü thsurangde Atungpuh miki amütsü rhimopü azangrü yinkhi nangde sheshe mülakheah.

²⁶ Atungpuhnü Israel müngüh yanabahkhi Amorrü nangde apinü sangthsübo dunglim yüde khide athraneanbe rhimodo.)

²⁷ Küyimki Ahabnü thiyu jurü sokhea, apinü akhim thorüp tüsho apang keangkeang kheak shungliukhim yuk; apinü khümkeak thsüde shungliukhim ching yap, tüsho mulong rozhakde mükamde tsah.

²⁸ Judüki Atungpuh yu Tishbirü Elija kilim arü:

²⁹ “Ahabnü I miki nihbuh zangrü aninikhüh kamkhi nünü ngünah? Tümütüsho apinü I miki aninikhüh kamdo, api nimungbo ching inü thsümütsü hande marü; tüshe api tsührü nimungbo ching inü api yamkhün ching thsümütsü hande arübah.”